ଗାଜାରେ ଇସ୍ରାଏଲର ବିମାନ ଆକ୍ରମଣ: ଖାଦ୍ୟ ଯୋଗାଉଥିବା ଏନ୍‌ଜିଓର ୭ କର୍ମଚାରୀ ନିହତ

ଗାଜା: ସୋମବାର କେନ୍ଦ୍ରୀୟ ଗାଜାରେ ଇସ୍ରାଏଲର ଏୟାର୍ ଷ୍ଟ୍ରାଇକ୍‌ରେ ପ୍ରାଣ ହରାଇଥିବା ସେଲିବ୍ରିଟି ସେଫ୍ ଜୋସ୍ ଆଣ୍ଡ୍ରେସଙ୍କ ୱାର୍ଲ୍ଡ ସେଣ୍ଟ୍ରାଲ କିଚେନ୍ (ଡବ୍ଲ୍ୟୁସିକେ) ପାଇଁ କାମ କରୁଥିବା ୭ ଜଣ କର୍ମଚାରୀଙ୍କ ମଧ୍ୟରେ ଅଷ୍ଟ୍ରେଲିଆ, ବ୍ରିଟେନ୍ ଓ ପୋଲାଣ୍ଡର ନାଗରିକ ଅଛନ୍ତି। ଡବ୍ଲ୍ୟୁସିକେ ଏକ ବିବୃତିରେ କହିଛି ଯେ ଏହି କର୍ମଚାରୀଙ୍କ ଭିତରେ ପାଲେଷ୍ଟାଇନର ନାଗରିକ ତଥା ଆମେରିକା ଓ କାନାଡାର ଦ୍ବୈତ ନାଗରିକତ୍ବ ଥିବା କର୍ମଚାରୀ ମଧ୍ୟ ଥିଲେ। ସେମାନେ ଡବ୍ଲ୍ୟୁସିକେ ଲୋଗୋ ଥିବା ଦୁଇଟି କାରରେ ଯାତ୍ରା କରୁଥିଲେ।

ଇସ୍ରାଏଲ ପ୍ରତିରକ୍ଷା ବାହିନୀ ସହ ସମନ୍ୱୟ ରକ୍ଷା କରିବା ସତ୍ତ୍ୱେ ସମୁଦ୍ରପଥରେ ଗାଜାକୁ ଅଣାଯାଇଥିବା ୧୦୦ ଟନରୁ ଅଧିକ ମାନବୀୟ ଖାଦ୍ୟ ସହାୟତାକୁ ଓହ୍ଲାଇବା ପରେ ଏହାର ଡେର ଅଲ-ବାଲାହ ଗୋଦାମରୁ ବାହାରିବା ସମୟରେ ଏହି ଗାଡ଼ିଗୁଡ଼ିକ ଆକାଶମାର୍ଗରୁ ହେଉଥିବା ବୋମାବର୍ଷା ଦ୍ବାରା ପ୍ରଭାବିତ ହୋଇଥିଲା। ୱାର୍ଲ୍ଡ ସେଣ୍ଟ୍ରାଲ କିଚେନର ମୁଖ୍ୟ କାର୍ଯ୍ୟନିର୍ବାହୀ ଏରିନ ଗୋରେ କହିଛନ୍ତି, ଏହା କେବଳ ଡବ୍ଲୁସିକେ ବିରୋଧରେ ଆକ୍ରମଣ ନୁହେଁ, ଏହା ମାନବିକ ସଂଗଠନଗୁଡ଼ିକ ଉପରେ ଆକ୍ରମଣ, ଯେଉଁଠାରେ ଖାଦ୍ୟକୁ ଯୁଦ୍ଧର ଅସ୍ତ୍ର ଭାବରେ ବ୍ୟବହାର କରାଯାଉଛି। ଏହା କ୍ଷମାଯୋଗ୍ୟ ନୁହେଁ। ଇସ୍ରାଏଲ ସରକାର ଏହି ଆଖିବୁଜା ହତ୍ୟାକୁ ରୋକିବା ଦରକାର।

ମାନବିକ ସହାୟତା ଉପରେ ପ୍ରତିବନ୍ଧକ ଲଗାଇବା, ସାଧାରଣ ନାଗରିକ ଓ ସହାୟତା କର୍ମୀଙ୍କୁ ହତ୍ୟା କରିବା ଏବଂ ଖାଦ୍ୟକୁ ଅସ୍ତ୍ର ଭାବେ ବ୍ୟବହାର କରିବା ବନ୍ଦ କରିବାର ଆବଶ୍ୟକତା ରହିଛି ବୋଲି ସେ ସୋସିଆଲ ମିଡିଆରେ କହିଛନ୍ତି। ଇସ୍ରାଏଲ ସେନା କହିଛି, କେଉଁ ପରିସ୍ଥିତିରେ ଏଭଳି ଦୁଃଖଦ ଘଟଣା ଘଟିଲା ତାହା ବୁଝିବା ପାଇଁ ଉଚ୍ଚସ୍ତରୀୟ ସମୀକ୍ଷା କରାଯାଉଛି। ଇସ୍ରାଏଲ ପ୍ରଧାନମନ୍ତ୍ରୀ କହିଛନ୍ତି ଯେ ଯୁଦ୍ଧରେ ଏଭଳି ଘଟିଥାଏ ଏବଂ ଆକ୍ରମଣ ଉଦ୍ଦେଶ୍ୟମୂଳକ ନଥିଲା।