ଏଣିକି ଖାଦ୍ୟ ପ୍ରସ୍ତୁତି ବେଳର ଭିଡିଓ ଦେଖି ପାରିବେ ରେଳ ଯାତ୍ରୀ, ଆଇଆର୍ସିଟିସି ସାଇଟରେ ହେବ ଲାଇଭ୍
ନୂଆଦିଲ୍ଲୀ : କିଛି ଦିନ ତଳେ ଟ୍ରେନରେ ଯାତ୍ରୀମାନଙ୍କୁ ଦିଆ ଯାଉଥିବା ଚା’କୁ ନେଇ ଏକ ବଡ଼ ଖୁଲାସା ହୋଇଥିଲା । ଶୌଚାଳୟର ପାଣି ବ୍ୟବହାର କରି ଯାତ୍ରୀମାନଙ୍କୁ ଚା’ ତିଆରି କରି ଦିଆ ଯାଉଛି ବୋଲି ଏକ ଭିଡ଼ିଓ ଭାଇରାଲ ହୋଇଥିଲା । ଏହି ଭିଡ଼ିଓ ଦେଖିବା ହେବା ପରେ ଯାତ୍ରୀମାନଙ୍କର ରେଳବାଇ ଉପରେ ଥିବା ଭରସା କମ ହେବାରେ ଲାଗିଥିଲା । ପୁଣି ଥରେ ଯାତ୍ରୀମାନଙ୍କ ଭରସା ଫେରି ପାଇବା ପାଇଁ ଆଇଆର୍ସିଟିସି ତରଫରୁ ଯାତ୍ରୀମାନଙ୍କ ପାଇଁ ରନ୍ଧା ଯାଉଥିବା ଖାଦ୍ୟର ଲାଇଭ୍ ଭିଡ଼ିଓ ପ୍ରସାରଣ କରାଯିବ ବୋଲି ରେଳମନ୍ତ୍ରୀ ପୀୟୁଷ ଗୋଏଲ ମଙ୍ଗଳବାର ଘୋଷଣା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଯାତ୍ରୀମାନେ ଟ୍ରେନରେ ଯାତ୍ରା କରିବା ସମୟରେ ତାଙ୍କ ପାଇଁ ରନ୍ଧା ଯାଉଥିବା ଖାଦ୍ୟର ଲାଇଭ ଭିଡ଼ିଓ ଦେଖି ପାରିବେ ବୋଲି ଜଣାପଡ଼ିଛି । ଏଥି ପାଇଁ ସେମାନେ ଆଇଆରସିଟିସି ସାଇଟ୍କୁ ଯାଇ ଖାଦ୍ୟ ଠିକ୍ ଭାବରେ ତିଆରି କରାଯାଉଛି କି ନାହିଁ ଦେଖି ପାରିବେ । ଟ୍ରେନରେ ଯାତ୍ରୀମାନଙ୍କ ସୁରକ୍ଷା ଏବଂ ସେମାନଙ୍କ ପାଇଁ ଥିବା ସୁବିଧାରେ ସୁଧାର ଆଣିବା ପାଇଁ ଏହି ଅଭିଯାନ ଆରମ୍ଭ କରାଯାଇଛି ବୋଲି ଗୋଏଲ କହିଛନ୍ତି । ଆଇଆରସିଟିସି ଦ୍ୱାରା ପରିଚାଳିତ ୨୦୦ଟି ରୋଷେଇ ଘର ମଧ୍ୟରୁ ଏ ପର୍ଯ୍ୟନ୍ତ ୧୬ଟି ରୋଷେଇ ଘରେ କ୍ୟାମେରା ଲାଗି ସାରିଛି । ଦିଲ୍ଲୀ,ମୁମ୍ବାଇ ଏବଂ ଭୁବନେଶ୍ୱରରେ ଥିବା ରେଳ ଷ୍ଟେସନର ରୋଷେଇ ଘରେ କ୍ୟାମେରା ଲଗା ଯାଇ ସାରିଥିବା ଜଣାପଡ଼ିଛି । ଯଦି ରୋଷେଇ କରିବା ସମୟରେ ରୋଷେୟା ନିଜର ୟୁନିଫର୍ମ ନ ପିନ୍ଧିଥିବେ ତେବେ ତାହା ଆପେ ଆପେ ଟ୍ରାକ୍ ହେବା ସହ କଣ୍ଟ୍ରାକ୍ଟରଙ୍କ ପାଖକୁ ରିପୋର୍ଟ ଚାଲିଯିବ ।