ପାକିସ୍ତାନକୁ ଇରାନର କଡ଼ା ଚେତାବନୀ

ତେହେରାନ : ଇରାନ ଏବଂ ଇସ୍ରାଏଲ ମଧ୍ୟରେ ଚାଲିଥିବା ଉତ୍ତେଜନା ମଧ୍ୟରେ, ଇରାନ ପରୋକ୍ଷରେ ପାକିସ୍ତାନକୁ ଚେତାବନୀ ଦେଇଛି। ନୂଆଦିଲ୍ଲୀରେ ଇରାନ ଦୂତାବାସର ଡେପୁଟି ମିଶନ ମୁଖ୍ୟ ଜାଭେଦ ହୁସେନି ଶୁକ୍ରବାର କହିଛନ୍ତି ଯେ ଯଦି କୌଣସି ତୃତୀୟ ପକ୍ଷ ଏହି ସଂଘର୍ଷରେ ସାମିଲ ହୁଏ, ତେବେ ତାକୁ ଗମ୍ଭୀର ପରିଣାମ ଭୋଗିବାକୁ ପଡିବ।

ହ୍ୱାଇଟ୍ ହାଉସରେ ଡୋନାଲ୍ଡ ଟ୍ରମ୍ପଙ୍କ ସହ ପାକିସ୍ତାନ ସେନା ମୁଖ୍ୟ ଜେନେରାଲ ଅସୀମ ମୁନିରଙ୍କ ସାକ୍ଷାତ ଉପରେ ତାଙ୍କୁ ପ୍ରଶ୍ନ କରାଯିବା ସମୟରେ ଏହି ବିବୃତ୍ତି ଆସିଥିଲା। ହୁସେନି କହିଥିଲେ, "ଆମେ ଚେତାବନୀ ଦେଉଛୁ ଯେ ଯଦି କୌଣସି ତୃତୀୟ ପକ୍ଷ ଏହି ଯୁଦ୍ଧରେ ସାମିଲ ହୁଏ, ତେବେ ଏହାର ଗମ୍ଭୀର ପରିଣାମ ହେବ।"

ଇରାନୀ ଅଧିକାରୀମାନେ ସ୍ପଷ୍ଟ କରିଛନ୍ତି ଯେ ସେମାନେ ଅସୀମ ମୁନିରଙ୍କ ସାମ୍ପ୍ରତିକ ଆମେରିକା ଗସ୍ତକୁ ଲକ୍ଷ୍ୟ କରିଛନ୍ତି। କିଛି ସପ୍ତାହ ପୂର୍ବରୁ ସେ ଇରାନ ଗସ୍ତ କରିଥିଲେ ଏବଂ ସର୍ବୋଚ୍ଚ ନେତା ଆୟାତୋଲ୍ଲା ଖାମେନିଙ୍କୁ ଭେଟିଥିଲେ ଏବଂ ଏବେ ସେ ଡୋନାଲ୍ଡ ଟ୍ରମ୍ପଙ୍କୁ ମଧ୍ୟ ଭେଟିଛନ୍ତି। ସୋସିଆଲ ମିଡିଆରେ ପ୍ରଶ୍ନ ଉଠାଯାଉଛି ଯେ ଇରାନର ପଡ଼ୋଶୀ ପାକିସ୍ତାନ ପ୍ରକୃତରେ କେଉଁ ପକ୍ଷରେ ଠିଆ ହୋଇଛି - ତେହେରାନ ନା ୱାଶିଂଟନ?
ଭାରତ ସହ କୌଣସି ମନୋମାଳିନ୍ୟ ନାହିଁ ବୋଲି ପ୍ରକାଶ କରି ସେ କହିଛନ୍ତି ଯେ "ତେହେରାନ ଭବିଷ୍ୟତରେ ଭାରତଠାରୁ ଉତ୍ତମ ବୁଝାମଣା ଏବଂ ସହଯୋଗ ଆଶା କରେ।"