୧.୧୬ ଲକ୍ଷ ଲୋକଙ୍କୁ ଆୟକର ବିଭାଗ ନୋଟିସ୍
ବିମୁଦ୍ରାୟନ ପରେ ପୁରୁଣା ନୋଟ୍ରେ ୨୫ ଲକ୍ଷରୁ ଅଧିକ ଟଙ୍କା ଜମା କରିଥିଲେ
ନୂଆଦିଲ୍ଲୀ: ଗତ ବର୍ଷ ନଭେମ୍ବରରେ ହୋଇଥିବା ବିମୁଦ୍ରାୟନ ପରେ ବ୍ୟାଙ୍କରେ ୨୫ ଲକ୍ଷରୁ ଅଧିକ ଟଙ୍କା ଜମା ରଖିଥିବା ପ୍ରାୟ ୧ ଲକ୍ଷ ୧୬ ହଜାର ଲୋକଙ୍କ ନିକଟକୁ ଆୟକର ନୋଟିସ ପଠାଯାଇଛି । ଏହି ଲୋକମାନେ ଟଙ୍କା ଜମା ରଖିଥିବା ସତ୍ତ୍ୱେ ଧାର୍ଯ୍ୟ ତାରିଖ ମଧ୍ୟରେ ରିଟର୍ଣ୍ଣ ଫାଇଲ କରିପାରି ନ ଥିଲେ ବୋଲି ସୂଚନା ଦେଇଛନ୍ତି କେନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ (ସିବିଡିଟି)ର ଅଧ୍ୟକ୍ଷ ସୁଶୀଲ ଚନ୍ଦ୍ରା ।
Sambad is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ, ବିପୁଳ ପରିମାଣର ଟଙ୍କା ଜମା କରି ଆୟକର ରିଟର୍ଣ୍ଣ ଫାଇଲ କରିଥିବା କିଛି ଲୋକଙ୍କ କାରବାର ଉପରେ ମଧ୍ୟ ଯାଞ୍ଚ କରାଯାଉଛି ବୋଲି ସେ କହିଛନ୍ତି । ଆୟକର ବିଭାଗ ପକ୍ଷରୁ ବିମୁଦ୍ରାୟନ ପରେ ଅଢେଇ ଲକ୍ଷ ବା ଅଧିକ ମୂଲ୍ୟର ପୁରୁଣା ୫୦୦ ଓ ୧୦୦୦ ଟଙ୍କିଆ ନୋଟ୍ ଜମା କରିଥିବା ପ୍ରାୟ ୧୮ ଲକ୍ଷ ଲୋକଙ୍କ କାରବାର ଯାଞ୍ଚ କରାଯାଇଥିଲା । ଏମାନଙ୍କୁ ମୁଖ୍ୟତଃ ଦୁଇଟି ବର୍ଗରେ ବିଭକ୍ତ କରାଯାଇଥିଲା- ଯେଉଁମାନେ ୨୫ ଲକ୍ଷ ବା ଅଧିକ ମୂଲ୍ୟର ପୁରୁଣା ଟଙ୍କା ଜମା କରିଥିଲେ ଓ ଯେଉଁମାନେ ୧୦ରୁ ୨୫ ଲକ୍ଷ ପର୍ଯ୍ୟନ୍ତ ମୂଲ୍ୟର ପୁରୁଣା ଟଙ୍କା ଜମା କରିଥିଲେ । ଏହି ଯାଞ୍ଚରୁ ଜଣାପଡିଥିଲା ଯେ ପ୍ରାୟ ୧ ଲକ୍ଷ ୧୬ ହଜାର ଲୋକ ୨୫ ଲକ୍ଷ ଟଙ୍କା ବା ଅଧିକ ମୂଲ୍ୟର ପୁରୁଣା ନୋଟ ଜମା କରିଥିଲେ ମଧ୍ୟ ରିଟର୍ଣ୍ଣ ଫାଇଲ କରିନଥିଲେ । ସେମାନଙ୍କୁ ୩୦ ଦିନ ମଧ୍ୟରେ ରିଟର୍ଣ୍ଣ ଫାଇଲ ପାଇଁ କୁହାଯାଇଛି ବୋଲି ଚନ୍ଦ୍ରା କହିଛନ୍ତି ।
ଅନ୍ୟପକ୍ଷରେ ପ୍ରାୟ ୨ ଲକ୍ଷ ୪୦ ହଜାର ଲୋକ ୧୦ରୁ ୨୪ ଲକ୍ଷ ଟଙ୍କା ପର୍ଯ୍ୟନ୍ତ ଜମା ପୁରୁଣା ନୋଟରେ କରିଥିଲେ ମଧ୍ୟ ରିଟର୍ଣ୍ଣ ଫାଇଲ କରିନାହାନ୍ତି । ସେମାନଙ୍କୁ ୨ୟ ପର୍ଯ୍ୟାୟରେ ନୋଟିସ ପଠାଯିବ ।