କୌଣସି ପରିସ୍ଥିତିରେ ଏନଡିଏର ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ଆମେ ସମର୍ଥନ କରିବୁ ନାହିଁ: ଆରଜେଡି
ପଟନା: ରାଷ୍ଟ୍ରପତି ନିର୍ବାଚନରେ ନ୍ୟାସନାଲ ଡେମୋକ୍ରାଟିକ୍ ଆଲାଇନ୍ସ (ଏନଡିଏ)ର ପ୍ରାର୍ଥୀ ଦ୍ରୌପଦୀ ମୁର୍ମୁ ମଙ୍ଗଳବାର ବିହାରରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଭେଟିଛନ୍ତି। ବିଭିନ୍ନ ଏନଡିଏ ନେତାଙ୍କ ସହ ମୁର୍ମୁଙ୍କ ସାକ୍ଷାତ ପଟନାର ମୌର୍ଯ୍ୟ ହୋଟେଲରେ ଦୀର୍ଘ ସମୟ ଧରି ଚାଲିଥିଲା। ଏହା ପରେ ମୁଖ୍ୟମନ୍ତ୍ରୀ ନୀତୀଶ କହିଥିଲେ ଯେ ଦ୍ରୌପଦୀ ମୁର୍ମୁ ରାଷ୍ଟ୍ରପତି ନିର୍ବାଚନରେ ବିପୁଳ ଭୋଟ୍ ପାଇ ଜିତିବେ ବୋଲି ତାଙ୍କର ସମ୍ପୂର୍ଣ୍ଣ ବିଶ୍ୱାସ ଅଛି । କିନ୍ତୁ ଆରଜେଡି ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବ ନାହିଁ ବୋଲି ସ୍ପଷ୍ଟ କରିଛି। କୌଣସି ପରିସ୍ଥିତିରେ ଏନଡିଏର ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କୁ ସମର୍ଥନ କରିବ ନାହିଁ ବୋଲି କହିଛି ଆରଜେଡି।
Sambad is now on WhatsApp
Join and get latest news updates delivered to you via WhatsApp
ଏହାର କାରଣ ଦର୍ଶାଇ ରାଷ୍ଟ୍ରିୟ ଜନତା ଦଳର ବିହାର ରାଜ୍ୟ ଅଧ୍ୟକ୍ଷ ଜଗଦାନନ୍ଦ ସିଂ କହିଛନ୍ତି ଯେ ଆମର ଏବଂ ବିଜେପିର ବିଚାରଧାରା ଭିନ୍ନ। ସେମାନେ ଦେଶରେ ସାମ୍ପ୍ରଦାୟିକ ହିଂସା ବିସ୍ତାର କରୁଛନ୍ତି ଏବଂ ଆମେ ଧର୍ମାନ୍ଧମାନଙ୍କ ଉପରେ କଟକଣା ଲଗାଉଛୁ। ବର୍ତ୍ତମାନର ସରକାର ଦେଶର ସମସ୍ତ ସାମ୍ବିଧାନିକ ପ୍ରତୀକକୁ ନଷ୍ଟ କରି ଦେଇଛନ୍ତି। ତେଣୁ ତାଙ୍କ ବିଚାରଧାରା ସହିତ ଯିବାର ପ୍ରଶ୍ନ ଉଠୁ ନାହିଁ।
ଉଲ୍ଲେଖଯୋଗ୍ୟ, ଦ୍ରୌପଦୀ ମୁର୍ମୁ ସୋମବାର ଝାଡଖଣ୍ଡରେ ଥିଲେ ଏବଂ ଝାଡଖଣ୍ଡ ମୁକ୍ତି ମୋର୍ଚ୍ଚାର ଅଧ୍ୟକ୍ଷ ଶିବୁ ସୋରେନ ଏବଂ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଭେଟି ତାଙ୍କ ସମର୍ଥନ ଲୋଡିଥିଲେ। ମଙ୍ଗଳବାର ଦିନ ସେ ପଟନା ଗସ୍ତରେ ଆସି ପଟନାର ହୋଟେଲ ମୌର୍ଯ୍ୟରେ ମୁଖ୍ୟମନ୍ତ୍ରୀ ନୀତୀଶ କୁମାରଙ୍କୁ ଭେଟିଥିଲେ। ମୁର୍ମୁଙ୍କୁ ଭେଟିବା ପରେ ମୁଖ୍ୟମନ୍ତ୍ରୀ ନୀତୀଶ ଉପସ୍ଥିତ ସାମ୍ବାଦିକମାନଙ୍କୁ କହିଥିଲେ ଯେ, ଦ୍ରୌପଦୀ ମୁର୍ମୁ ବିପୁଳ ଭୋଟ୍ ସହିତ ରାଷ୍ଟ୍ରପତି ଭାବରେ ନିର୍ବାଚିତ ହେବେ ବୋଲି ଜାଣିଛି।