ଜୁଲାଇ ୧୫ରେ ଚନ୍ଦ୍ର ଅଭିମୁଖେ ଯାତ୍ରା ଆରମ୍ଭ କରିବ ଚନ୍ଦ୍ରାୟନ-୨; ଇସ୍ରୋ ପ୍ରକାଶ କଲା ବିରଳ ଫଟୋଚିତ୍ର

ବେଙ୍ଗାଲୁରୁ/ ନୂଆଦିଲ୍ଲୀ: ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ) ନିଜର ବହୁଚର୍ଚ୍ଚିତ ଓ ପ୍ରତୀକ୍ଷିତ ଦ୍ୱିତୀୟ ଚନ୍ଦ୍ର ଅଭିଯାନ ଚନ୍ଦ୍ରାୟନ-୨ ଆରମ୍ଭ କରିବା ପୂର୍ବରୁ ଆଜି ବେଙ୍ଗାଲୁରୁ ଠାରେ ଚନ୍ଦ୍ରାୟନ-୨ର ଅନେକ ଗୁରୁତ୍ୱପୂର୍ଣ୍ଣ ଓ ବିରଳ ଫଟୋକୁ ସର୍ବପ୍ରଥମ ଥର ପାଇଁ ପ୍ରଦର୍ଶିତ କରିଛି।

ଚନ୍ଦ୍ରାୟନ-୨କୁ ଆସନ୍ତା ଜୁଲାଇ ୧୫ ତାରିଖରେ ଚନ୍ଦ୍ରକୁ ପ୍ରେରଣ କରିବା ସହ ୬ ସେପ୍ଟେମ୍ବର ୨୦୧୯ରେ ଏହାକୁ ଚନ୍ଦ୍ର ପୃଷ୍ଠରେ ଅବତରଣ କରାଇବା ପାଇଁ ଲକ୍ଷ୍ୟ ରଖିଛି ଇସ୍ରୋ। ଜୁଲାଇରେ ହେବାକୁ ଥିବା ଚନ୍ଦ୍ରାୟନ-୨ କାର୍ଯ୍ୟକ୍ରମ ପାଇଁ ଏବେ ଚଳଚଞ୍ଚଳ ହୋଇଉଠିଛି ଇସ୍ରୋ। ଏବଂ ଏହି ଅବସରରେ ଆଜି (ବୁଧବାର) ବେଙ୍ଗାଲୁରୁ ଠାରେ ସର୍ବପ୍ରଥମ ଥର ପାଇଁ ଚନ୍ଦ୍ରାୟନ-୨ର ଫଟୋକୁ ସର୍ବସାଧାରଣଙ୍କ ଉଦ୍ଦେଶ୍ୟରେ ପ୍ରଦର୍ଶିତ କରିଛି ଇସ୍ରୋ।

ଜୁଲାଇ ୧୫ ତାରଖରେ ଚନ୍ଦ୍ରପୃଷ୍ଠକୁ ଯାତ୍ରା ଆରମ୍ଭ କରିବାକୁ ଥିବା ଚନ୍ଦ୍ରାୟନ-୨ ଯାନରେ ତିନିଟି ଗୁରୁତ୍ୱପୂର୍ଣ୍ଣ ଯାନ ରହିଛି। ପ୍ରଥମଟି ‘ଅବ୍ରିଟର’ ହୋଇଥିବା ବେଳେ ଦ୍ୱିତୀୟଟି ହେଉଛି ‘ଲାଣ୍ଡର’ (ବିକ୍ରମ) ଏବଂ ତୃତୀୟଟି ହେଉଛି ‘ରୋଭର୍‌’ (ପ୍ରଜ୍ଞାନ)। ‘ରୋଭର’କୁ ରଖାଯାଇଛି ‘ଲାଣ୍ଡର’ ମଧ୍ୟରେ।

ଏହି ତିନିଟି ଯାନକୁ ଗୋଟିଏ ଜିଏସ୍‌ଏଲ୍‌ଭି ଏମ୍‌କେ- ।।। ରକେଟ ମଧ୍ୟରେ ରଖାଯାଇ ଏହାକୁ ଅନ୍ତରୀକ୍ଷକୁ ଛଡ଼ାଯିବ। ଅନ୍ତରୀକ୍ଷର କକ୍ଷ ପଥରେ ପହଞ୍ଚିବା ପରେ ଏହି ତିନିଟି ଯାନ ରକେଟ ଠାରୁ ଅଲଗା ହୋଇଯିବ। ପରେ ଅରବିଟର, ଲାଣ୍ଡର ଓ ରୋଭରକୁ ଧରି ପୃଥିବୀ କକ୍ଷ ପଥରେ ଘୂରି ବୁଲିବ। ପରବର୍ତ୍ତୀ ସମୟରେ ଲାଣ୍ଡର ଓ ରୋଭର ଅରବିଟର ଠାରୁ ଅଲଗା ହୋଇଯିବେ ଏବଂ ରୋଭରକୁ ଧରି ଲାଣ୍ଡର ଯାଇ ଚନ୍ଦ୍ରପୃଷ୍ଠରେ ଅବତାରଣ କରିବ।

ଚନ୍ଦ୍ରପୃଷ୍ଠରେ ଅବତରଣ କରିବା ପରେ ରୋଭର ଲାଣ୍ଠର ଠାରୁ ଅଲଗା ହୋଇଯିବ ଏବଂ ଚନ୍ଦ୍ରପୃଷ୍ଠରେ ଘୂରି ବୁଲିବା ସହ ଚନ୍ଦ୍ରପୃଷ୍ଠର ଅଜ୍ଞାତ ତଥ୍ୟ ଓ ଫଟୋଚିତ୍ର ସବୁକୁ ସଂଗ୍ରହ କରିବା ସହ ସେସବୁକୁ ଇସ୍ରୋକୁ ପ୍ରେରଣ କରିବ। ଏଥିପାଇଁ ଇସ୍ରୋ ପକ୍ଷରୁ ବ୍ୟାପକ ଉପକରଣ ଓ ଉଚ୍ଚ କ୍ଷମତା ସଂପନ୍ନ କ୍ୟାମେରା ରୋଭରରେ ଖଞ୍ଜା ଯାଇଛି।

ପ୍ରସଙ୍ଗକ୍ରମେ ଉଲ୍ଲେଖଯୋଗ୍ୟ, ଇସ୍ରୋ ପକ୍ଷରୁ ଚନ୍ଦ୍ରାୟନ-୧ ନାମରେ ପ୍ରଥମ ଚନ୍ଦ୍ର ଅଭିଯାନ କାର୍ଯ୍ୟକ୍ରମ ହୋଇଥିଲା। ତେବେ, ଚନ୍ଦ୍ରାୟନ-୧ରେ ଚନ୍ଦ୍ରପୃଷ୍ଠର ତଥ୍ୟ ସଂଗ୍ରହ ପାଇଁ ରୋଭର ପରି କୌଣସି ଯାନ ନଥିଲା। ଚନ୍ଦ୍ରାୟନ-୧ କେବଳ ଚନ୍ଦ୍ରର କକ୍ଷ ପଥରେ ଘୂରିବୁଲି ଚନ୍ଦ୍ରର ତଥ୍ୟ ସଂଗ୍ରହ କରିଥିଲା। ଚନ୍ଦ୍ରାୟନ-୧ର ୯ ବର୍ଷ ପରେ ଏବେ ଦ୍ୱିତୀୟ ଚନ୍ଦ୍ର ଅଭିଯାନରେ ଚନ୍ଦ୍ରାୟ୍ରନ-୨ରେ ରୋଭର ଯାନ ରହିଛି। ଯାହାକି ଚନ୍ଦ୍ର ପୃଷ୍ଠରେ ଅବତରଣ କରିବା ସହ ସିଧାସଳଖ ତଥ୍ୟ ସଂଗ୍ରହ କରିବ। ଚନ୍ଦ୍ରାୟନ-୨ ସଫଳତା ପାଇଲେ ଇସ୍ରୋ ନିଜର ମଙ୍ଗଳାୟନ କାର୍ଯ୍ୟକ୍ରମ ପୂର୍ବରୁ ବିଶ୍ୱ ମହାକାଶ ଗବେଷଣା କ୍ଷେତ୍ରରେ ନିଜର ଏକ ସ୍ୱତନ୍ତ୍ର ସ୍ଥାନ ପ୍ରସ୍ତୁତ କରିବ।