୨ପ୍ରାର୍ଥୀଙ୍କ ମଧ୍ୟରେ ନୁହେଁ ୨ଟି ବିଚାରଧାରା ମଧ୍ୟରେ ହେବ ଲଢ଼େଇ, ମୋତେ ଭୋଟ ଦିଅନ୍ତୁ: ଯଶବନ୍ତ ସିହ୍ନା
ନୂଆଦିଲ୍ଲୀ: ଆସନ୍ତାକାଲି ହେବ ରାଷ୍ଟ୍ରପତି ନିର୍ବାଚନ। ଦେଶକୁ ମିଳିବ ନୂଆ ରାଷ୍ଟ୍ରପତି। ଏହି ନିର୍ବାଚନ ପାଇଁ ୟୁପିଏ ପକ୍ଷରୁ ଯଶୱନ୍ତ ସିହ୍ନା ପ୍ରାର୍ଥୀ ହୋଇଥିବା ବେଳେ ଦ୍ରୌପଦୀ ମୁର୍ମୁଙ୍କୁ ପ୍ରାର୍ଥୀ କରିଛି ଏନଡିଏ। ମୁର୍ମୁଙ୍କୁ ଏକାଧିକ ଦଳ ସମର୍ଥନ କରୁଥିବା ବେଳେ ତାଙ୍କର ଜିତିବା ଏକପ୍ରକାର ସୁନିଶ୍ଚିତ ହୋଇଛି। ଏମଧ୍ୟରେ ନିର୍ବାଚନ ପୂର୍ବରୁ ବିରୋଧୀଦଳଙ୍କ ଦ୍ୱାରା ପ୍ରାର୍ଥୀ ହୋଇଥିବା ଯଶୱନ୍ତ ସିହ୍ନା ରବିବାର ଦିନ ସମସ୍ତ ରାଜନୈତିକ ଦଳକୁ ନିର୍ବାଚନରେ ତାଙ୍କୁ ଭୋଟ୍ ଦେବାକୁ ଅନ୍ତିମ ନିବେଦନ କରିଛନ୍ତି।
ଯଶୱନ୍ତ ସିହ୍ନା କହିଛନ୍ତି ଯେ, ଏଥର ରାଷ୍ଟ୍ରପତି ନିର୍ବାଚନରେ ଦୁଇ ପ୍ରାର୍ଥୀଙ୍କ ମଧ୍ୟରେ ନୁହେଁ, ବରଂ ଦୁଇଟି ବିଚାରଧାରା ମଧ୍ୟରେ ଲଢ଼େଇ ହେଉଛି। ମୁଁ ଭାରତର ଗଣତନ୍ତ୍ରର ପ୍ରତିରକ୍ଷା ପାଇଁ ଛିଡା ହୋଇଥିବାବେଳେ ପ୍ରତିଦିନ ଗଣତନ୍ତ୍ର ଉପରେ ଆକ୍ରମଣ କରୁଥିବା ଦଳର ପ୍ରାର୍ଥୀ ହୋଇଛନ୍ତି ଦ୍ରୌପଦୀ ମୁର୍ମୁଙ୍କ। ମୁଁ ଧର୍ମନିରପେକ୍ଷତାର ପ୍ରତିରକ୍ଷା ପାଇଁ ଛିଡା ହୋଇଛି, ଯାହା ଆମର ସମ୍ବିଧାନର ଏକ ପ୍ରାଥମିକ ସ୍ତମ୍ଭ। ମୋର ପ୍ରତିଦ୍ୱନ୍ଦ୍ୱୀ ପ୍ରାର୍ଥୀଙ୍କୁ ଏକ ଏଭଳି ଦଳ ସମର୍ଥନ କରୁଛି, ଯିଏ ଏହି ସ୍ତମ୍ଭକୁ ଧ୍ୱଂସ କରିବା ଏବଂ ସଂଖ୍ୟାଗରିଷ୍ଠତା ପ୍ରତିଷ୍ଠା କରିବା ପାଇଁ ନିଷ୍ପତ୍ତି ନେଇଛନ୍ତି।
ସେ ଆହୁରି କହିଛନ୍ତି ଯେ, ସହମତି ଏବଂ ସହଯୋଗର ରାଜନୀତିକୁ ଉତ୍ସାହିତ କରିବା ପାଇଁ ମୁଁ ଛିଡା ହୋଇଛି। ହେଲେ ମୋର ପ୍ରତିଦ୍ୱନ୍ଦ୍ୱୀ ପ୍ରାର୍ଥୀଙ୍କୁ ଏକ ଏଭଳି ଦଳର ସମର୍ଥନ ରହିଛି, ଯିଏ ସଂଘର୍ଷ ଏବଂ ହିଂସାର ରାଜନୀତି କରୁଛି। ଯଦି ଦ୍ରୌପଦୀ ମୁର୍ମୁ ଭାରତର ପରବର୍ତ୍ତୀ ରାଷ୍ଟ୍ରପତି ଭାବରେ ନିର୍ବାଚିତ ହୁଅନ୍ତି, ତେବେ ସେ ଏଭଳି ଲୋକଙ୍କ ଅଧୀନରେ ରହିବେ, ଯେଉଁମାନଙ୍କ ଉଦ୍ଦେଶ୍ୟ ହେଉଛି ଗଣତାନ୍ତ୍ରିକ ଭାରତକୁ କମ୍ୟୁନିଷ୍ଟ ଚାଇନାର ଅନୁକରଣକାରୀରେ ପରିଣତ କରିବା। ଗୋଟିଏ ଜାତି, ଗୋଟିଏ ଦଳ, ଜଣେ ସର୍ବୋଚ୍ଚ ନେତା। ଏହାକୁ ରୋକାଯିବା ଉଚିତ ନୁହେଁ କି? କେବଳ ଆପଣ ଏହାକୁ ରୋକିପାରିବେ।
