ଇରାନକୁ ଧ୍ୱଂସ କରିବାକୁ ଇସ୍ରାଏଲ ପ୍ରସ୍ତୁତ! ଲିକ୍ ହୋଇଥିବା ତଥ୍ୟ ନେଇ ଆଲୋଡ଼ନ

ୱାଶିଂଟନ: ଇସ୍ରାଏଲ ବର୍ତ୍ତମାନ ମଧ୍ୟପ୍ରାଚ୍ୟର ଏକାଧିକ ମୋର୍ଚ୍ଚାରେ ଯୁଦ୍ଧ ଲଢୁଛି। ଇସ୍ରାଏଲର ଆକ୍ରମଣରେ ହମାସ ମୁଖ୍ୟ ୟାହିୟା ସିନୱାରଙ୍କ ମୃତ୍ୟୁ ପରେ ଇରାନର ସର୍ବୋଚ୍ଚ ନେତା ଅୟୋତୋଲ୍ଲା ଅଲି ଖାମେନି କହିଛନ୍ତି ଯେ ହମାସ ସମାପ୍ତ ହୋଇନାହିଁ। ହମାସ ପରେ ଇସ୍ରାଏଲର ପରବର୍ତ୍ତୀ ଲକ୍ଷ୍ୟ ହେଉଛି ଇରାନ।

ନ୍ୟୁୟର୍କ ଟାଇମ୍ସ ରିପୋର୍ଟ ଅନୁଯାୟୀ ଆମେରିକାର ଗୁପ୍ତଚର ସଂସ୍ଥାର ଏକ ଡକ୍ୟୁମେଣ୍ଟ ଲିକ୍ ହୋଇଛି ଯେଉଁଥିରେ ଇସ୍ରାଏଲ ବର୍ତ୍ତମାନ ଇରାନ ଉପରେ ଏକ ବଡ଼ ଆକ୍ରମଣ ପାଇଁ ପ୍ରସ୍ତୁତ ହେଉଥିବା ଉ‌ଲ୍ଲେଖ କରାଯାଇଛି।

ଆମେରିକାର ସାଟେଲାଇଟ୍ ନ୍ୟାସନାଲ୍ ଜିଓସ୍ପାଟିଆଲ୍-ଇଣ୍ଟେଲିଜେନ୍ସ ଏଜେନ୍ସି (ଏନଜିଏ) ଏପରି କିଛି ଚିତ୍ର କଏଦ କରିଛି, ଯେଉଁଥିରେ ଇସ୍ରାଏଲ୍ ସେନାର ପ୍ରସ୍ତୁତିକୁ ଦେଖିଲେ ଏକ ବଡ଼ ପଦକ୍ଷେପ ନେବାକୁ ଯୋଜନା କରାଯାଉଥିବା ଜଣାପଡିଛି।

୧୫ ଏବଂ ୧୬ ଅକ୍ଟୋବର ୨୦୨୪ରେ, ଏହିପରି ଦୁଇଟି ଡକ୍ୟୁମେଣ୍ଟ ଇରାନକୁ ସମର୍ଥନ କରୁଥିବା ଅନେକ ଟେଲିଗ୍ରାମ ଆକାଉଣ୍ଟ ଦ୍ୱାରା ମଧ୍ୟ ଅଂଶୀଦାର କରାଯାଇଥିଲା। ଇସ୍ରାଏଲର ସାମରିକ କାର୍ଯ୍ୟକଳାପଗୁଡିକ ଏହି ଦଲିଲଗୁଡ଼ିକରେ ସମ୍ପୂର୍ଣ୍ଣ ବିସ୍ତୃତ ଭାବରେ ଦର୍ଶାଯାଇଛି। ସେଥିରୁ ସ୍ପଷ୍ଟ ହେଉଛି ଯେ ଇସ୍ରାଏଲ ବର୍ତ୍ତମାନ ଇରାନ ଉପରେ ଏକ ବଡ଼ ଧରଣର ଆକ୍ରମଣ କରିବାକୁ ଯୋଜନା କରୁଛି।

୧ ଅକ୍ଟୋବର ୨୦୨୪ରେ ଇରାନ ପ୍ରାୟ ୨୦୦କ୍ଷେପଣାସ୍ତ୍ର ସହିତ ଇସ୍ରାଏଲ ଉପରେ ଆକ୍ରମଣ କରିଥିଲା। ଯାହା ପରେ ଇସ୍ରାଏଲ କିପରି ପ୍ରତିଶୋଧ ନେବ ତାହା ଉପରେ ସମଗ୍ର ବିଶ୍ୱର ନଜର ରହିଥିଲା। ତେବେ ଇରାନର ସେହି ଆକ୍ରମଣର ଇସ୍ରାଏଲ୍ ଏପର୍ଯ୍ୟନ୍ତ ପ୍ରତିକ୍ରିୟା ଦେଇ ନାହିଁ। ଏଭଳି ପରିସ୍ଥିତିରେ ଦୁଇ ଦେଶ ମଧ୍ୟରେ ବଢୁଥିବା ତିକ୍ତତା ମଧ୍ୟରେ ଏହି ଡକ୍ୟୁମେଣ୍ଟର ଖୁଲାସା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି।

ଦୁଇଟି ଡକ୍ୟୁମେଣ୍ଟ ମଧ୍ୟରୁ ଗୋଟିଏ ହେଉଛି, ଇସ୍ରାଏଲ ବାୟୁସେନା ଇରାନ ଉପରେ ଆକ୍ରମଣ ପାଇଁ ପ୍ରସ୍ତୁତି ଜାରି ରଖିଛି। କ୍ଷେପଣାସ୍ତ୍ରର ପୁନଃ ସ୍ଥାପନର ସ୍ଥିତି  ଏଥିରେ ଦର୍ଶାଯାଇଛି। ଦ୍ୱିତୀୟ ଡକ୍ୟୁମେଣ୍ଟରେ ଅସ୍ତ୍ରଶସ୍ତ୍ର ଏବଂ ଅନ୍ୟାନ୍ୟ ସାମରିକ ସମ୍ପତ୍ତିକୁ ରଣନୀତିକ ସ୍ଥାନକୁ ସ୍ଥାନାନ୍ତର ପ୍ରସ୍ତୁତି ସମ୍ପର୍କରେ ଦର୍ଶାଯାଇଛି।

ଏହି ଗୁପ୍ତଚର ଦଲିଲ ଲିକ୍ ହେବାର ଖବର ପାଇବା ପରେ ଆମେରିକାର ଗୁପ୍ତଚର ଏଜେନ୍ସି ଏବଂ ଏଫବିଆଇ ମିଳିତ ଭାବେ ଏହାର ଅନୁସନ୍ଧାନ କରୁଛନ୍ତି।