ଦୁର୍ଯୋଗ ରେଳ ବିଭାଗର ପିଛା ଛାଡୁନାହିଁ, ଚେନ୍ନାଇରେ ଜନଶତାବ୍ଦୀ ଏକ୍ସପ୍ରେସ୍ ଲାଇନଚ୍ୟୁତ
ଚେନ୍ନାଇ : ବାହାନଗା ରେଳ ଦୁର୍ଘଟଣା ସମଗ୍ର ଦେଶରେ ଚର୍ଚ୍ଚାରେ ଥିବାବେଳେ ରେଳ ବିଭାଗର ଦୁର୍ଯୋଗ ଶେଷ ହେଉନାହିଁ । ଶୁକ୍ରବାର ରାତି ସାଢେ ୨ଟା ସମୟରେ ଚେନ୍ନାଇ ସେଣ୍ଟ୍ରାଲ ଷ୍ଟେସନ ନିକଟରେ ଜନଶତାବ୍ଦୀ ଏକ୍ସପ୍ରେସର ଦୁଇଟି ଚକ ଲାଇନଚ୍ୟୁତ ହୋଇଛି। ତେବେ ଏଥିରେ କେହି ଆହତ ହୋଇନାହାନ୍ତି । ଟ୍ରେନଟି ବିଜୟୱାଡ଼ାରୁ ଆସୁଥିଲା। ଚେନ୍ନାଇ ସେଣ୍ଟ୍ରାଲ ଷ୍ଟେସନରେ ଯାତ୍ରୀଙ୍କୁ ଛାଡ଼ିବା ପରେ ଟ୍ରେନକୁ ବେସିନ୍ ବ୍ରିଜ୍ ୟାର୍ଡକୁ ନିଆଯାଉଥିଲା । ଏହି ସମୟରେ ଦୁଇଟି ଚକ ଲାଇନଚ୍ୟୁତ ହୋଇଥିଲା । ତେବେ ଏହି ଘଟଣାରେ କାହାର କୌଣସି କ୍ଷତି ହୋଇନାହିଁ, କାରଣ ସେତେବେଳେ ଟ୍ରେନରେ କେହି ଯାତ୍ରୀ ନଥିଲେ । ଦୁର୍ଘଟଣାର କାରଣ ସମ୍ପର୍କରେ ରେଳବାଇ ପୁଲିସ ତଦନ୍ତ ଚଳାଇଛି ।
Sambad is now on WhatsApp
Join and get latest news updates delivered to you via WhatsApp
ଏହି ଘଟଣା ସମ୍ପର୍କରେ ସଦର୍ଣ୍ଣ ରେଲଓ୍ବେର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଶୁକ୍ରବାର ରାତି ସାଢେ ୨ଟା ସମୟରେ ଟ୍ରେନଟି ଚେନ୍ନାଇ ସେଣ୍ଟ୍ରାଲ ଷ୍ଟେସନରେ ଯାତ୍ରୀଙ୍କୁ ଛାଡ଼ି ମରାମତି ପାଇଁ ବେସିନ ବ୍ରିଜ୍ ୟାର୍ଡକୁ ଯାଉଥିଲା । ଏହି ସମୟରେ ତାହାର ଦୁଇଟି ଚକ ଲାଇନଚ୍ୟୁତ ହୋଇଥିଲା । ବେସିନ ବ୍ରିଜ ରେଳ ଓ୍ବାର୍କସପର ରେଳ କର୍ମଚାରୀମାନେ ପ୍ରାୟ ଏକ ଘଣ୍ଟା ପରେ ଟ୍ରେନକୁ ପୁଣି ଟ୍ରାକ ଉପରେ ରଖିବା ସହ ତାହାର ଆବଶ୍ୟକ ମରାମତି କରିଥିଲେ ।
ସୂଚନାଯୋଗ୍ୟ ଯେ ଜୁନ ୨ରେ ହୋଇଥିବା ବାହାନଗା ରେଳ ଦୁର୍ଘଟଣା ପରେ ରେଳ ମନ୍ତ୍ରାଳୟ ପକ୍ଷରୁ ରେଳ ଧାରଣଗୁଡ଼ିକର ରକ୍ଷଣାବେକ୍ଷଣ ଉପରେ ଗୁରୁତ୍ବ ଦେବାକୁ ନିର୍ଦ୍ଦେଶ ଦିଆଯାଇଛି ।