ଟିଏସ୍ ବଦଳରେ ତେଲେଙ୍ଗାନାର ସଂକ୍ଷିପ୍ତ ନାମ ହେବ ଟିଜି

ହାଇଦ୍ରାବାଦ: ମୁଖ୍ୟମନ୍ତ୍ରୀ ରେବନ୍ତ ରେଡ୍ଡୀଙ୍କ ଅଧ୍ୟକ୍ଷତାରେ ଗଠିତ ତେଲେଙ୍ଗାନା କ୍ୟାବିନେଟ୍ ଏହାର ସରକାରୀ ସଂକ୍ଷିପ୍ତ ନାମ ପରିବର୍ତ୍ତନ କରିବା ସହ ଏକ ନୂତନ ରାଜ୍ୟ ସଙ୍ଗୀତ ଗ୍ରହଣ କରିବାକୁ ନିଷ୍ପତ୍ତି ନେଇଛି। ରାଜ୍ୟର ଆରାଧ୍ୟା ଦେବୀ ତେଲେଙ୍ଗାନା ତାଲିଙ୍କୁ ମଧ୍ୟ ନୂଆ ରୂପରେ ପରିକଳ୍ପନା କରାଯିବ। ଆନ୍ଦ୍ରେ ଶ୍ରୀଙ୍କ ‘ଜୟ ଜୟ ହୋ ତେଲେଙ୍ଗାନା’କୁ ରାଜ୍ୟ ସଙ୍ଗୀତ କରାଯିବ ଏବଂ ରାଜ୍ୟର ସଂକ୍ଷିପ୍ତ ନାମ ଟିଏସ୍‌ରୁ ଟିଜିକୁ ପରିବର୍ତ୍ତନ କରାଯିବ। ଶାସକ ଦଳ ଅଭିଯୋଗ କରିଛି ଯେ ପୂର୍ବ ସରକାର ନିଜ ଦଳର ନାମ ସହ ମେଳ ଖାଇବା ପାଇଁ ‘ଟିଏସ୍’କୁ ବାଛିଥିଲେ। ଭାରତ ରାଷ୍ଟ୍ର ସମିତି (ବିଆର୍‌ଏସ) ପୂର୍ବରୁ ତେଲେଙ୍ଗାନା ରାଷ୍ଟ୍ର ସମିତି (ଟିଆର୍‌ଏସ) ନାମରେ ପରିଚିତ ଥିଲା, ଯାହାକୁ ସେମାନଙ୍କ ଜାତୀୟ ଆକାଂକ୍ଷାକୁ ପ୍ରତିଫଳିତ କରିବା ପାଇଁ ପରିବର୍ତ୍ତନ କରାଯାଇଥିଲା।

ଭାରତର ପ୍ରତ୍ୟେକ ରାଜ୍ୟର ଦୁଇଟି ଅକ୍ଷରର ସଂକ୍ଷିପ୍ତ ନାମ ଅଛି, ଯଥା ଆନ୍ଧ୍ରପ୍ରଦେଶ ପାଇଁ ଏପି, ବିହାର ପାଇଁ ବିଆର୍ ଏବଂ ମହାରାଷ୍ଟ୍ର ପାଇଁ ଏମ୍‌ଏଚ୍‌। ଏହାଛଡ଼ା ରାଜ୍ୟରେ ଜାତିଗତ ଜନଗଣନା କରିବାକୁ କ୍ୟାବିନେଟ୍ ନିଷ୍ପତ୍ତି ନେଇଛି। ଗୁରୁବାରଠାରୁ ଆରମ୍ଭ ହେବାକୁ ଥିବା ରାଜ୍ୟ ବଜେଟ୍ ଅଧିବେଶନ ପୂର୍ବରୁ ଘୋଷଣା କରାଯାଇଥିବା ନିଷ୍ପତ୍ତିଗୁଡ଼ିକ ମଧ୍ୟରେ ଏହା ମଧ୍ୟ ରହିଛି। ରାଜେନ୍ଦ୍ରନଗର ଜିଲ୍ଲାରେ ନୂତନ ହାଇକୋର୍ଟ ପରିସର ପାଇଁ ୧୦୦ ଏକର ଜମି ଆବଣ୍ଟନ କରିବାକୁ କ୍ୟାବିନେଟ୍ ନିର୍ଦ୍ଦେଶ ଜାରି କରିଛି। ବଜେଟ୍ ଅଧିବେଶନରେ ରାଜ୍ୟ ସରକାର ଗ୍ୟାସ୍ ଓ ବିଦ୍ୟୁତ୍ ଗ୍ୟାରେଣ୍ଟି ମଧ୍ୟ କାର୍ଯ୍ୟକାରୀ କରିବେ। କ୍ଷମତାକୁ ଆସିବାର ୧୦୦ ଦିନ ମଧ୍ୟରେ ସମସ୍ତ ୬ଟି ନିର୍ବାଚନ ଗ୍ୟାରେଣ୍ଟି ପୂରଣ କରିବାକୁ ମୁଖ୍ୟମନ୍ତ୍ରୀ ପୂର୍ବରୁ ପ୍ରତିଶ୍ରୁତି ଦେଇଥିଲେ।