ହମାସ ଆକ୍ରମଣ ପଛରେ ଇରାନର ହାତ : ଲେବାନନ୍ ରାଜଧାନୀରେ ହୋଇଥିଲା ଯୁଦ୍ଧ ଯୋଜନା

ୱାସିଂଟନ: ଇସ୍ରାଏଲ ଉପରେ ହମାସର ଅଭୂତପୂର୍ବ ଆକ୍ରମଣ ଯୋଜନା ପଛରେ ଇରାନର ହାତ ରହିଛି। ଗତ ସପ୍ତାହରେ ଲେବାନନର ରାଜଧାନୀ ବେରୁତରେ ଏକ ବୈଠକରେ ଆକ୍ରମଣ ପାଇଁ ହମାସକୁ ଅନୁମତି ମିଳିଥିଲା ବୋଲି ହମାସ ଏବଂ ଇରାନ ସମର୍ଥିତ ଅନ୍ୟ ଏକ ଗୋଷ୍ଠୀ ହେଜବୁଲ୍ଲାର ବରିଷ୍ଠ ସଦସ୍ୟମାନେ ୱାଲ୍ ଷ୍ଟ୍ରିଟ୍ ଜର୍ଣ୍ଣାଲକୁ କହିଛନ୍ତି।

ଇରାନର ସବୁଠାରୁ ଶକ୍ତିଶାଳୀ ସେନା ଇସ୍ଲାମିକ ରିଭଲ୍ୟୁସନରି ଗାର୍ଡ କର୍ପସ (ଆଇଆର୍‌ଜିସି)ର ଅଧିକାରୀମାନେ ଗତ ଅଗଷ୍ଟ ମାସରୁ ହମାସ ସହ ମିଶି ସ୍ଥଳ, ଆକାଶ ଓ ସମୁଦ୍ର ପଥରେ ଇସ୍ରାଏଲ ଉପରେ ବହୁମୁଖୀ ଆକ୍ରମଣ କରିବା ପାଇଁ କାର୍ଯ୍ୟ କରୁଛନ୍ତି। ବେରୁତ ବୈଠକରେ ଇସ୍ରାଏଲ ଆକ୍ରମଣ ଉପରେ ଆଲୋଚନା ହୋଇଥିଲା ଯେଉଁଥିରେ ଆଇଆର୍‌ଜିସି ଅଧିକାରୀ ଏବଂ ହମାସ ଓ ହେଜବୁଲ୍ଲା ସମେତ ଇରାନ ସମର୍ଥିତ ଚାରିଟି ଆତଙ୍କବାଦୀ ସଂଗଠନର ପ୍ରତିନିଧି ଯୋଗ ଦେଇଥିଲେ। ରିପୋର୍ଟ ଅନୁଯାୟୀ, ହମାସ୍ ଗାଜା ଉପତ୍ୟକାକୁ ନିୟନ୍ତ୍ରଣ କରୁଥିବା ବେଳେ ହେଜବୁଲ୍ଲା ଲେବାନନର ଏକ ଶିଆ ଆତଙ୍କବାଦୀ ଓ ରାଜନୈତିକ ଗୋଷ୍ଠୀ। ହମାସ ଓ ହେଜବୁଲ୍ଲା ସଦସ୍ୟଙ୍କ କହିବାନୁସାରେ, ଇରାନର ବୈଦେଶିକ ମନ୍ତ୍ରୀ ହୁସେନ ଅମିର-ଅବ୍ଦୋଲାହିଆନ ଅଗଷ୍ଟ ମାସରୁ ଅତି କମ୍‌ରେ ଦୁଇଟି ବୈଠକରେ ଯୋଗ ଦେଇଛନ୍ତି।

ସାଉଦି ଆରବ-ଇସ୍ରାଏଲ ସମ୍ପର୍କକୁ ସ୍ୱାଭାବିକ କରିବା ପାଇଁ ଆମେରିକା ମଧ୍ୟସ୍ଥତାରେ ହୋଇଥିବା ଆଲୋଚନାରେ ବାଧା ସୃଷ୍ଟି କରିବା ଉଦ୍ଦେଶ୍ୟରେ ମଧ୍ୟ ଏହି ଆକ୍ରମଣ କରାଯାଇଥିଲା, ଯାହାକୁ ଇରାନ ଏକ ଧମକ ଭାବରେ ଦେଖୁଛି ବୋଲି କୁହାଯାଉଛି। ତେବେ ହମାସର ଜଣେ ବରିଷ୍ଠ ଅଧିକାରୀ ମହମ୍ମଦ ମିର୍ଦାୱିଙ୍କୁ ବେରୁତରେ ଇରାନ ସହ ହୋଇଥିବା ବୈଠକ ସମ୍ପର୍କରେ ପଚରାଯିବାରୁ ସେ ଏହାକୁ ପାଲେଷ୍ଟାଇନ୍ ଓ ହମାସର ନିଷ୍ପତ୍ତି ବୋଲି କହିଥିଲେ। ମିଳିତ ଜାତିସଂଘରେ ଇରାନ ମିସନର ଜଣେ ମୁଖପାତ୍ର କହିଛନ୍ତି ଯେ ଗାଜାରେ ହମାସର କାର୍ଯ୍ୟାନୁଷ୍ଠାନକୁ ତାଙ୍କ ଦେଶ ସମର୍ଥନ କରୁଛି, କିନ୍ତୁ ଏଥିପାଇଁ ତେହେରାନ ସେମାନଙ୍କୁ ନିର୍ଦ୍ଦେଶ ଦେଇନାହିଁ।