ଲଖନଉ: ବିହାରରେ ଲୋକ ଜନଶକ୍ତି ପାର୍ଟିର ନେତୃତ୍ୱକୁ ନେଇ କକେଇ-ପୁତୁରା (ପଶୁପତି ପାରସ ଏବଂ ଚିରାଗ ପାସୱାନ) ଙ୍କ ମଧ୍ୟରେ ବିବାଦ ଜାରି ରହିଛି। ଅନ୍ୟପଟେ କିନ୍ତୁ ପୂର୍ବରୁ ପରସ୍ପରର ଶତ୍ରୁ ଥିବା କକେଇ-ପୁତୁରା( ଶିବପାଲ ଯାଦବ ଓ ଅଖିଳେଶ ଯାଦବ)ଙ୍କ ମଧ୍ୟରେ ଥିବା ଦୂରତା ଶେଷ ହେଉଛି ବୋଲି କଳ୍ପନାଜଳ୍ପନା ପ୍ରକାଶ ପାଉଛି | କାରଣ ଏବେ ଏମିତି ଏକ ଫଟୋ ସାମ୍ନାକୁ ଆସିଛି ଯେଉଁଥିରେ ଯାଦବ ପରିବାରର ସମସ୍ତ ସଦସ୍ୟ ଏକାଠି ନଜର ଆସିଛନ୍ତି | ସୂଚନା ଥାଉ କି ମୁଲାୟମ ସିଂ ଯାଦବଙ୍କ ନାତୁଣୀ ଦୀପାଲି ଯାଦବଙ୍କ ବିବାହ ହୋଇଥିଲା। ଏହି ବିବାହ ଯାଦବ ବଂଶରେ ଥିବା ଭିନ୍ନତା ସତ୍ତ୍ୱେ ସମସ୍ତଙ୍କୁ ଏକାଠି ହେବାକୁ ସୁଯୋଗ ଦେଇଛି |

Advertisment

ମୁଲାୟମଙ୍କ ନାତି ତଥା ପୂର୍ବତନ ସାଂସଦ ତେଜ ପ୍ରତାପ ଯାଦବଙ୍କ ଭଉଣୀ ଦୀପାଲି ଯାଦବଙ୍କ ବାହାଘରରେ ମୁଲାୟମ ସିଂ ଯାଦବ, ସମାଜବାଦୀ ପାର୍ଟି ଅଧ୍ୟକ୍ଷ ଅଖିଳେଶ ଯାଦବ ଏବଂ ସମାଜବାଦୀ ପାର୍ଟି ନେତା ଶିବପାଲ ଯାଦବ ଏକାଠି ଯୋଗ ଦେଇଥିଲେ | ଦୀପାଲି ଯାଦବ ହେଉଛନ୍ତି ମୁଲାୟମ ସିଂ ଯାଦବଙ୍କ ଜ୍ୱାଇଁ ରଣଭୀର ସିଂ ଯାଦବଙ୍କ ଝିଅ । ଏହି ବିବାହ ସମାରୋହରେ ପରିବାରର ଏକତା ଦେଖିବାକୁ ମିଳିଥିଲା ​​| ଏହା ପରେ କଳ୍ପନାଜଳ୍ପନା କରାଯାଉଛି ଯେ ପୁଣି ଥରେ ମୁଲାୟମ ବଂଶ ଏକାଠି ହୋଇପାରନ୍ତି |

ଯଦି ଏହା ଘଟେ, ତେବେ ଉତ୍ତରପ୍ରଦେଶର ୨୦୨୨ ବିଧାନସଭା ନିର୍ବାଚନ ପାଇଁ ଏହା ଗୁରୁତ୍ୱପୂର୍ଣ୍ଣ ହେବ | ପରିବାରର ସୂତ୍ର ଅନୁଯାୟୀ, କରୋନାଭାଇରସ୍ ମହାମାରୀ ଯୋଗୁଁ କେବଳ ପରିବାର ସଦସ୍ୟ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ। ଏହି ଉତ୍ସବରେ ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ଦୁଇ ପୁଅ ତେଜସ୍ୱୀ ଯାଦବ ଏବଂ ତେଜ ପ୍ରତାପ ଯାଦବ ମଧ୍ୟ ଯୋଗ ଦେଇଛନ୍ତି।