ପାକିସ୍ତାନର ସରକାରୀ ପ୍ରେସରେ ଛପା ହେଉଛି ନକଲି ଭାରତୀୟ ୨ ହଜାର ଟଙ୍କିଆ ନୋଟ୍ : ଦିଲ୍ଲୀ ପୁଲିସ ରିପୋର୍ଟ
ନୂଆଦିଲ୍ଲୀ : ମାତ୍ର ୩ ବର୍ଷ ତଳେ ଅର୍ଥାତ ୨୦୧୬ ମସିହାରେ ସରକାର ବିମୁଦ୍ରିକରଣ କରିବା ସହ ନୂଆ ୫୦୦ ଓ ୨ ହଜାର ଟଙ୍କିଆ ନୋଟ ବଜାରକୁ ଛାଡିଥିଲେ । ନକଲି ନୋଟ ର୍ୟାକେଟର ପର୍ଦ୍ଦାଫାଶ କରିବା ବିମୁଦ୍ରିକରଣର ଏକ ପ୍ରମୁଖ ଉଦ୍ଦେଶ୍ୟ ଥିଲା ବୋଲି ସରକାର ସେତେବେଳେ କହିଥିଲେ । ନୂଆ ନୋଟଗୁଡ଼ିକରେ କେତେକ ଏପରି ନିରାପତ୍ତା ବ୍ୟବସ୍ଥା ରହିଛି ଯଦ୍ୱାରା ସେଗୁଡ଼ିକର ନକଲ କରିବା ସମ୍ଭବ ନୁହେଁ ବୋଲି ସରକାର କହିଥିଲେ । କିନ୍ତୁ ଏବେ ଦିଲ୍ଲୀ ପୁଲିସ ଏପରି ଏକ ରିପୋର୍ଟ ଦେଇଛି ତାହାକୁ ଦେଖି ସରକାରଙ୍କ ନିଦ ହଜିଯାଇଛି ।
Sambad is now on WhatsApp
Join and get latest news updates delivered to you via WhatsApp
ଦେଶରେ ନକଲି ନୋଟ ପ୍ରଚଳନ ପଛରେ ସିଧାସଳଖ ପାକିସ୍ତାନୀ ସରକାରଙ୍କ ହାତ ଥିବା ଦିଲ୍ଲୀ ପୁଲିସର ସ୍ପେଶାଲ ସେଲ ଜାଣିବାକୁ ପାଇଛି । ସ୍ପେଶାଲ ସେଲ ପକ୍ଷରୁ କୁହାଯାଇଛି ୨ ହଜାର ଟଙ୍କିଆ ନୋଟରେ କେତେକ ସବୁଠାରୁ ଆଧୁନିକ ନିରାପତ୍ତା ବ୍ୟବସ୍ଥା ରହିଛି । ଫଳରେ ଏହାକୁ ନକଲ କରିବା ଏକରକମ ଅସମ୍ଭବ ଥିଲା । କିନ୍ତୁ ଜବତ ହୋଇଥିବା କେତେକ ନକଲି ୨ ହଜାର ଟଙ୍କିଆ ନୋଟରେ ସେସବୁ ନିରାପତ୍ତା ବ୍ୟବସ୍ଥାର ମଧ୍ୟ ନକଲ କରାଯାଇଛି । ୨ ହଜାର ଟଙ୍କିଆ ନୋଟରେ ପ୍ରଥମ ଥର ପାଇଁ ଅପଟିକାଲ ଭାରିଏବଲ ଇଙ୍କ୍ ( ରଂଗ ବଦଳୁଥିବା କାଳି)ର ବ୍ୟବହାର କରାଯାଇଥିଲା । ଏହି ନୋଟକୁ ସାମାନ୍ୟ ମୋଡିଲେ ତାହାର ରଂଗ ବଦଳିଯାଏ । ନକଲି ନୋଟରେ ମଧ୍ୟ ଠିକ ସେହି କାଳି ବ୍ୟବହାର କରାଯାଇଛି । ଏହି କାଳି ବେଶ ମହଙ୍ଗା ହୋଇଥିବାରୁ କୌଣସି ଦେଶର ସରକାରଙ୍କ ସହଯୋଗ ବିନା ତାହାର ବ୍ୟବହାର ସମ୍ଭବ ନୁହେଁ । ତଦନ୍ତରୁ ଜଣାପଡିଛି ଯେ କରାଚୀର ମାଲିର ହଲଟ ସ୍ଥିତ ପାକିସ୍ତାନ ସିକ୍ୟୁରିଟି ପ୍ରେସରେ ଭାରତୀୟ ନକଲି ଟଙ୍କା ଛପାଯାଉଛି । ଦାଉଦ ଇବ୍ରାହିମର ଡି-କମ୍ପାନି ଦ୍ୱାରା ଏସବୁ ନକଲି ନୋଟଗୁଡ଼ିକୁ ଭାରତରେ ପ୍ରଚଳନ କରାଯାଉଛି ବୋଲି ପୁଲିସ କହିଛି ।