ବିଧାୟକଙ୍କ ଚା’ରୁ ମିଳିଲା ପୋକ, ମୋତେ ହତ୍ୟା କରିବାକୁ ଷଡଯନ୍ତ୍ର ହୋଇଥିବା କହି ମ୍ୟାନେଜର ଓ ୱେଟରକୁ କରାଇଲେ ଗିରଫ

ପାଟନା: ଚା’ରୁ ମିଳିଲା ପୋକ, ରାଗିଗଲେ ବିଧାୟକ । ସ୍ଥିତି ଏମିତି ହେଲା ଯେ, ଚା’ ପରଷିଥିବା ବ୍ୟକ୍ତି ଓ ମ୍ୟାନେଜରଙ୍କୁ ଗିରଫ କରାଗଲା । ଏଭଳି ଏକ ଘଟଣା ବିହାରର ହାଜିପୁରରୁ ସାମ୍ନାକୁ ଆସିଛି । ଗୋଟିଏ କପ୍ ଚା’କୁ ନେଇ ହାଇଭୋଲଟେଜ ଡ୍ରାମା ଦେଖିବାକୁ ମିଳିଛି ।

ବିହାରରେ ଥିବା ମହୁଆର ବିଧାୟକ ମୁକେଶ ରୋଶନ ନିଜ ନିର୍ବାଚନମଣ୍ଡଳୀ ବୁଲିବା ପରେ ରବିବାର ସନ୍ଧ୍ୟାରେ ହାଜିପୁରରେ ଥିବା ସର୍କିଟ ହାଉସରେ ପହଞ୍ଚିଥିଲେ, ଯେଉଁଠି ତାଙ୍କୁ ଚା’ କପ୍ ଦେଇ ସ୍ୱାଗତ କରାଯାଇଥିଲା । ଶୀତୁଆ ସନ୍ଧ୍ୟାରେ ଗରମାଗରମ ଚା’ ପାଇ ମଧ୍ୟ ବିଧାୟକ ବେଶ ଖୁସିଥିଲେ । କିନ୍ତୁ ଦୁଇ ଢୋକ ଚା’ ପିଇଛନ୍ତି କି ନାହିଁ କପ ଉପରେ ତାଙ୍କର ନଜର ପଡିଲା । ଚା’ ଭିତରେ କିଛି ଭାସୁଥିବାର ଦେଖିବାକୁ ପାଇଥିଲେ ସେ। ପ୍ରଥମେ ତ ଏହାକୁ ଚା’ ପତି ଭାବି ଏଡାଇ ଯାଇଥିଲେ । କିନ୍ତୁ ଆଉ ଢୋକେ ଚା’ ପିଇବା ପରେ ଜାଣିଥିଲେ ଯେ କପ ଭିତରେ ପୋକ ଭାସୁଛି । ଏହା ଜାଣିବା ପରେ ବିଧାୟକ ରାଗି ଯିବା ସହ ସର୍କିଟ ହାଉସ ଭିତରେ ହୋ-ହଲ୍ଲା କରିଥିଲେ ବିଧାୟକ ।