ତେହେରାନ : ଇରାନରେ କରୋନା ଭାଇରସ ଚିନ୍ତାଜନକ ବେଗରେ ବଢିଚାଲିଛି । ଏହି ପଶ୍ଚିମ-ଏସୀୟ ଦେଶରେ ମୃତ୍ୟୁସଂଖ୍ୟା ୭୭ ରେ ପହଞ୍ଚିଥିବାବେଳେ ୨୩୩୬ ଜଣ ସଂକ୍ରମିତ ହୋଇଛନ୍ତି । ତେବେ ଇରାନର ଏହି ସଂକଟ କିଛି ଲୋକଙ୍କ ପାଇଁ ଖୁସିଖବର ଆଣିଦେଇଛି । ଇରାନର ବିଭିନ୍ନ ଜେଲରେ ଥିବା ହଜାର ହଜାର ବନ୍ଦୀମାନଙ୍କ ପାଇଁ କରୋନା ଭାଇରସ କିଛିଟା ଆନନ୍ଦ ଆଣିଦେଇଛି । କାରଣ ଇରାନ ସରକାର ସେମାନଙ୍କୁ ସାମୟିକ ଭାବେ ମୁକ୍ତ କରିବାକୁ ନିଷ୍ପତ୍ତି ନେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ବିବିସିର ରିପୋର୍ଟ ଅନୁସାରେ ଇରାନର ବିଚାରବିଭାଗ ଦେଶର ବିଭିନ୍ନ ଜେଲରେ ବନ୍ଦୀ ଥିବା ୫୪ ହଜାର ଲୋକଙ୍କୁ ପ୍ୟାରୋଲ ଦେଇ ସାମୟିକଭାବେ ମୁକ୍ତ କରିଛନ୍ତି । ସେମାନଙ୍କୁ ମୁକ୍ତ କରିବା ପୂର୍ବରୁ ସେମାନଙ୍କ ରକ୍ତ ପରୀକ୍ଷା କରାଯାଇଥିଲା । ଏଥିରେ ସେମାନେ ସଂକ୍ରମିତ ହୋଇନଥିବା ଜଣାପଡ଼ିଛି ।
କରୋନା ଭାଇରସ ସ୍ଥିତିରେ ଉନ୍ନତି ଆସିବା ପରେ ସେମାନଙ୍କୁ ପୁଣି ଜେଲକୁ ଫେରିବାକୁ ହେବ । ତେବେ ଏହି ସୁବିଧା କେବଳ ୫ ବର୍ଷରୁ କମ ଅବଧିର କାରାଦଣ୍ଡ ଭୋଗୁଥିବା ଲୋକମାନଙ୍କ ପାଇଁ ଲାଗୁ ହୋଇଛି । ୫ ବର୍ଷରୁ ଅଧିକ ସମୟର କାରାଦାଣ୍ଡ ଭୋଗୁଥିବା କଏଦୀମାନେ ପୂର୍ବବତ୍ ଜେଲରେ ରହିବେ । ଇରାନ ଜେଲରେ ବନ୍ଦୀ ଥିବା ବ୍ରିଟିଶ-ଇରାନୀ ସମାଜସେବୀ ନାଜାନିନ ରେଟକ୍ଲିଫଙ୍କୁ ମଧ୍ୟ ଆସନ୍ତା କାଲି ଖଲାସ କରାଯିବ ।