ଇସ୍ରୋର ସଫଳତା: ମହାକାଶକୁ ପ୍ରେରଣ କଲା ଅତ୍ୟାଧୁନିକ ଯୋଗାଯୋଗ ଉପଗ୍ରହ ସିଏମଏସ-୦୧

ଶ୍ରୀହରିକୋଟା : ଭାରତୀୟ ମହାକାଶ ଗବେଷଣା ସଂସ୍ଥା  (ଇସ୍ରୋ) ପକ୍ଷରୁ ଗୁରୁବାରଦିନ ଅତ୍ୟାଧୁନିକ ଯୋଗାଯୋଗ ଉପଗ୍ରହ ସିଏମଏସ-୦୧କୁ ମହାକାଶକୁ ପ୍ରେରଣ କରାଯାଇଛି । ଇସ୍ରୋର ପୋଲାର ସାଟେଲାଇଟ୍ ଲଞ୍ଚ୍ ଭେଇକିଲ୍ (ପିଏସଏଲଭି-ସି୫୦) ମାଧ୍ୟମରେ ଏହାକୁ କକ୍ଷପଥରେ ସ୍ଥାପନ କରାଯାଇଛି ।

ଶ୍ରୀହରିକୋଟାସ୍ଥିତ ସତୀଶ ଧଓ୍ବନ ମହାକାଶ କେନ୍ଦ୍ରର ୨ୟ ଲଞ୍ଚ୍ ପ୍ୟାଡରୁ ଆଜି ଅପରାହ୍ଣ ୩ ଘଣ୍ଟା ୪୧ ମିନିଟ ସମୟରେ ପିଏସଏଲଭି ମାଧ୍ୟମରେ ସିଏମଏସ-୦୧ର ଉତକ୍ଷେପଣ କରାଯାଇଥିଲା । ଏହା ହେଉଛି ପିଏସଏଲଭିର ୫୨ତମ ମିଶନ ।

Less than an hour left for the launch of #PSLVC50/#CMS01 !!!

Watch the launch live athttps://t.co/tuRXyzmFhhhttps://t.co/7izTpcuX4zhttps://t.co/JtnEW5Q8XGhttps://t.co/IIxkNIzDzT pic.twitter.com/eWmoNhMTGa

— ISRO (@isro) December 17, 2020

ଏହି ସଫଳ ଉତକ୍ଷେପଣ ସମ୍ପର୍କରେ ଇସ୍ରୋ ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି । ଏହି ଟ୍ବିଟରେ କୁହାଯାଇଛି ଯେ ପିଏସଏଲଭି ସଫଳତାର ସହ ସିଏମଏସ-୦୧କୁ କକ୍ଷପଥରେ ସ୍ଥାପନ କରିଛି । ତେବେ ଉକ୍ତ କକ୍ଷପଥର ନିର୍ଦ୍ଧାରିତ ସ୍ଥାନରେ ସ୍ଥାପିତ ହେବାକୁ ଏହି ଉପଗ୍ରହକୁ ଆଉ ୪ ଦିନ ଲାଗିଯିବ । ବର୍ତ୍ତମାନ ସୁଦ୍ଧା ଏହି ଉପଗ୍ରହ ଠିକ ଭାବେ କାର୍ଯ୍ୟ କରୁଛି ।

ସିଏମଏସ-୦୧ ହେଉଛି ଇସ୍ରୋ ଦ୍ବାରା ଛଡ଼ାଯାଇଥିବା ୪୨ ତମ ଯୋଗାଯୋଗ ସାଟେଲାଇଟ । ଏହା ଭାରତୀୟ ମୂଳ ଭୂଖଣ୍ଡ ଓ ଆଣ୍ଡାମାନ ଓ ନିକୋବର ଅଞ୍ଚଳରେ ସଂପ୍ରସାରିତ ସି-ବ୍ୟାଣ୍ଡ୍ ସେବା ଯୋଗାଇବ । ଗତ ନଭେମ୍ବର ୭ରେ ଇସ୍ରୋ ପକ୍ଷରୁ ପିଏସଏଲଭି-ସି୪୯ ମାଧ୍ୟମରେ ଭୂ-ପର୍ଯ୍ୟବେକ୍ଷଣ ଉପଗ୍ରହ ଛଡ଼ାଯାଇଥିଲା ।