ନବୀନ ଓ ମମତାଙ୍କ ଫର୍ମୁଲା ପ୍ରିୟଙ୍କା ଗାନ୍ଧୀଙ୍କୁ ସଫଳତା ଦେବ କି?
ନୂଆଦିଲ୍ଲୀ: ଉତ୍ତରପ୍ରଦେଶରେ କଂଗ୍ରେସ ଦଳର କମାଣ୍ଡର ଭୂମିକାରେ ଏବେ ପ୍ରିୟଙ୍କା ଗାନ୍ଧୀ ଅଛନ୍ତି | ବିଧାନସଭା ନିର୍ବାଚନରେ ରଣନୀତି ପ୍ରସ୍ତୁତ ହେଉ କି ପ୍ରାର୍ଥୀ ତାଲିକା ପ୍ରସ୍ତୁତ କରିବା ହେଉ ଏବେ ପ୍ରିୟଙ୍କା ଏସବୁ କଥା ବୁଝୁଛନ୍ତି | ଉତ୍ତରପ୍ରଦେଶ ବିଧାନସଭା ନିର୍ବାଚନରେ କଂଗ୍ରେସ ଦଳ ଏକ ଶକ୍ତିଶାଳୀ ପ୍ରତିଦ୍ୱନ୍ଦ୍ୱୀ ନ ହେଲେ ବି କଂଗ୍ରେସର ରଣନୀତି ଉପରେ ଏବେ ସମସ୍ତେ ନଜର ରଖିଛନ୍ତି | କାରଣ ନିର୍ବାଚନ ଋତୁ ଆରମ୍ଭ ହେବା ସହିତ କଂଗ୍ରେସ ମହିଳାଙ୍କୁ ଅଧିକ ଫୋକସ କରିଛି | କାରଣ କଂଗ୍ରେସର ଇସ୍ତାହାରରେ ମହିଳାମାନଙ୍କର ଆତ୍ମନିର୍ଭରଶୀଳତା, ସ୍ୱାଭିମାନ, ଶିକ୍ଷା, ସମ୍ମାନ, ସ୍ୱାସ୍ଥ୍ୟ ସମ୍ବନ୍ଧୀୟ ଅନେକ ବଡ଼ ଘୋଷଣା କରାଯାଇଥିଲା |
Sambad is now on WhatsApp
Join and get latest news updates delivered to you via WhatsApp
ଏହା ସହିତ କଂଗ୍ରେସ ୟୁପି ବିଧାନସଭା ନିର୍ବାଚନରେ ମହିଳାମାନଙ୍କୁ ୪୦ ପ୍ରତିଶତ ଟିକେଟ୍ ଦେବାକୁ ପ୍ରତିଶ୍ରୁତି ଦେଇଥିଲା ଏବଂ ପ୍ରକାଶିତ ପ୍ରାର୍ଥୀଙ୍କ ପ୍ରଥମ ତାଲିକାରେ ୧୨୫ ଜଣ ପ୍ରାର୍ଥୀଙ୍କ ମଧ୍ୟରୁ ୫୦ ଜଣ ମହିଳା ପ୍ରାର୍ଥୀଙ୍କୁ ଟିକେଟ୍ ଦିଆଯାଇଥିଲା। ତେବେ ଏହାର ପ୍ରଭାବ କଣ ପଡୁଛି ତାହା ଦେଖିବାର କଥା | ଅବଶ୍ୟ ପ୍ରିୟଙ୍କା ଗାନ୍ଧୀଙ୍କ ପୂର୍ବରୁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ୪୦ ପ୍ରତିଶତ ମହିଳାଙ୍କୁ ଟିକେଟ ଦେଇ ବେଶ ସଫଳତା ପାଇଥିଲେ |
୨୦୧୯ ଲୋକସଭା ନିର୍ବାଚନରେ ମମତା ପଶ୍ଚିମବଙ୍ଗର ୪୨ଟି ଆସନ ମଧ୍ୟରୁ ୧୭ ଜଣ ମହିଳା ପ୍ରାର୍ଥୀଙ୍କୁ ଟିକେଟ ଦେଇଥିଲେ | ଏଥି ମଧ୍ୟରୁ ୯ ଜଣ ଜିତିଥିଲେ । ଅର୍ଥାତ୍ ବିଜେତାଙ୍କ ହାର ୫୦ ପ୍ରତିଶତରୁ ଅଧିକ ଥିଲା | ଅନ୍ୟପକ୍ଷରେ, ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଓଡ଼ିଶାର ୨୧ଟି ଲୋକସଭା ଆସନରୁ ୭ ଜଣ ମହିଳାଙ୍କୁ ଟିକେଟ୍ ଦେଇଥିଲେ ଓ ଏଥିରେ ୫ ଜଣ ମହିଳା ପ୍ରାର୍ଥୀ ଜିତିଥିଲେ | ଆଉ ଏହି ଦୁଇ ଦଳର ପରୀକ୍ଷଣ ବହୁ ପରିମାଣରେ ସଫଳ ହୋଇଥିଲା | ତେବେ ପ୍ରିୟଙ୍କା କେତେ ସଫଳ ହେବେ ତାହା ତ ନିର୍ବାଚନ ଫଳାଫଳ ପରେ ଜଣାପଡିବ |