ଟୋକିଓ : ଆମେରିକା ସଂସଦ ବାଚସ୍ପତି ନାନ୍ସି ପେଲୋସି ତାଇୱାନ ପରେ ଜାପାନ ଗସ୍ତରେ ଯାଇ ଚୀନ୍ ବିରୋଧୀ ବୟାନ ଦେଇଥିବାରୁ ଏଥିରେ ଚୀନ୍ ଅଧିକ ଉଗ୍ର ହୋଇଉଠିଛି । ତାଇୱାନ ଚାରିପଟେ ବୃହତ୍ତମ ସମରାଭ୍ୟାସ ଆରମ୍ଭ କରିଥିବା ଚୀନ୍ ଜାପାନକୁ ଟାର୍ଗେଟ୍ କରି ୫ଟି ବାଲିଷ୍ଟିକ୍ କ୍ଷେପଣାସ୍ତ୍ର ମାଡ଼ କରିଛି। ଜାପାନର ସ୍ବତନ୍ତ୍ର ଅର୍ଥନୈତିକ ଜୋନ୍ ଅଞ୍ଚଳରେ ଏହି କ୍ଷେପଣାସ୍ତ୍ର ମାଡ଼ ହୋଇଥିବା ଜାପାନ ଅର୍ଥମନ୍ତ୍ରୀ ଗଣମାଧ୍ୟମକୁ ସୂଚନା ଦେଇଛନ୍ତି। ଚୀନ୍ର ଏଭଳି ଆକ୍ରମଣର ଜବାବ ଦେବାକୁ ଜାପାନ ପ୍ରସ୍ତୁତ ଅଛି ଏବଂ ଖୁବ୍ଶୀଘ୍ର ଚୀନ୍ ଏହାର ପରିଣାମ ଦେଖିବାକୁ ପାଇବ ବୋଲି ଶୁକ୍ରବାର ଦିନ ଜାପାନ ସ୍ପଷ୍ଟ କରିଦେଇଥିବାରୁ ଏହା ଆଗକୁ ବଡ଼ ଯୁଦ୍ଧର ସଙ୍କେତ ଦେଉଛି ବୋଲି କୁହାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଚୀନ୍ର ନୌବାହିନୀ ଏବଂ ବିମାନବାହିନୀ ଦ୍ବୀପଦେଶ ତାଇୱାନର ଚାରିପଟେ ୬ଟି ଅଞ୍ଚଳରେ ସମରାଭ୍ୟାସ କରିବା ସହ ଜାପାନକୁ ମଧ୍ୟ ଡରାଇବା ପାଇଁ କ୍ଷେପଣାସ୍ତ୍ର ମାଡ଼ କରୁଛନ୍ତି। ଜାପାନ ପ୍ରତିରକ୍ଷା ମନ୍ତ୍ରାଳୟ ଏହି ମିସାଇଲ୍ ଆକ୍ରମଣ ନେଇ ଶୁକ୍ରବାର ଦିନ ଫଟୋ ଜାରି କରିବା ସହ ଯୁଦ୍ଧାଭ୍ୟାସ ଆଳରେ ଚୀନ୍ ସମସ୍ତଙ୍କୁ ଆତଙ୍କିତ ଅବସ୍ଥାରେ ରଖିବାକୁ ଚାହୁଥିବା କହିଛି।
ଚୀନ୍ ପଟୁ ବିପଦ ଆଶଙ୍କା କରି ତାଇୱାନ ମଧ୍ୟ ନିଜ ସେନାକୁ ଜାଗ୍ରତ ରଖିଛି ଏବଂ ଘରୋଇ ପ୍ରତିରକ୍ଷା ଅଭ୍ୟାସ ମଧ୍ୟ କରୁଛି। ତାଇୱାନର ଟ୍ୟାଙ୍କ୍ଗୁଡ଼ିକ ଏବେ ରାସ୍ତାକୁ ଓହ୍ଲାଇଛି। ଆତ୍ମରକ୍ଷା ପାଇଁ ଆମେ ଯେ କୌଣସି ସ୍ତରକୁ ଯାଇପାରିବୁ ବୋଲି ତାଇୱାନ ରାଷ୍ଟ୍ରପତି ସାଇ ଇଂଗ୍ ୱେନ୍ କହିଛନ୍ତି। ଇତିମଧ୍ୟରେ ଆମେରିକା ବି ଏହାର ଅନେକ ଯୁଦ୍ଧଜାହାଜକୁ ସଂଘର୍ଷ ଅଞ୍ଚଳ ଚାରିପଟେ ଠୁଳ କରିଛି। ତାଇୱାନ ପଟକୁ ଲଗାତାର ଗୋଳା ବର୍ଷା କରୁଥିବା ଚୀନ୍ ଏହାକୁ ଯୁଦ୍ଧ ଅଭ୍ୟାସର ନାମ ଦେଇଛି। ତାଇୱାନର ବାଣିଜ୍ୟିକ କାରବାରକୁ ଠପ୍ କରିଦେବା ପାଇଁ ଚୀନ୍ ଏବେ ବିଶାଳ ଘେରାବନ୍ଦୀ କରିଥିବାରୁ ଏହାର ମୁକାବିଲା କିଭଳି କରିହେବ ସେ ନେଇ ତାଇୱାନ ମିତ୍ର ରାଷ୍ଟ୍ରମାନେ ଚିନ୍ତାରେ ଅଛନ୍ତି।