ଆନ୍ଧ୍ରରେ ଜଗନ ସରକାର, ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଜଗନ ମୋହନ ରେଡ୍ଡୀ
ବିଜୟୱାଡା: ପ୍ରତୀକ୍ଷାର ଅନ୍ତ ଘଟାଇ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଭାବେ ଶପଥ ନେଲେ ଜଗନ ମୋହନ ରେଡ୍ଡୀ | ରାଜ୍ୟପାଳ ଇଏସଏଲ ନରସିଂହ ଆଜି ତାଙ୍କୁ ପଦ ଓ ଗୋପନୀୟତାର ଶପଥପାଠ କରାଇଛନ୍ତି | ବିଜୟୱାଡାର ଇନ୍ଦିରା ଗାନ୍ଧୀ ମ୍ୟୁନିସିପାଲ ଷ୍ଟାଡିୟମରେ ଆଜି ଶପଥ ନେଇଛନ୍ତି | ତେବେ ଶପଥ ସ୍ଥଳକୁ ପ୍ରବେଶ କରିବା ପୂର୍ବରୁ ଏକ ଖୋଲା ଜିପରେ ଜଗନ ଆସିଥିଲେ ଓ ସମବେତ ଜନତାଙ୍କୁ ନମସ୍କାର କରି ଅଭିବାଦନ ଜଣାଉଥିବାର ଦେଖିବାକୁ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
୧୯୭୨ ମସିହା ଡିସେମ୍ବର ୨୧ ତାରିଖରେ ଆନ୍ଧ୍ରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ରାଜଶେଖର ରେଡ୍ଡୀଙ୍କ ଔରସରୁ ଜନ୍ମଗ୍ରହଣ କରିଥିଲେ। ପୂର୍ବରୁ ଜଗନ କଡପା ଲୋକସଭା ଆସନରୁ ପ୍ରତିନିଧିତ୍ବ କରିଥିଲେ | ଚଳିତ ନିର୍ବାଚନରେ ଓ୍ୱାଇଏସଆର କଂଗ୍ରେସ ବିପୁଳ ବିଜୟ ହାସଲ କରିଥିଲା। ଆନ୍ଧ୍ରପ୍ରଦେଶର ୧୭୫ଟି ବିଧାନସଭା ଆସନରୁ ଓ୍ୱାଇଏସଆର କଂଗ୍ରେସ୧୫୧ଟି ଆସନରେ ବିଜୟ ଲାଭ କରିଥିଲା ।
ବିଧାନସଭା ନିର୍ବାଚନରେ ଜଗନଙ୍କ ପ୍ରତିଦ୍ୱନ୍ଦୀ ଚନ୍ଦ୍ରବାବୁ ନାଇଡୁଙ୍କ ଦଳ ତେଲୁଗୁ ଦେଶମ ପାର୍ଟି ୨୩ଟି ଆସନରେ ସୀମିତ ରହିଯାଇଛି | ସେହିପରି ଲୋକସଭା ନିର୍ବାଚନରେ ମଧ୍ୟ ୨୫ଟି ଆସନରୁ ୨୨ଟି ଆସନ ହାତେଇଛି ଓ୍ୱାଇଏସଆର କଂଗ୍ରେସ | ଜଗନଙ୍କ ଶପଥ ଗ୍ରହଣ ଉତ୍ସବରେ ତେଲେଙ୍ଗାନା ମୁଖ୍ୟମନ୍ତ୍ରୀ କେ ଚନ୍ଦ୍ରଶେଖର ରାଓ ଓ ଡ଼ିଏମକେ ସଭାପତି ଏମକେ ଷ୍ଟାଲିନ ପ୍ରମୁଖ ଯୋଗ ଦେଇଥିଲେ |