ଜୁଲାଇ ଶେଷ ସପ୍ତାହରେ ଭଲ ବର୍ଷା ହେବା ଯୋଗୁଁ ବୃଷ୍ଟିପାତ ନିଅଣ୍ଟ ପରିମାଣ ୧୧%କୁ ହ୍ରାସ , ଅଗଷ୍ଟରେ ଭଲ ବର୍ଷା ସମ୍ଭାବନା
ନୂଆଦିଲ୍ଲୀ : ଦେଶରେ ଚଳିତ ବର୍ଷ ଦେଖାଦେଇଥିବା ନିଅଣ୍ଟିଆ ବୃଷ୍ଟିପାତ ପରିସ୍ଥିତିରେ ଉନ୍ନତି ଦେଖାଦେଇଛି । ଏହା ଫଳରେ ଉଭୟ ସରକାର ଓ ଚାଷୀମାନଙ୍କ ମୁଣ୍ଡବ୍ୟଥା କିଛିଟା ଦୂର ହୋଇଛି ।
Sambad is now on WhatsApp
Join and get latest news updates delivered to you via WhatsApp
ଜୁନ ମାସ ଶେଷ ସୁଦ୍ଧା ସାରା ଦେଶରେ ହୋଇଥିବା ବୃଷ୍ଟିପାତ ସ୍ୱାଭାବିକଠାରୁ ୩୫ ପ୍ରତିଶତ କମ ରହିଥିବାବେଳେ ଜୁଲାଇ ଶେଷସୁଦ୍ଧା ଏହି ନିଅଣ୍ଟ ପରିମାଣ ୧୧ ପ୍ରତିଶତକୁ ହ୍ରାସ ପାଇଛି । ଜୁଲାଇ ମାସର ପ୍ରଥମଭାଗରେ ଅଳ୍ପ କିଛି ଅଞ୍ଚଳକୁ ଛାଡିଦେଲେ ସାରା ଦେଶରେ ଭଲ ବୃଷ୍ଟିପାତ ହୋଇଥିବାରୁ ଜୁନ ମାସର ନିଅଣ୍ଟିଆ ପରିସ୍ଥିତିରେ ଉନ୍ନତି ଦେଖାଦେଇଥିଲା । କିନ୍ତୁ ଜୁଲାଇମାସର ୨ୟ ସପ୍ତାହରେ ମୌସୁମୀ ହଠାତ୍ ଉଭାନ ହୋଇଯିବାରୁ ପୁଣି ନିଅଣ୍ଟ ପରିମାଣ ବଢିଯାଇଥିଲା ।
ତେବେ ଜୁଲାଇ ୩ୟ ଓ ୪ର୍ଥ ସପ୍ତାହରେ ଭଲ ବର୍ଷା ହେବାରୁ ସ୍ଥିତିରେ ପୁଣି ଉନ୍ନତି ଦେଖାଦେଇଛି । ଜୁଲାଇ ଶେଷ ସୁଦ୍ଧା ବୃଷ୍ଟିପାତ ସ୍ୱାଭାବିକଠାରୁ ପ୍ରାୟ ୧୧ ପ୍ରତିଶତ କମ ରହିଛି, ଯାହାକି ପାଣିପାଗ ବିଭାଗର ପୂର୍ବାନୁମାନ ସହ ମେଳ ଖାଉଛି । ତେବେ ଶୁଭ ସୂଚନା ହେଉଛି, ଅଗଷ୍ଟରେ ମଧ୍ୟ ଭଲ ବର୍ଷା ହେବ ବୋଲି ଭାରତୀୟ ପାଣିପାଗ ବିଭାଗର ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି ।