ଫାରୁକ ଓ ମେହେବୁବାଙ୍କ ଭଳି ଦେଶଭକ୍ତ କେହି ନାହାନ୍ତି: ବିରୋଧୀ ଦଳ ରାଷ୍ଟ୍ରପତି ପ୍ରାର୍ଥୀ ଯଶବନ୍ତ ସିହ୍ନା

ଶ୍ରୀନଗର: ବିରୋଧୀ ଦଳର ରାଷ୍ଟ୍ରପତି ପ୍ରାର୍ଥୀ ଯଶବନ୍ତ ସିହ୍ନା ଆଜି କହିଛନ୍ତି ଯେ ଯଦି ସେ ରାଷ୍ଟ୍ରପତି ଭାବେ ନିର୍ବାଚିତ ହୁଅନ୍ତି ତେବେ ସେ କଶ୍ମୀର ସମସ୍ୟାର ସ୍ଥାୟୀ ସମାଧାନ କରିବାକୁ ଏବଂ ଏହି ଅଞ୍ଚଳରେ ଶାନ୍ତି ଫେରାଇ ଆଣିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରିବେ। ଜୁଲାଇ ୧୮ରେ ନିର୍ବାଚନ ପୂର୍ବରୁ ସମର୍ଥନ ହାସଲ ପାଇଁ ସିହ୍ନା ଶ୍ରୀନଗରରେ ପହଞ୍ଚିଥିଲେ । ଆଉ ଏଠାରେ ସେ ଜମ୍ମୁକଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍ ଅବଦୁଲ୍ଲା ଏବଂ ମେହବୁବା ମୁଫତିଙ୍କୁ ଭେଟିଥିଲେ | ଏହି ଅବସରରେ ସେ କହିଛନ୍ତି ଯେ ଯଦି ମୁଁ ରାଷ୍ଟ୍ରପତି ଭାବେ ନିର୍ବାଚିତ ହୁଏ ତେବେ ମୋର ପ୍ରାଥମିକତା ହେବ ଯେ କଶ୍ମୀର ସମସ୍ୟାର କିଭଳି ସ୍ଥାୟୀ ସମାଧାନ ହେବ |

ଜମ୍ମୁକଶ୍ମୀରରେ ଶାନ୍ତି, ନ୍ୟାୟ, ଗଣତନ୍ତ୍ର ଏବଂ ବିକାଶ ପ୍ରତିଷ୍ଠା କରାଇବା ମୂଳ ଲକ୍ଷ୍ୟ ହେବ । ସେହିପରି ଯଶବନ୍ତ ଜମ୍ମୁକଶ୍ମୀରର ପୂର୍ବତନ ମୁଖ୍ୟମନ୍ତ୍ରୀ ଫାରୁକ୍ ଅବଦୁଲ୍ଲା ଏବଂ ମେହବୁବା ମୁଫତିଙ୍କୁ ପ୍ରଶଂସା କରି କହିଛନ୍ତି ଯେ ଏହି ଦୁଇ ନେତାଙ୍କ ଭଳି ଦେଶରେ କୌଣସି ଦେଶପ୍ରେମୀ ନାହାଁନ୍ତି। ସିହ୍ନା କହିଛନ୍ତି, ‘ଫାରୁକ୍ ସାହାବ, ମେହବୁବା ଜି ସମେତ ଏଠାରେ ଉପସ୍ଥିତ ଆମର ସମସ୍ତ ଲୋକଙ୍କ ଭଳି ଦେଶପ୍ରେମୀ ଦେଶରେ ନାହାଁନ୍ତି।

ଯଦି ସେମାନେ ଦେଶପ୍ରେମୀ ନୁହଁନ୍ତି, ତେବେ ଦେଶ ପ୍ରତି ଦେଶପ୍ରେମ ଦାବି କରିବାର ଅଧିକାର ଆମର ନାହିଁ। ସିହ୍ନା କହିଛନ୍ତି ଯେ ମୁଁ ମୋର ରାଷ୍ଟ୍ରପତି ନିର୍ବାଚନ ପ୍ରଚାର ପାଇଁ ଏଠାକୁ ଆସିଛି। ଜମ୍ମୁକଶ୍ମୀରରେ ସବୁକିଛି ସ୍ୱାଭାବିକ ବୋଲି ଯେଉଁ ଚିତ୍ର ସାରା ଦେଶ ସାମ୍ନାରେ ଉପସ୍ଥାପନ କରାଯାଉଛି ତାହା ନକଲି | ଯେଉଁ ଚିତ୍ର ଦେଖାଯାଉଛି ତାହା ବାସ୍ତବତାଠାରୁ ଭିନ୍ନ। ସୂଚନା ଥାଉ କି ଜୁଲାଇ ୧୮ରେ ରାଷ୍ଟ୍ରପତି ନିର୍ବାଚନ ହେବାକୁ ଥିବାବେଳେ ଭୋଟ୍ ଗଣନା ଜୁଲାଇ ୨୧ ରେ ହେବ। କୋବିନ୍ଦଙ୍କ କାର୍ଯ୍ୟକାଳ ଜୁଲାଇ ୨୪ରେ ଶେଷ ହେବ, ଏହା ପରେ ଜୁଲାଇ ୨୫ରେ ନୂତନ ରାଷ୍ଟ୍ରପତି ଶପଥ ଗ୍ରହଣ କରିବେ।