ଦକ୍ଷିଣ-ଭାରତରେ ଆଇଏସ ଉପସ୍ଥିତି ଚିନ୍ତାଜନକ ସ୍ତରରେ ପହଞ୍ଚିଲାଣି : ଗୁଇନ୍ଦା ରିପୋର୍ଟ

ନୂଆଦିଲ୍ଲୀ : ଦକ୍ଷିଣ-ଭାରତରେ ବିଶ୍ୱର ସବୁଠୁ କୁଖ୍ୟାତ ଆତଙ୍କବାଦୀ ସଂଗଠନ ଆଇଏସର ଅନୁପ୍ରବେଶ ବଢିଚାଲିଛି । ଏ ନେଇ ଗୁଇନ୍ଦା ସଂସ୍ଥାମାନେ ସରକାରଙ୍କୁ ସତର୍କ କରାଇଦେଇଛନ୍ତି । ବିଶେଷକରି ତାମିଲନାଡୁ, କେରଳ ଓ ତେଲେଙ୍ଗାନାରେ ଆଇଏସ ଆତଙ୍କବାଦୀମାନଙ୍କ ନେଟଓ୍ଵାର୍କ ରହିଛି ବୋଲି ଗୁଇନ୍ଦା ରିପୋର୍ଟରେ କୁହାଯାଇଛି । ଗତ ମାସରେ ଶ୍ରୀଲଙ୍କାରେ ହୋଇଥିବା ସରିଜ ବୋମା ବିସ୍ଫୋରଣ ପରେ ତାହାର ଚେର ଦକ୍ଷିଣ ଭାରତକୁ ଲମ୍ବିଥିବା ଜଣାପଡିଥିଲା । ଏପରିକି ଶ୍ରୀଲଙ୍କାରେ ଆତ୍ମଘାତି ଆକ୍ରମଣ କରିଥିବା ଆତଙ୍କବାଦୀମାନେ କେରଳରେ ତାଲିମ ନେଇଥିଲେ ବୋଲି ଶ୍ରୀଲଙ୍କାର ରାଷ୍ଟ୍ରପତି ମୈତ୍ରୀପାଳ ସିରିସେନା କହିଥିଲେ ।

ଗୁଇନ୍ଦା ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ସିରିଆକୁ ଯାଇଥିବା ଭାରତୀୟ ଯୁବକମାନେ ସେଠାରେ ଆଇଏସର ପରାଜୟ ପରେ ଭାରତକୁ ଫେରିଆସିଛନ୍ତି । ଭାରତରେ ହିଂସାକାଣ୍ଡ କରିବା ଲାଗି ସେମାନଙ୍କୁ ବିଦେଶରୁ ଅର୍ଥ ଆସୁଛି । ଆଗକୁ ଏମାନେ ଦେଶର ସୁରକ୍ଷା ପାଇଁ ବିପଦ ସୃଷ୍ଟି କରିବାର ଆଶଙ୍କା ରହିଛି । ତେବେ ଗୃହ ମନ୍ତ୍ରାଳୟର ଭାରତରେ ଆଇଏସର ଉପସ୍ଥିତି ସେତେଟା ଚିନ୍ତାଜନକ ନାହିଁ ବୋଲି କହିଛି ।