ପୋଏମ୍-୪କୁ ସୁରକ୍ଷିତ ଖସାଇଲା ଇସ୍ରୋ: ସ୍ପେଡେକ୍ସ ଉପଗ୍ରହ ସହ ଉତ୍‌କ୍ଷେପିତ ହୋଇଥିଲା

ନୂଆଦିଲ୍ଲୀ: ଭାରତୀୟ ମହାକାଶ ଗବେଷଣା ସଂଗଠନ (ଇସ୍ରୋ) ଶୁକ୍ରବାର କହିଛି ଯେ ପିଏସ୍‌ଏଲ୍‌ଭି ଅର୍ବିଟାଲ ଏକ୍ସପେରିମେଣ୍ଟ ମଡ୍ୟୁଲ (ପୋଏମ୍-୪)ର ଚତୁର୍ଥ ସଂସ୍କରଣ ସଫଳତାର ସହ ପୃଥିବୀର ବାୟୁମଣ୍ଡଳରେ ପ୍ରବେଶ କରିଛି। ଭାରତ ମହାସାଗରରେ ଏହାର ପ୍ରଭାବକୁ ରେକର୍ଡ କରାଯାଇଛି। ଏହି ପୁନଃପ୍ରବେଶ ଇସ୍ରୋର ଆବର୍ଜନାମୁକ୍ତ ମହାକାଶ ଅଭିଯାନ (ଡିଏଫ୍‌ଏସ୍‌ଏମ୍‌) ଅଧୀନରେ ମହାକାଶ ଆବର୍ଜନା ସଫା ପାଇଁ ଜାରି ରହିଥିବା ପ୍ରତିବଦ୍ଧତାରେ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ।

୨୦୨୪ ଡିସେମ୍ବର ୩୦ ତାରିଖରେ ଦୁଇଟି ସ୍ପେଡେକ୍ସ ଉପଗ୍ରହ ଉତ୍‌କ୍ଷେପଣ କରିଥିବା ପିଏସ୍‌ଏଲ୍‌ଭି-ସି୬୦ର ସ୍ୱତନ୍ତ୍ର ଭାବେ ନିର୍ମିତ ଉପର ପର୍ଯ୍ୟାୟ (ପିଏସ୍୪) ଥିଲା ପୋଏମ୍-୪। ଉପଗ୍ରହକୁ ୪୭୫ କିଲୋମିଟର କକ୍ଷପଥରେ ପ୍ରବେଶ କରାଇବା ପରେ ୩୫୦ କିଲୋମିଟର ଉଚ୍ଚତାରେ ଥିବା ଏକ ନିମ୍ନ, ପାଖାପାଖି ଗୋଲାକାର କକ୍ଷପଥରେ ଏହାର ଇଞ୍ଜିନକୁ ପୁନଃ ଆରମ୍ଭ କରି ୫୫.୨ ଡିଗ୍ରି ଆନତିରେ ପରିଣତ କରାଯାଇଥିଲା। ପରେ ଦୁର୍ଘଟଣାଜନିତ ବ୍ରେକ୍ଅପ୍ ଆଶଙ୍କାକୁ ହ୍ରାସ କରିବା ପାଇଁ ଏଥିରୁ ଅବଶିଷ୍ଟ ଇନ୍ଧନ ବାହାର କରି ଏହାକୁ ପାସିଭ୍ କରାଯାଇଥିଲା ବୋଲି ଇସ୍ରୋ ପକ୍ଷରୁ କୁହାଯାଇଛି। କକ୍ଷପଥରେ ଏହାର କାର୍ଯ୍ୟକ୍ଷମ ଜୀବନ କାଳରେ ‘ପୋଏମ୍-୪’ ୨୪ଟି ପେଲୋଡ୍ ବହନ କରିଥିଲା, ଯେଉଁଥିରେ ଇସ୍ରୋର ୧୪ଟି ଓ ବେସରକାରୀ ସଂସ୍ଥା (ଏନ୍‌ଜିଇ)ର ୧୦ଟି ଥିଲା। ସମସ୍ତ ପେଲୋଡ୍ ସଫଳତାର ସହ କାର୍ଯ୍ୟ ସମ୍ପାଦନ କରିଛି ଏବଂ ଅତି ଗୁରୁତ୍ବପୂର୍ଣ୍ଣ ବୈଜ୍ଞାନିକ ତଥ୍ୟ ପ୍ରଦାନ କରିଛି। ପୋଏମ୍-୪ କକ୍ଷପଥରେ ଥିବା ବେଳେ  ଏହାକୁ କ୍ରମାଗତ ଭାବେ ଟ୍ରାକ୍ କରାଯାଉଥିଲା।