ଆଉ ଦୁଇ ଦିନ ବଢ଼ିଲା ଇସ୍ରାଏଲ-ହମାସ ଯୁଦ୍ଧବିରତି ଅବଧି

ତେଲଅଭିଭ: ଇସ୍ରାଏଲ ଏବଂ ହମାସ୍ ମଧ୍ୟରେ ଚାଲିଥିବା ଯୁଦ୍ଧକୁ ୪୫ ଦିନରୁ ଅଧିକ ସମୟ ବିତିଗଲାଣି | ଏହି ଯୁଦ୍ଧ ଯୋଗୁଁ ମୃତକଙ୍କ ସଂଖ୍ୟା ୧୫୦୦୦ ଅତିକ୍ରମ କରିଛି | ତେବେ ଆଜି ଇସ୍ରାଏଲ୍ ଏବଂ ହମାସ୍ ଆଉ ଦୁଇ ଦିନ ଯୁଦ୍ଧବିରତି କରିବାକୁ ରାଜି ହୋଇଛନ୍ତି | ଏହାପୂର୍ବରୁ ଶୁକ୍ରବାର ଠାରୁ ସୋମବାର ପର୍ଯ୍ୟନ୍ତ ଚାରି ଦିନିଆ ଅସ୍ତ୍ରବିରତି ଚୁକ୍ତି ହୋଇଥିଲା। ଯୁଦ୍ଧବିରତି ପାଇଁ କତର ଓ ଇଜିପ୍ଟ ମଧ୍ୟସ୍ଥତାରେ ହୋଇଥିବା ଚୁକ୍ତିକୁ ନେଇ ଜଣେ ଅଧିକାରୀ କହିଛନ୍ତି ଯେ ଯୁଦ୍ଧବିରତିକୁ ଆଉ ଦୁଇ ଦିନ ବୃଦ୍ଧି କରାଯାଇଛି | ମଙ୍ଗଳବାର ଏବଂ ବୁଧବାର ପର୍ଯ୍ୟନ୍ତ ଦୁଇ ଦିନିଆ ଯୁଦ୍ଧ ବିରତି ପରେ ହମାସ ୨୦ ଜଣ ବନ୍ଧକଙ୍କୁ ମୁକ୍ତ କରିବ | ସେହିପରି ୬୦ରୁ ଅଧିକ ପାଲେଷ୍ଟାଇନ କଏଦୀଙ୍କୁ ମଧ୍ୟ ଇସ୍ରାଏଲ ଜେଲରୁ ମୁକ୍ତ କରାଯାଇପାରେ। ଇସ୍ରାଏଲର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଇସ୍ରାଏଲ ଏବଂ ହାମାସ ମଧ୍ୟରେ ଦୁଇ ଦିନିଆ ଯୁଦ୍ଧବିରତି ହେତୁ ହମାସ ଆଗାମୀ ଦୁଇ ଦିନ ପାଇଁ ପ୍ରତିଦିନ ୧୦ ଜଣ ବନ୍ଧକଙ୍କୁ ମୁକ୍ତ କରିବ |

ଏହି ଅବଧି ମଧ୍ୟରେ ପାଲେଷ୍ଟାଇନ ବନ୍ଦୀମାନଙ୍କୁ ମଧ୍ୟ ମୁକ୍ତ କରାଯିବ। ଉଲ୍ଲେଖ ଥାଉ କି ଯୁଦ୍ଧବିରତି ପାଇଁ କତର ଓ ଇଜିପ୍ଟ ମଧ୍ୟସ୍ଥତାରେ ହୋଇଥିବା ଚୁକ୍ତି ଅନୁଯାୟୀ ହମାସ୍‌ ବର୍ତ୍ତମାନ ସୁଦ୍ଧା ୫୮ ଜଣ ବନ୍ଦୀଙ୍କୁ ମୁକ୍ତ କରିଛି। ଶୁକ୍ରବାର ହମାସ୍‌ ୨୪ ଜଣ, ଶନିବାର ୧୭ ଜଣ ଏବଂ ରବିବାର ୧୭ ଜଣ ବନ୍ଦୀଙ୍କୁ ମୁକ୍ତ କରିଛି। ତେବେ ଅସ୍ଥାୟୀ ଯୁଦ୍ଧବିରତି ମଧ୍ୟରେ ଇସ୍ରାଏଲ ବିମାନ ଗାଜାରେ ହମାସ୍‌ର ୫ ଜଣ ବରିଷ୍ଠ କମାଣ୍ଡରଙ୍କୁ ନିପାତ କରିଥିଲା। ସେମାନେ ହେଉଛନ୍ତି ହମାସ୍‌ର ଉତ୍ତର ଗାଜା ବ୍ରିଗେଡ୍‌ର କମାଣ୍ଡର ଅହମ୍ମଦ ଘଣ୍ଡୋର, ହମାସ୍‌ର ରକେଟ୍ସ ଆରେ ମୁଖ୍ୟ ଆଇମାନ୍ ସିଆମ୍, ହମାସ୍‌ର ଉତ୍ତର ଗାଜା ବ୍ରିଗେଡ୍‌ର ଡେପୁଟି କମାଣ୍ଡର ୱେଲ୍ ରାଜେବ, ହମାସ୍‌ର ଜୁଡିଆ ଏବଂ ସାମରିଆ ମୁଖ୍ୟାଳୟର ବରିଷ୍ଠ କର୍ମକର୍ତ୍ତା ଫର୍ସାନ୍ ହାଲିଫା ଏବଂ ଉତ୍ତର ଗାଜାରେ ଯୁଦ୍ଧ ସହାୟତା ୟୁନିଟ୍‌ର କମାଣ୍ଡର ରଫେତ ସଲମାନ।