ତେହେରାନ : ପୁଲିସ ହାଜତରେ ଜଣେ ଯୁବତୀ ମୃତ୍ୟୁବରଣ କରିବା ଘଟଣାକୁ ନେଇ ସମଗ୍ର ଇରାନରେ ଆନ୍ଦୋଳନ ତେଜିବାରେ ଲାଗିଛି । ପୁଲିସର ଦମନ ସତ୍ତ୍ବେ ଅଧିକରୁ ଅଧିକ ମହିଳା ରାସ୍ତାକୁ ଓହ୍ଲାଇ ଆନ୍ଦୋଳନ କରିବାରେ ଲାଗିଛନ୍ତି । ମିଳିଥିବା ସୂଚନା ଅନୁସାରେ ଏପର୍ଯ୍ୟନ୍ତ ଏହି ଆନ୍ଦୋଳନ ଯୋଗୁଁ ଏପର୍ଯ୍ୟନ୍ତ ୧୧ ଜଣ ମୃତ୍ୟୁବରଣ କରିସାରିଲେଣି । ସମଗ୍ର ଇରାନରେ ଇଣ୍ଟରନେଟ ସେବା ବନ୍ଦ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ଗତ ସପ୍ତାହରେ ଇରାନର ରାଜଧାନୀ ତେହେରାନ ବୁଲିବାକୁ ଆସିଥିବା ମାସା ଅମିନି ନାମକ ଜଣେ ୨୨ ବର୍ଷୀୟା ଯୁବତୀ ଠିକଭାବେ ହିଜାବ ପିନ୍ଧିନଥିବାରୁ ମୋରାଲ ପୁଲିସ ( ସଂସ୍କାର ପୁଲିସ) ଗିରଫ କରିଥିଲା । ହାଜତରେ ତାଙ୍କୁ ପ୍ରବଳ ମାଡ଼ ମରାଯିବା ପରେ ଗତ ୧୫ ତାରିଖରେ ତାଙ୍କର ମୃତ୍ୟୁ ହୋଇଥିଲା । ଇରାନ ସରକାର କହୁଛନ୍ତି ଯେ ସଂପୃକ୍ତ ଯୁବତୀର ହୃଦରୋଗ ଥିଲା ଓ ସେ ହୃଦଘାତରେ ପ୍ରାଣ ହରାଇଛି । କିନ୍ତୁ ଅମିନିଙ୍କ ପରିବାର ଲୋକେ ଏହାକୁ ଖଣ୍ଡନ କରିଛନ୍ତି ।
ଏହା ପରେ ସମଗ୍ର ଇରାନରେ ଆନ୍ଦୋଳନ ତେଜିବାରେ ଲାଗିଛି । ଗତ ଏକ ସପ୍ତାହ ହେଲା ଇରାନର ମହିଳାମାନେ ରାସ୍ତାକୁ ଓହ୍ଲାଇ ନିଜ ନିଜର ହିଜାବ ଖୋଲିବା ସହ ରାସ୍ତାରେ ନିଆଁ ଲଗାଇ ସାଂକେତିକ ବିରୋଧ ପ୍ରଦର୍ଶନ କରୁଛନ୍ତି । ସେମାନେ ସମାନତାର ଅଧିକାର ଦାବି କରୁଛନ୍ତି । ପୁଲିସ ଏହି ଆନ୍ଦୋଳନକୁ ଯେତିକି ଦମନ କରିବାକୁ ଉଦ୍ୟମ କରୁଛି ସ୍ଥିତି ସେତିକି ବିଗିଡ଼ିଚାଲିଛି ।