କାବୁଲ: ଆତଙ୍କବାଦୀ ଆକ୍ରମଣରେ ପୁଣି ଦୋହଲିଯାଇଛି ଆଫଗାନିସ୍ତାନର ରାଜଧାନୀ କାବୁଲ । ଏକ ଆମ୍ବୁଲାନ୍ସ ଭିତରେ ଥିବା ବୋମା ବିସ୍ଫୋରଣ ହେବାରୁ ପ୍ରାୟ ୯୫ ଜଣ ଲୋକ ନିହତ ହେବା ସହ ୧୫୮ ଜଣ ଆହତ ହୋଇଛନ୍ତି ବୋଲି କହିଛନ୍ତି ଆଫଗାନିସ୍ତାନର ସ୍ୱାସ୍ଥ୍ୟମନ୍ତ୍ରଣାଳୟ ମୁଖପାତ୍ର ଓ୍ଵାଜିତ୍ ମଜରୁହ ।
Sambad is now on WhatsApp
Join and get latest news updates delivered to you via WhatsApp
ଶନିବାରଦିନ କାବୁଲର ଅତି ସୁରକ୍ଷିତ ଅଂଚଳ ମନେକରାଯାଉଥିବା ହାଇ ପିସ୍ କାଉନସିଲ ଅଫିସ ନିକଟରେ ଥିବା ଏକ ପୋଲିସ୍ ଚେକ୍ ପୋଷ୍ଟ ଅଂଚଳରେ ଏହି ବୋମା ବିସ୍ଫୋରଣ ହୋଇଥିଲା । ବୋମାଟି ଉକ୍ତ ଚେକ ପୋଷ୍ଟ ନିକଟରେ ଥିବା ଏକ ଆମ୍ବୁଲାନ୍ସ ଭିତରେ ରଖାଯାଇଥିଲା ।
ଶନିବାରଦିନ ଆଫଗାନିସ୍ତାରେ କାର୍ଯ୍ୟଦିବସ ଥିବାରୁ ଉକ୍ତ ଅଞ୍ଚଳରେ ବେଶ ଗହଳିଚହଳି ଥିଲା । ନିକଟରେ ଏକ ହସପିଟାଲ ଥିବାରୁ ମୃତାହତ ସଂଖ୍ୟା ଆହୁରି ବଢିବାର ଆଶଙ୍କା ରହିଛି । ଆତଙ୍କବାଦୀ ସଂଗଠନ ତାଲିବାନ ଏହି ବୋମା ବିସ୍ଫୋରଣ ପାଇଁ ନିଜକୁ ଦାୟୀ କରିଛି ।
ଆଫଗାନିସ୍ତାନର ଜଣେ ସାଂସଦ ମିରଓ୍ଵାଇଜ୍ ୟାସିନି କହିଛନ୍ତି ଯେ ଆତଙ୍କବାଦୀମାନେ ଆମ୍ବଲାନ୍ସଟିରେ ବୋମା ଖଞ୍ଜି ଉକ୍ତ ହାଇ ସିକ୍ୟୁରିଟି ଜୋନକୁ ପଠାଇଥିଲେ । ଉକ୍ତ ଅଂଚଳରେ ବିଭିନ୍ନ ଦେଶର ଦୂତାବାସ ରହିଛି । ଏଥିରୁ ଜଣାପଡୁଛି ଯେ ତାଲିବାନ ଏକ ବଡ଼ ଧରଣର ଆକ୍ରମଣ ପାଇଁ ପ୍ରସ୍ତୁତି କରିଥିଲା, ଯେଉଁଥିରେ ବିଦେଶୀ ଦୂତାବାସ କର୍ମଚାରୀଙ୍କୁ ଟାର୍ଗେଟ କରାଯାଇଥିଲା ।