ଦିନକୁ ମିଳିବ ୧୩୦ ଲିଟର ପାଣି: ଜଳ ସଙ୍କଟ ଯୋଗୁ ଇରାନ ଜାରି କଲା ନୂଆ ନିର୍ଦ୍ଦେଶ

ତେହେରାନ: ଜଳ ସଙ୍କଟ ମଧ୍ୟରେ, ଇରାନ ସରକାର ପାଣିକୁ ନେଇ  ଏକ ନୂତନ ନିର୍ଦ୍ଦେଶ  ଜାରି କରିଛନ୍ତି।  ନିର୍ଦ୍ଦେଶରେ କୁହାଯାଇଛି ଯେ, ଇରାନର ଲୋକମାନଙ୍କୁ ପ୍ରତିଦିନ ୧୩୦ ଲିଟର ପାଣି ଦିଆଯିବ। ଯଦି ବ୍ୟକ୍ତି ଏହାଠାରୁ ଅଧିକ ପାଣି ବ୍ୟବହାର କରନ୍ତି, ତେବେ ତାଙ୍କୁ ଜରିମାନା ଦେବାକୁ ପଡିବ। ଦେଶର  ଜଳଭଣ୍ଡାର  ଶୁଖିଯିବା ଯୋଗୁ ଇରାନ ସରକାର ଏହି ନିଷ୍ପତ୍ତି ନେଇଛନ୍ତି।

ବିବିସି ପର୍ସିଆନ୍ ଅନୁଯାୟୀ, ଇରାନ ସରକାର ଜଳ ସଙ୍କଟକୁ ଉଲ୍ଲେଖ କରି ସମସ୍ତଙ୍କୁ ପାଣି ସଞ୍ଚୟ କରିବାକୁ ଅନୁରୋଧ କରିଛନ୍ତି। ଇରାନର ଶକ୍ତି ମନ୍ତ୍ରୀ ଆବାସ ଆଲିଆବାଦି କହିଛନ୍ତି ଯେ, ବେଆଇନ ଭାବରେ ପାଣି ବ୍ୟବହାର କରୁଥିବା ଲୋକଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ।

ଇରାନର ଶକ୍ତି ମନ୍ତ୍ରଣାଳୟ ଅନୁଯାୟୀ, ଦେଶର ୯୦ ପ୍ରତିଶତ ଜଳ ଭଣ୍ଡାର ଶୁଖିଗଲାଣି। ଗତ ୫ ବର୍ଷ ଧରି ଇରାନରେ ମରୁଡ଼ିର ପ୍ରଭାବ ଦେଖାଯାଉଛି। ମନ୍ତ୍ରଣାଳୟ କହିଛି ଯେ, ତେହେରାନ, ଇସଫାହାନ, ରଜାଭି ଖୋରାସନ ଏବଂ ୟାଜଦ ଭଳି ପ୍ରମୁଖ ପ୍ରଦେଶରେ ଜଳ ସଙ୍କଟ ଗୁରୁତର ହୋଇପଡ଼ିଛି ଏବଂ ରାଜଧାନୀ ତେହେରାନକୁ ପାଣି ଯୋଗାଣ କରୁଥିବା କାରାଜ ଜଳଭଣ୍ଡାରଏବେ କେବଳ ୬ ପ୍ରତିଶତ କ୍ଷମତାରେ କାମ କରୁଛି।

ଜଳ ସଙ୍କଟର ଏକ ପ୍ରମୁଖ କାରଣ ହେଉଛି ଇରାନର ଆତ୍ମନିର୍ଭରଶୀଳ କୃଷି ବ୍ୟବସ୍ଥା। ଏହି କାରଣରୁ ଚାଷ କାର୍ଯ୍ୟରେ ପ୍ରଚୁର ପାଣି ଖର୍ଚ୍ଚ ହୋଇଥାଏ। ଅନ୍ୟପକ୍ଷରେ, ଇରାନର ଜନସଂଖ୍ୟା ନିରନ୍ତର ବୃଦ୍ଧି ପାଉଛି। ସମୟାନୁସାରେ ବର୍ଷା ଅଭାବରୁ ଇରାନରେ ଜଳ ସଙ୍କଟ ବଢ଼ିବାରେ ଲାଗିଛି।

ଅଧିକ ପଢ଼ନ୍ତୁ: ୧୭ ଜୁଲାଇରେ ଦିଲ୍ଲୀ ପାର୍କରେ ଜଗଦୀପ ଧନଖଡ଼ଙ୍କ ସହ କ’ଣ ଘଟିଥିଲା, ଯାହାପରେ ସେ ନେଇଥିଲେ ଇସ୍ତଫା ନିଷ୍ପତ୍ତି...

ଇରାନ ସରକାରଙ୍କ ଅନୁଯାୟୀ, ଜଳ ସଙ୍କଟ ଯୋଗୁ ଉର୍ମିଆ ହ୍ରଦର ଆୟତନ ୧୦୦୦ ବର୍ଗ କିଲୋମିଟରରୁ କମ୍ ହୋଇଯାଇଛି। ଗୋଟିଏ ସମୟରେ, ଏହି ହ୍ରଦକୁ ମଧ୍ୟପ୍ରାଚ୍ୟର ସବୁଠାରୁ ବଡ଼ ଲୁଣିଆ ହ୍ରଦ ଭାବରେ ବିବେଚନା କରାଯାଉଥିଲା।

ଇରାନ ସରକାର କହିଛନ୍ତି ଯେ, ପୂର୍ବରୁ ତେହେରାନର ଡ୍ୟାମ୍‌ରୁ ୬୦ ପ୍ରତିଶତ ଜଳ ଯୋଗାଣ କରାଯାଉଥିଲା। ଏବେ ଏହା ୪୦ ପ୍ରତିଶତକୁ ହ୍ରାସ ପାଇଛି।  ଯାହା ଯୋଗୁ ପାଣି ଉପରେ ପ୍ରତିବନ୍ଧକ ଲଗାଯାଇଛି।  ତେବେ ବିଶେଷଜ୍ଞମାନେ ସରକାରଙ୍କ ଏହି ନିଷ୍ପତ୍ତିକୁ ବିରୋଧ କରିଛନ୍ତି।

ତେହେରାନ ବିଶ୍ୱବିଦ୍ୟାଳୟର ଜଳସମ୍ପଦ ବିଭାଗର ପ୍ରଫେସର ବାନାଫସେ ଜାହରାଇଙ୍କ ଅନୁସାରେ, ଇରାନର ରାଜଧାନୀରେ ଜଣେ ବ୍ୟକ୍ତିଙ୍କୁ ଅତି କମରେ ୧୯୦ ଲିଟର ପାଣି ଆବଶ୍ୟକ। ସରକାର ୧୩୦ ଲିଟର ପାଣିର ମାନଦଣ୍ଡ ସ୍ଥିର କରିଛନ୍ତି। ଏହା କିପରି ସମ୍ଭବ ହେବ । 

ଅଧିକ ପଢ଼ନ୍ତୁ: ଭୋଟରଙ୍କ ପାଇଁ ସୁବିଧା: ରାଜ୍ୟରେ ସୃଷ୍ଟି ହେବ ଆଉ ୬୩୫୮ ବୁଥ୍‌

iran | water crisis