ଦୁବାଇ : ମଧ୍ୟପ୍ରାଚ୍ୟରେ ଇରାନ ଓ ଆମେରିକା ମଧ୍ୟରେ ଉତ୍ତେଜନା ବଢିଚାଲିଥିବା ମଧ୍ୟରେ ୟୁକ୍ରେନର ଏକ ଯାତ୍ରୀବାହୀ ବିମାନ ତେହେରାନଠାରେ ଦୁର୍ଘଟଣାଗ୍ରସ୍ତ ହୋଇଛି । ବିମାନଟି ଆକାଶରେ ଜଳିଯିବାରୁ ଏଥିରେ ଥିବା ୧୬୭ ଜଣ ଯାତ୍ରୀ ନିହତ ହୋଇଛନ୍ତି । ତେବେ ଏହି ଦୁର୍ଘଟଣାକୁ ନେଇ ସଂଦେହ ବଢିବାରେ ଲାଗିଛି ।
Sambad is now on WhatsApp
Join and get latest news updates delivered to you via WhatsApp
ଯାନ୍ତ୍ରିକ ତ୍ରୁଟି କାରଣରୁ ଏହି ବିମାନ ଦୁର୍ଘଟଣାଗ୍ରସ୍ତ ହୋଇଥିବା କୁହାଯାଉଥିବା ବେଳେ ପ୍ରକୃତ ସତ ଅଲଗା ବୋଲି ସଂଦେହ କରାଯାଉଛି । ଇରାନ ଦ୍ୱାରା ଆମେରିକା ସେନାଘାଟୀ ଉପରେ ଆକ୍ରମଣ କରାଯିବାର କିଛି ଘଣ୍ଟା ମଧ୍ୟରେ ଏହି ଦୁର୍ଘଟଣା ହୋଇଥିବାରୁ ସଂଦେହ ବଢିଯାଇଛି ।
ଏହା ଏକ ଦୁର୍ଘଟଣା ନୁହେଁ ବୋଲି ଆରବର କେତେକ ଗଣମାଧ୍ୟମ ରିପୋର୍ଟ ପ୍ରକାଶ କରିଛନ୍ତି । ଜୋର୍ଡାନର ଲୋକପ୍ରିୟ ନ୍ୟୁଜ ପୋର୍ଟାଲ ଅଲ ହଦିଥ୍ କହିଛି ଯେ ଇରାନର ଏୟାର ଡିଫେନ୍ସ ବାହିନୀ ଦ୍ୱାରା ଭୁଲରେ ଶତ୍ରୁପକ୍ଷର ବିମାନଭାବି ଏହା ବିମାନକୁ ଖସାଇଦିଆଯାଇଥିଲା । ତେବେ ଉଭୟ ଇରାନ ଓ ୟୁକ୍ରେନ ପକ୍ଷରୁ ଏହି ଖବରକୁ ଏପର୍ଯ୍ୟନ୍ତ ସ୍ୱୀକାର କରାଯାଇନାହିଁ । ଆହୁରି ମଧ୍ୟ ଜଣାଯାଇଛି ଯେ ଗତ ୬ ତାରିଖରେ ଏହି ବିମାନର ନିୟମିତ ବୈଷୟିକ ଯାଞ୍ଚ ହୋଇଥିଲା, ଯେଉଁଥିରେ ଏହି ବିମାନରେ କୌଣସି ତ୍ରୁଟି ନଥିବା ଜଣାପଡ଼ିଥିଲା ।
ସୂଚନାଯୋଗ୍ୟ ଯେ ବୁଧବାର ଦିନ ଭୋର ସମୟରେ ଇରାନ ପକ୍ଷରୁ ଇରାକରେ ଥିବା ଆମେରିକୀୟ ସେନା ଘାଟି ଉପରେ ମିସାଇଲ ମାଡ଼ କରାଯାଇଛି । ଏଥିରେ ୮୦ ଜଣ ଆମେରିକୀୟ ସୈନିକ ନିହତ ହୋଇଛନ୍ତି ବୋଲି ଇରାନ ଦାବି କରୁଥିବାବେଳେ ଆମେରିକା ଏହାକୁ ଅସ୍ୱୀକାର କରିଛି ।