ଯୁଦ୍ଧ ବିରତି ରାଜିନାମାରେ ସମ୍ମତ ହେଲେ ଇସ୍ରାଏଲ୍‌-ହମାସ୍‌; ୪ ଦିନରେ ମୁକ୍ତ ହେବେ ୫୦ ପଣବନ୍ଦୀ

ତେଲ୍‌ ଆଭିଭ୍‌: ଯୁଦ୍ଧ ବିରତି ପାଇଁ ଇସ୍ରାଏଲ୍‌ ଓ ହମାସ୍‌ ଆଜି ପ୍ରତ୍ୟୁଷରେ ଏକ ରାଜିନାମାରେ ଉପନୀତ ହୋଇଛନ୍ତି ଓ ଏହାକୁ ଇସ୍ରାଏଲ୍‌ର କ୍ୟାବିନେଟ୍‌ ମଞ୍ଜୁର କରିଥିବା କଥା ‘ଦି ଟାଇମ୍‌ସ୍‌ ଅଫ୍‌ ଇଜ୍ରାଏଲ୍‌’ ରିପୋର୍ଟ କରିଛି।

ରିପୋର୍ଟରେ ଉଲ୍ଲେଖ ଅଛି ଯେ, ଇସ୍ରାଏଲ୍‌ର ପ୍ରଧାନମନ୍ତ୍ରୀ ବେଞ୍ଜାମିନ୍‌ ନେତାନ୍ୟାହୁ ସରକାରଙ୍କ ସହିତ ବ୍ୟାପକ ଓ ଘନ ଘନ ବୈଠକ କରାଇ ଏହି ରାଜିନାମା ଚୂଡ଼ାନ୍ତ କରାଇଛନ୍ତି। ରାଜିନାମା ଅନୁଯାୟୀ ୪ ଦିନ ଯୁଦ୍ଧ ବା ଅସ୍ତ୍ରବିରତି କରାଯିବ ଓ ଏହି ସମୟରେ ହମାସ୍‌ ମୁଣ୍ଡଜାମିନ ବା ପଣବନ୍ଦୀ ରଖିଥିବା ୫୦ଜଣ ଇସ୍ରାଏଲୀ ନାଗରିକଙ୍କୁ ମୁକ୍ତ କରିବ।

Image Courtesy of Reuters

ଏହି ରାଜିନାମାକୁ ୩୮ଜଣ ଇସ୍ରାଏଲୀୟ ମନ୍ତ୍ରୀ ସମର୍ଥନ କରିଛନ୍ତି। କିନ୍ତୁ, ଏହି ରାଜିନାମା ବା ଚୁକ୍ତିକୁ ଚରମପନ୍ଥୀ ‘ଅଜ୍‌ମା ୟହଟିଡ୍‌’ ଓ ‘ରିଲିଜିୟସ୍‌ ଜିଓନିଜିମ୍‌’ ଦଳମାନେ ବିରୋଧ କରିଛନ୍ତି।

ସୂଚନାଯୋଗ୍ୟ ଆଉ କିଛି ସମୟ ପରେ ‘ପବ୍ଲିକ୍‌ ଡୋମେନ୍‌’ରେ ଏ ସଂକ୍ରାନ୍ତରେ ସବିଶେଷ ବିବରଣୀ ପ୍ରକାଶ କରାଯିବ। କିନ୍ତୁ, ଇସ୍ରାଏଲ୍‌ ସରକାର କହିଛନ୍ତି ଯେ, ପ୍ରତିଦିନ ୧୨ରୁ ୧୩ଜଣ ପଣବନ୍ଦୀଙ୍କୁ ହମାସ୍‌ ଗ୍ରୁପ୍‌ ମୁକ୍ତ କରିବ। ଫଳରେ ୱେଷ୍ଟ୍‌ ବ୍ୟାଙ୍କ୍‌ ଓ ପୂର୍ବ ଜେରୁଜେଲ୍‌ମର କିଛି ମହିଳା ଓ ନାବାଳକ କଏଦୀ ସ୍ବଦେଶ ପ୍ରତ୍ୟାବର୍ତ୍ତନ କରିବେ।

ଏହି ରାଜିନାମାକୁ ଇସ୍ରାଏଲ୍‌ର ନିରାପତ୍ତା ଏଜେନ୍‌ସି ‘ଆଇଡିଏଫ୍‌’, ‘ଶିନ୍‌ ବେଟ୍‌’ ଓ ‘ମୋସାଦ୍‌’ ସମର୍ଥନ କରିଛି ବ‌ୋଲି ‘ଦି ଇଜ୍ରାଏଲ୍‌ ଟାଇମ୍‌ସ୍‌’ ରିପୋର୍ଟ କରିଛି।

ଉଲ୍ଲେଖଯୋଗ୍ୟ, ଏହା ‌ହେବ ଅକ୍ଟୋବର ୭ ତାରିଖରୁ ଆରମ୍ଭ ହୋଇଥିବା ଇସ୍ରାଏଲ୍‌-ହମାସ୍‌ ଯୁଦ୍ଧରେ ପ୍ରଥମ ଅସ୍ତ୍ରବିରତି।