ଜେଲ୍‌ରେ ବନ୍ଦ ଥିବା ନେତା କରି ପାରିବେନି ନିର୍ବାଚନୀ ପ୍ରଚାର: ହାଇକୋର୍ଟଙ୍କ ଗୁରୁତ୍ବପୂର୍ଣ୍ଣ ରାୟ

ନୂଆଦିଲ୍ଲୀ: ଜେଲ୍‌ରେ ରାଜନେତାଙ୍କ ନିର୍ବାଚନ ପ୍ରଚାର ସମ୍ପର୍କରେ ଦାଖଲ ହୋଇଥିବା ଜନସ୍ୱାର୍ଥ ମାମଲା (ପିଆଇଏଲ)କୁ ଦିଲ୍ଲୀ ହାଇକୋର୍ଟ ଖାରଜ କରିଛନ୍ତି। ଆଇନ ଛାତ୍ର ଅମରଜିତ ଗୁପ୍ତା ଏକ ପିଟିସନ ଦାଖଲ କରି ଦାବି କରିଥିଲେ ଯେ ଦେଶରେ ଲୋକସଭା ନିର୍ବାଚନ ଚାଲିଛି। ତେଣୁ ଜେଲରେ ଥିବା ନେତାମାନଙ୍କୁ ଭିଡିଓ କନଫରେନ୍ସିଂ ମାଧ୍ୟମରେ ପ୍ରଚାର କରିବାକୁ ଅନୁମତି ଦିଆଯାଉ।

ଯେଉଁଠାରେ ଜଷ୍ଟିସ ମନମୋହନଙ୍କ ନେତୃତ୍ୱରେ ଦିଲ୍ଲୀ ହାଇକୋର୍ଟଙ୍କର ଏକ ବେଞ୍ଚ ଏହାକୁ ‌ମୌଳିକ ନୀତି ବିରୁଦ୍ଧରେ କହି ଆବେଦନକୁ ଖାରଜ କରିଛନ୍ତି। ୧୬ ମାର୍ଚ୍ଚ ୨୦୨୪ ରେ ଏହି ଆବେଦନ କରାଯାଇଥିଲା। ଏହି ରାୟ ପ୍ରଦାନ କରିବାବେଳେ ହାଇକୋର୍ଟ ଆବେଦନକାରୀଙ୍କୁ ତାଙ୍କ ଦାବି ପାଇଁ ତାଗିଦ୍ କରି କହିଥିଲେ ଯଦି ସେପରି କରାଯିବ ତେବେ ଅଣ୍ଡରୱାର୍ଲ୍ଡ ଡନ୍ ଡାୱଦ ଇବ୍ରାହିମ ମଧ୍ୟ ନିର୍ବାଚନ ଲଢ଼ି ପାରିବ।

ଜଷ୍ଟିସ କହିଛନ୍ତି ଯେ ଆବେଦନକାରୀଙ୍କ ଦାବି ଆଶ୍ଚର୍ଯ୍ୟଜନକ। ସେ ଚାହାନ୍ତି ଯେ ଦୋଷୀ ଅପରାଧୀ କିମ୍ବା ନେତାଙ୍କ ମାମଲା କୋର୍ଟରେ ବିଚାରାଧୀନ ଅଛି, ସେମାନଙ୍କୁ ପ୍ରଚାର କରିବାକୁ ଅନୁମତି ଦିଆଯାଉ, କିନ୍ତୁ ସେ ଜାଣନ୍ତି କି ଯଦି ଏହା କରାଯାଏ ତେବେ ଅପରାଧୀମାନେ ନିଜର ରାଜନୈତିକ ଦଳ ଗଠନ କରିବେ। ଏହି ନିର୍ବାଚନରେ ​​ଦାଉଦ ଇବ୍ରାହିମ ମଧ୍ୟ ପ୍ରତିଦ୍ୱନ୍ଦ୍ୱିତା କରିବ। ଜେଲରେ ବସି ନିଜକୁ ପ୍ରଚାର କରିବ। ଯଦି ଏହା ଘଟେ ତେବେ ଗଣତନ୍ତ୍ର ଏବଂ ସମ୍ବିଧାନକୁ ଭୁଲିଯିବାକୁ ପଡ଼ିବ।

ଅନ୍ୟପକ୍ଷରେ ହାଇକୋର୍ଟ କହିଛନ୍ତି ଆବେଦନକାରୀଙ୍କୁ ତାଙ୍କ ଦାବି ପାଇଁ କାହିଁକି ଦଣ୍ଡ ଦିଆଯିବ ନାହିଁ? କାହିଁକି ଆବେଦନକାରୀଙ୍କ ଉପରେ ଜରିମାନା ଲାଗୁ କରାଯିବ ନାହିଁ? ଏହାର ଜବାବରେ ଆବେଦନକାରୀ ଅମରଜିତ ଗୁପ୍ତାଙ୍କ ଓକିଲ କହିଛନ୍ତି ସେ ଜଣେ ଛାତ୍ର ତେଣୁ ତାଙ୍କପ୍ରତି ଦୟା ପ୍ରଦର୍ଶନ କରାଯିବା ଉଚିତ୍। ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ଉଚିତ ନୁହେଁ। ଏହାର ଜବାବରେ ବେଞ୍ଚ ତାଙ୍କୁ ତାଙ୍କ ମହକିଲଙ୍କୁ ସମ୍ବିଧାନ ଅନୁଯାୟୀ ନିୟମ କ’ଣ ଏବଂ ଗଣତନ୍ତ୍ର କ’ଣ ବୁଝାଇବାକୁ କହିଥିଲେ?

ଗଣମାଧ୍ୟମର ରିପୋର୍ଟ ଅନୁଯାୟୀ, ଆଇନ ଛାତ୍ର ଅମରଜିତ୍ ଗୁପ୍ତାଙ୍କ ଦ୍ବାରା ଏକ ଆବେଦନ କରାଯାଇଥିଲା ଯେଉଁଥିରେ ଜେଲ୍‌ରେ ବନ୍ଦଥିବା ଦୋଷୀ ସାବ୍ୟସ୍ତ ହୋଇ ନ ଥିବା ନେତାମାନଙ୍କୁ ଭର୍ଚୁଆଲ୍ ନିର୍ବାଚନ ପ୍ରଚାର କରିବାକୁ ଅନୁମତି ଦିଆଯାଉ। ଆବେଦନକାରୀ ଯୁକ୍ତି ଦର୍ଶାଇଛନ୍ତି ନିର୍ବାଚନ ଆଚରଣ ବିଧି ଲାଗୁ ହେବା ପରେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଗିରଫ କରାଯାଇଛି। ଏହା ଆମ୍ ଆଦମୀ ପାର୍ଟି ପାଇଁ ଅସୁବିଧା ସୃଷ୍ଟି କରିଛି। ହାଇକୋର୍ଟ ପରିସ୍ଥିତିକୁ ଅନୁଧ୍ୟାନ କରିବା ଉଚିତ୍ ଏବଂ ଏଏପିର ଭବିଷ୍ୟତକୁ ଦୃଷ୍ଟିରେ ରଖି ଏକ ଜାତୀୟ ଦଳର ଦାବିକୁ ବିଚାର କରିବା ଉଚିତ୍ ବୋଲି ଆବେଦନରେ ଉଲ୍ଲେଖ କରାଯାଇଥିଲା।