ନୂଆଦିଲ୍ଲୀ: ବାସଭବନରୁ ନଗଦ ଟଙ୍କା ମିଳିବା ମାମଲାରେ ଜଷ୍ଟିସ ଯଶବନ୍ତ ବର୍ମାଙ୍କ ଅଡ଼ୁଆ ବଢ଼ିବାରେ ଲାଗିଛି।  ଏହି ମାମଲାରେ ସୁପ୍ରିମ୍‌କୋର୍ଟଙ୍କ ଆଭ୍ୟନ୍ତରୀଣ ତଦନ୍ତ କମିଟି ବର୍ମାଙ୍କୁ ଦୋଷୀସାବ୍ୟସ୍ତ କରିବା ସହ ତାଙ୍କୁ ବିଚାରପତି ଭାବେ ବହିଷ୍କାର କରିବାପାଇଁ ସୁପାରିସ କରିଥିଲା। ତେବେ ବର୍ମା ଏହି ରିପୋର୍ଟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଆବେଦନ କରିଥିଲେ ମଧ୍ୟ ଆଜି ଶୁଣାଣିରେ କୌଣସି ଆଶ୍ବସ୍ତି ମିଳିନାହିଁ। କୋର୍ଟ ଏ ବାବଦ  ରାୟ  ଆଜି ସଂରକ୍ଷିତ ରଖିଛନ୍ତି। 

Advertisment

‘ପ୍ରଧାନବିଚାରପତିଙ୍କ କାର୍ଯ୍ୟାଳୟ ପୋଷ୍ଟ୍‌ଅଫିସ ନୁହେଁ’
ବର୍ମାଙ୍କୁ ପ୍ରଶ୍ନ: ପ୍ରଥମରୁ ତଦନ୍ତ କମିଟିକୁ କାହିଁକି ବିରୋଧ କରି ନଥିଲେ

ଜଷ୍ଟିସ ଦୀପଙ୍କର ଦତ୍ତ ଏବଂ ଏଜି ମସିହଙ୍କ ଖଣ୍ଡପୀଠରେ ଆଜି ଏହି ମାମଲାର ଶୁଣାଣି ଥିଲା। ଜଷ୍ଟିସ ବର୍ମାଙ୍କ ପାଇଁ ଆଜି କୋର୍ଟରେ ଉପସ୍ଥିତ ଥିବା ବରିଷ୍ଠ ଓକିଲ କପିଲ ସିବଲ ଯୁକ୍ତି ବାଢ଼ିଥିଲେ ଯେ ସୁପ୍ରିମ୍‌କୋର୍ଟଙ୍କ ଇନ୍‌ ହାଉସ୍‌ କମିଟିର ଜଣେ ବିଚାରପତିଙ୍କୁ ବହିଷ୍କାର କରିବା ନେଇ କୌଣସି କ୍ଷମତା ନାହିଁ। କମିଟିର କ୍ଷମତା ଚିଫ୍‌ ଜଷ୍ଟିସ୍‌ଙ୍କୁ ପରାମର୍ଶ ଦେବା ପର୍ଯ୍ୟନ୍ତ ସୀମିତ। ସିବଲ ସମ୍ବିଧାନର ଧାରା ୧୨୪କୁ ଦର୍ଶାଇ ଏହି ଟିପ୍ପଣୀ ଦେଇଛନ୍ତି।  ତେବେ ଏହି ମାମଲାରେ ଆଲୋଚନା ସର୍ବୋଚ୍ଚ ଅଦାଲତର କ୍ଷମତା ପର୍ଯ୍ୟନ୍ତ ଯିବାରୁ ଜଷ୍ଟିସ ଦତ୍ତ ଏହାପରେ କହିଥିଲେ, ‘ଚିଫ୍‌ ଜଷ୍ଟିସ ଅଫିସ୍‌ ଏକ ପୋଷ୍ଟ୍‌ ଅଫିସ ନୁହେଁ।  ନ୍ୟାୟପାଳିକାର ମୁଖ୍ୟ ଭାବେ ତାଙ୍କର ଦେଶପ୍ରତି  କର୍ତ୍ତବ୍ୟ ଅଛି।  ଯଦି କୌଣସି  ବେଆଇନ କାର୍ଯ୍ୟ ସଂପର୍କିତ ପ୍ରସଙ୍ଗ ତାଙ୍କ ନିକଟକୁ ଆସେ ତେବେ ଏହାକୁ ରାଷ୍ଟ୍ରପତି ଏବଂ ପ୍ରଧାନମନ୍ତ୍ରୀଙ୍କ ନିକଟକୁ ପଠାଇବାର କର୍ତ୍ତବ୍ୟ ପ୍ରଧାନବିଚାରପତିଙ୍କର ଅଛି।  

କୋର୍ଟ ଆଜି  ଜଷ୍ଟିସ ବର୍ମାଙ୍କ ଇନ୍‌ ହାଉସ୍‌ ଇନକ୍ବାରି କମିଟି ତଦନ୍ତ ପ୍ରକ୍ରିୟାରେ ସାମିଲ ହେବାକୁ ‌ନେଇ ପ୍ରଶ୍ନ ଉଠାଇଛନ୍ତି।  ‌କୋର୍ଟ କହିଛନ୍ତି, ଜଷ୍ଟିସ ବର୍ମା ଆରମ୍ଭରୁ ଏହାକୁ ବିରୋଧ ନକରି କାହିଁକି ତଦନ୍ତ କମିଟିରେ ହାଜର ହେଉଥିଲେ। ଏହି ପ୍ରସଙ୍ଗରେ ଖଣ୍ଡପୀଠ କହିଛନ୍ତି, ଆପଣଙ୍କ ଆଚରଣ ବିଶ୍ବାସ ଜୁଟାଉନାହିଁ।  ଖଣ୍ଡପୀଠ କହିଛନ୍ତି, ଆଗକୁ ବଢ଼ିବା କିମ୍ବା ନବଢ଼ିବା ଏକ ରାଜନୈତିକ ନିଷ୍ପତ୍ତି କିନ୍ତୁ ନ୍ୟାୟପାଳିକା ସମାଜକୁ ଏକ ବାର୍ତ୍ତା ଦେଉଛି ଯେ ପ୍ରକ୍ରିୟାକୁ ଅନୁକରଣ କରାଯାଉଛି।   ଆଜି ଶୁଣାଣି ସମୟରେ ବରିଷ୍ଠ ଓକିଲ କପିଲ ସିବଲ ଯୁକ୍ତି ବାଢ଼ିଛନ୍ତି ଯେ ତାଙ୍କ ମହକିଲଙ୍କୁ ବହିଷ୍କାର କରିବା ନେଇ କମିଟିର ସୁପାରିସ ସାମ୍ବିଧାନିକ ନିୟମର ଉଲ୍ଳଂଘନ କରିଛି।