ନୂଆଦିଲ୍ଲୀ: ସମ୍ପ୍ରତି ଭାରତରେ ବିକଶିତ ହେଉଥିବା ନାକରେ ବୁନ୍ଦା ନେଲା ଭଳି ଏକ ପ୍ରକାର କୋଭିଡ୍ ଟିକା ଶିଶୁମାନଙ୍କ କୋଭିଡ୍ ସଂକ୍ରମଣ ପାଇଁ ଅଭୟ ବରଦାନ ସଦୃଶ ହେବ ବୋଲି ବିଶ୍ବ ସ୍ବାସ୍ଥ୍ୟ ସଂଗଠନ(ହୁ)ର ମୁଖ୍ୟ ବୈଜ୍ଞାନିକ ସୌମ୍ୟା ସ୍ବାମୀନାଥନ୍ ଆଶା ପ୍ରକଟ କରିଛନ୍ତି। ଆଗକୁ ଆସୁଥିବା ମହାମାରୀ କୋଭିଡ୍-୧୯ର ସମ୍ଭାବ୍ୟ ତୃତୀୟ ଲହର ସଂକ୍ରମଣରେ ଶିଶୁମାନେ ହିଁ ଅଧିକ ସଂଖ୍ୟାରେ ପ୍ରଭାବିତ ହେବେ ବୋଲି ବିଶେଷଜ୍ଞମାନେ ସତର୍କ କରାଇ ଦେଇଛନ୍ତି।
Sambad is now on WhatsApp
Join and get latest news updates delivered to you via WhatsApp
ତେବେ ଭାରତର ଏହି ନାକ ବୁନ୍ଦା ଟିକା ଯଦିଓ ଚଳିତ ବର୍ଷ ଉପଲବ୍ଧ ହେବାର ସମ୍ଭାବନା କମ୍ ରହିଛି ତେବେ ତାହା ହିଁ ସଂକ୍ରମଣର ମୋଡ଼ ବଦଳାଇଦେବ ବୋଲି ସୌମ୍ୟା କହିଛନ୍ତି। ଥଣ୍ଡା ଔଷଧ ପରି ନାକ ପୁଡ଼ାରେ ବୁନ୍ଦା ଆକାରରେ ନେବାକୁ ଥିବା ଏହି ଟିକା ଶିଶୁମାନଙ୍କ ବ୍ୟବହାର ପାଇଁ ଅତି ସହଜ ହେବା ସହ ଶ୍ବାସନଳୀରେ ସ୍ଥାନୀୟ ସଂକ୍ରମଣକୁ ସିଧାସଳଖ ରୋକିପାରିବ ବୋଲି ସେ କହିଛନ୍ତି। ତେବେ ପିଲାଙ୍କ ଠାରେ ତାହାର ପ୍ରୟୋଗ ପୂର୍ବରୁ ଅଧିକରୁ ଅଧିକ ବୟସ୍କ ବ୍ୟକ୍ତି ଓ ବିଶେଷ କରି ଶିକ୍ଷକ ଶିକ୍ଷୟିତ୍ରୀମାନଙ୍କର ଟିକାକରଣ ସଂପନ୍ନ ହେବା ଉପରେ ସେ ଗୁରୁତ୍ବାରୋପ କରିଛନ୍ତି। ଯେତେବେଳେ ଗୋଷ୍ଠୀ ସଂକ୍ରମଣ ଯଥେଷ୍ଟ କମି ଆସିବ ସେତେବେଳେ ହିଁ ଅଭିଭାବକମାନେ ନିଜ ନିଜ ପିଲାଙ୍କୁ ବିଦ୍ୟାଳୟ ଅଭିମୁଖେ ଛାଡ଼ିବା ସମୟୋଚିତ ହେବ ବୋଲି ସେ ପରାମର୍ଶ କରିଛନ୍ତି।