ଚଣ୍ଡିଗଡ଼ : ଫେରାର ଖଲିସ୍ତାନ ସମର୍ଥକ ଅମୃତପାଲ ସିଂ ପଞ୍ଜାବର ମୋଗା ଜିଲ୍ଲାରେ ଲୁଚି ରହିଥିବା ଅନୁମାନ କରାଯାଉଛି । ସେ ଲୁଚି ରହିଥିବା ନେଇ ପୁଲିସକୁ ସୂତ୍ରରୁ ସୂଚନା ମିଳିଛି। ଏହାପରେ ମୋଗାରେ ପୁଲିସର ସର୍ଚ୍ଚ ଅପରେସନ ଆରମ୍ଭ ହୋଇଛି ଓ ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି । ଜିଲ୍ଲାର ବିଭିନ୍ନ ଯାନବାହନ ଯାଞ୍ଚ କରାଯାଉଛି। ପୁଲିସ ଘଟଣାସ୍ଥଳରେ ଖୋଜାଖୋଜି ଜାରି ରଖିଛି। ସେପଟେ ଅମୃତପାଲର ଘରେ ଚଢ଼ାଉ କରି ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଛି। ପୁଲିସ ୫ଟି ଗାଡ଼ି, ୱାକି ଟକି ଓ ବୁଲେଟ୍ ପ୍ରୁଫ୍ ଜ୍ୟାକେଟ୍ ଜବତ କରିଛି। ବର୍ତ୍ତମାନ ସୁଦ୍ଧା ଅମୃତପାଲର ମୋଟ ୧୫୪ ଜଣ ସହଯୋଗୀଙ୍କୁ ଗିରଫ କରାଯାଇଛି ।
Sambad is now on WhatsApp
Join and get latest news updates delivered to you via WhatsApp
ସେପଟେ ଜଳନ୍ଧର ଏସଏସପି ସ୍ୱର୍ଣ୍ଣଦୀପ ସିଂ କହିଛନ୍ତି ଯେ ଅମୃତପାଲ ସିଂ ଯେଉଁ ବଜାଜ ପ୍ଲାଟିନା ବାଇକରେ ଫେରାର ହୋଇଯାଇଥିଲା ତାହାକୁ ଜବତ କରାଯାଇଛି । ଜଳନ୍ଧର ସହରଠାରୁ ୪୫ କିଲୋମିଟର ଦୂର ଦାରାପୁର ଅଞ୍ଚଳର କେନାଲ କୂଳରୁ ଜଳନ୍ଧର ପୁଲିସ ପରିତ୍ୟକ୍ତ ଅବସ୍ଥାରେ ଏହି ବାଇକ୍ ଜବତ କରିଛି । ହୋସିଆରପୁରରୁ ଏକ ବ୍ରିଜା କାର୍ ଜବତ କରାଯାଇଛି। ଅମୃତପାଲଙ୍କୁ ଖସିଯିବାରେ ସାହାଯ୍ୟ କରିଥିବା ୪ ଜଣଙ୍କୁ ମଧ୍ୟ ପୁଲିସ ଗିରଫ କରିଛି ।
ବୁଧବାର ଦିନ ପୋଲିସର ଏକ ଟିମ୍ ଅମୃତସରସ୍ଥିତ ଅମୃତପାଲ ଘରେ ପହଞ୍ଚି ପରିବାର ଲୋକଙ୍କୁ ପଚରାଉଚରା କରିଥିଲା। ଏବେ ଅମୃତପାଲଙ୍କ ପରିବାରର ବ୍ୟାଙ୍କ ଆକାଉଣ୍ଟ ଉପରେ ପୁଲିସ ନଜର ରଖିଛି ।