ଜୟରାମ ରମେଶଙ୍କୁ ‘ଚାଇନା ଗୁରୁ’ କହିଲେ ଜୟଶଙ୍କର

ନୂଆଦିଲ୍ଲୀ: ବିଦେଶ ବ୍ୟାପାର ମନ୍ତ୍ରୀ ଏସ୍‌ ଜୟଶଙ୍କର ଆଜି ସଂସଦ‌ରେ ‘ଅପରେସନ୍‌ ସିନ୍ଦୂର’ ଆଲୋଚନାର ନେତୃତ୍ବ ନେବା ସମୟରେ ପ୍ରଭାବଶାଳୀ ଭାଷଣ ଦେଇଛନ୍ତି। ବିରୋଧୀଙ୍କ ପ୍ରବଳ ହୋହଲ୍ଲା ମଧ୍ୟରେ ଆଜି ଜୟଶଙ୍କର ତାଙ୍କ ଭାଷଣ ଜାରି ରଖି କଂଗ୍ରେସକୁ କଡ଼ା ଜବାବ ଦେଇଛନ୍ତି।  ପାକିସ୍ତାନ ଓ ଚୀନ୍‌ ସହ ବୁଝାମଣା ରଖି ସରକାର କାମ କରୁଛନ୍ତି ବୋଲି ନିକଟରେ କଂଗ୍ରେସ ନେତା ରାହୁଲ ଗାନ୍ଧୀ ଦାବି କରିଥିବାବେଳେ ଏହି ପ୍ରସଙ୍ଗରେ ପ୍ରତିକ୍ରିୟା ରଖି ଜୟଶଙ୍କର କହିଛନ୍ତି,  କଂଗ୍ରେସ ଶାସନ ସମୟରେ ନିଆଯାଇଥିବା ନିଷ୍ପତ୍ତି ପାଇଁ ଅନେକ ସମସ୍ୟା ଉପୁଜିଛି।  କଂଗ୍ରେସ ନେତା ଜୟରାମ ରମେଶଙ୍କୁ ‘ଚାଇନା ଗୁରୁ’ କହି ଜୟଶଙ୍କର କଟାକ୍ଷ କରିଛନ୍ତି। ଉପା ଶାସନ ସମୟରେ ଚୀନ୍‌କୁ ରଣନୀତିକ ଭାଗିଦାରୀ କରାଯାଇଥିବା ସେ ଦାବି କରିଛନ୍ତି। ଜୟଶଙ୍କର କହିଛନ୍ତି, ‘ଅନେକ ଚାଇନା ଗୁରୁ ଅଛନ୍ତି। ସେମାନଙ୍କ ମଧ୍ୟରୁ ଜଣେ (ଜୟରାମ ରମେଶ) ମୋ ଆଗରେ ବସିଛନ୍ତି ଯାହାଙ୍କର ଚୀନ୍‌ ପ୍ରତି ଭଲପାଇବା ଏତେ ଅଧିକ ଯେ ସେ  ଚୀନ୍‌ ଏବଂ ଭାରତକୁ ମିଶାଇ ‘ଚିନିଣ୍ଡିଆ’ ଶବ୍ଦ ଉଚ୍ଚାରଣ କରିଥିଲେ। ମୋର ଚୀନ୍‌ ଉପରେ ଜ୍ଞାନ କମ୍‌ ଥାଇପାରେ କାରଣ ମୁଁ ଅଲିମ୍ପିକ୍ସ ଦ୍ବାରା ଚୀନ୍‌ ସଂକ୍ରାନ୍ତରେ ଜାଣିନାହିଁ। କିଛି ଲୋକ ଅଲିମ୍ପିକ୍ସ ସମୟରେ ଚୀନ୍‌ ଗସ୍ତ କରି ଚୀନ୍‌ ସଂକ୍ରାନ୍ତରେ ଜ୍ଞାନ ଆହରଣ କରିଛନ୍ତି।  ତେବେ ସେମାନେ କାହାକୁ ଭେଟିଛନ୍ତି ଏବଂ କେଉଁଥି‌ରେ ଦସ୍ତଖତ କରିଛନ୍ତି ସେନେଇ ଆଲୋଚନା ନହେବା ଉଚିତ।  

ଜୟଶଙ୍କର ପୁଣିଥରେ କହିଛନ୍ତି, ସେମାନେ ସେମାନଙ୍କ ଘରେ ଚୀନ୍‌ ଆମ୍ବାସାଡରଙ୍କଠାରୁ ଟ୍ୟୁସନ୍‌ ନେଉଛନ୍ତି। ‘ଚାଇନା ଗୁରୁ’ କହୁଛନ୍ତି ଯେ ପାକିସ୍ତାନ ଓ ଚୀନ୍‌ ମଧ୍ୟରେ ନିବିଡ଼ ସମ୍ପର୍କ ରହିଛି। ଆମେ ଏସମ୍ପର୍କରେ ଜାଣିଛୁ ଏବଂ ଏହାର ମୁକାବିଲା କରୁଛୁ। ତେବେ ଯାହା ହେଉ ଏହି ସମ୍ପର୍କ ରାତି ଅଧିଆ ହୋଇଗଲା। ଏହାର ଅର୍ଥ ହେଉଛି ଯେ ସେମାନେ ଇତିହାସ ଶ୍ରେଣୀରେ ଶୋଇ ପଡ଼ିଥିଲେ...। ଜୟଶଙ୍କର ସ୍ପଷ୍ଟ କରିଛନ୍ତି ଯେ ପହଲଗାମ ଆତଙ୍କବାଦୀ ଆକ୍ରମଣ ହେବା ଦିନ ତଥା ଏପ୍ରିଲ ୨୨ରୁ ଜୁନ୍‌ ୧୬ ତାରିଖ ମଧ୍ୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ  ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ମଧ୍ୟରେ କୌଣସି ଫୋନ୍‌ କଲ୍‌ ହୋଇନାହିଁ। ରାଜ୍ୟସଭାରେ ବିରୋଧୀଙ୍କୁ ଜୟଶଙ୍କର କହିଛନ୍ତି,  କାନ ଖୋଲି ଶୁଣି ରଖନ୍ତୁ, ସେହି ସମୟ ମଧ୍ୟରେ ଗୋଟିଏ ବି ଫୋନ୍‌କଲ୍‌ ହୋଇନାହିଁ। ଭାରତ-ପାକ୍‌ ଯୁଦ୍ଧବିରତି ପାଇଁ ଟ୍ରମ୍ପ ଶ୍ରେୟ ଦାବି କରିବା ନେଇ ବିରୋଧୀ ଦଳ ନେତାମାନେ ସରକାରଙ୍କୁ ପ୍ରଶ୍ନ କରିଥିବା ବେଳେ ଏହି ସମୟରେ ଜୟଶଙ୍କର ଉକ୍ତ ଟିପ୍ପଣୀ ଦେଇଛନ୍ତି। ଜୟଶଙ୍କର ମଧ୍ୟ ପୂର୍ବ ଦାବି  ଦୋହରାଇ କହିଛନ୍ତି ଯେ ଭାରତ-ପାକ୍‌ ଯୁଦ୍ଧବିରତିରେ କୌଣସି ତୃତୀୟ ପକ୍ଷର ହସ୍ତକ୍ଷେପ ନାହିଁ  ।