ଭାରତରେ ଉତ୍ପାଦନ ହେବ ଜନସନ ଏଣ୍ଡ ଜନସନର କରୋନା ଟିକା, କ୍ବାଡ୍ ମେଣ୍ଟର ଗୁରୁତ୍ବପୂର୍ଣ୍ଣ ନିଷ୍ପତ୍ତି
ନୂଆଦିଲ୍ଲୀ : କରୋନା ଟିକା ଉତ୍ପାଦନ ଓ ଯୋଗାଣ ପାଇଁ ଆଗେଇ ଆସିଛି ଭାରତ-ଆମେରିକା-ଜାପାନ ଓ ଅଷ୍ଟ୍ରେଲିଆକୁ ନେଇ ଗଠିତ କ୍ବାଡ୍ ସଂଗଠନ । ଆଜି ଆରମ୍ଭ ହୋଇଥିବା ପ୍ରଥମ କ୍ବାଡ୍ ସମ୍ମିଳନୀରେ ଏହି ଗୁରୁତ୍ବପୂର୍ଣ୍ଣ ନିଷ୍ପତ୍ତି ନିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
ନିଆଯାଇଥିବା ନିଷ୍ପତ୍ତି ଅନୁସାରେ ଆମେରିକାର ଜନସନ୍ ଏଣ୍ଡ ଜନସନ୍ କମ୍ପାନି ଦ୍ବାରା ବିକଶିତ ଏକକ ଡୋଜ୍ କରୋନା ଟିକା ଭାରତରେ ଉତ୍ପାଦନ କରାଯିବ । ଏଥିପାଇଁ ଆମେରିକା ଓ ଜାପାନ ପାଣ୍ଠି ଯୋଗାଇବେ । ଏହି ଟିକାକୁ ଅଷ୍ଟ୍ରେଲିଆ ପକ୍ଷରୁ ଦକ୍ଷିଣ-ପୂର୍ବ ଏସିଆ ଓ ପ୍ରଶାନ୍ତ ମହାସାଗରୀୟ ଦେଶମାନଙ୍କୁ ଯୋଗାଇ ଦିଆଯିବ।
ଭର୍ଚୁଆଲ ମାଧ୍ୟମରେ ଆୟୋଜିତ ଆଜିର କ୍ବାଡ୍ ବୈଠକରେ ଆମେରିକା ରାଷ୍ଟ୍ରପତି ଜୋ ବାଇଡେନ, ଜାପାନ ପ୍ରଧାନମନ୍ତ୍ରୀ ୟୋସିହିଡେ ସୁଗା, ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ସ୍କଟ୍ ମରିସନ ଯୋଗଦେଇଥିଲେ । ରାଷ୍ଟ୍ରପତିଭାବେ ଦାୟିତ୍ବ ଗ୍ରହଣ କରିବା ପରେ ଏହା ହେଉଛି ବାଇଡେନଙ୍କ ଦ୍ବିତୀୟ ଉଚ୍ଚସ୍ତରୀୟ ବହୁରାଷ୍ଟ୍ରୀୟ ସମ୍ମିଳନୀ । ପୂର୍ବରୁ ସେ ଜି-୭ ସମ୍ମିଳନୀରେ ଯୋଗଦେଇଥିଲେ ।
ବିଶ୍ବରେ ବଢିଚାଲିଥିବା ଚୀନର ଆଧିପତ୍ୟକୁ ରୋକିବାକୁ ଏହି କ୍ବାଡ୍ ରଣନୈତିକ ମେଣ୍ଟ ଗଠନ କରାଯାଇଛି । ଗତ ୨୦୧୭ରେ ଏହି ମେଣ୍ଟର ପରିକଳ୍ପନା କରାଯାଇଥିଲା । ଏହି ମେଣ୍ଟର ବଢିଚାଲିଥିବା ପ୍ରଭାବ ଚୀନକୁ ଚିନ୍ତାରେ ପକାଇଦେଇଛି । ଚୀନ ଓ ଋଷିଆ ଏହାକୁ ଏସୀୟ ନ୍ୟାଟୋ ବୋଲି କହୁଛନ୍ତି ।