ଏୟାର ଇଣ୍ଡିଆ ବିମାନରେ ଆଫଗାନିସ୍ତାନରୁ ଭାରତ ଫେରିଲେ ୧୨୯ ଯାତ୍ରୀ
ନୂଆଦିଲ୍ଲୀ : ଆଫଗାନିସ୍ତାନ ରାଜଧାନୀ କାବୁଲରୁ ଶତାଧିକ ଯାତ୍ରୀଙ୍କୁ ଧରି ଏୟାର ଇଣ୍ଡିଆର ବିମାନ ନୂଆଦିଲ୍ଲୀରେ ଓହ୍ଲାଇଛି। ଏହି ବିମାନରେ ମୋଟ୍ ୧୨୯ ଜଣ ଯାତ୍ରୀ ଭାରତ ଫେରିଛନ୍ତି ଓ ଅଧିକାଂଶ ଭାରତୀୟ ବୋଲି ଜଣାପଡ଼ିଛି । ବିମାନଟି କାବୁଲ ଏୟାରପୋର୍ଟରୁ ଉଡାଣ ଆରମ୍ଭ କରି ଆଜି ସଂଧ୍ୟା ୭.୪୫ରେ ନୂଆଦିଲ୍ଲୀରେ ପହଞ୍ଚିଛି। ଆସନ୍ତାକାଲି ମଧ୍ୟ କାବୁଲ ଓ ନୂଆଦିଲ୍ଲୀ ମଧ୍ୟରେ ଏୟାର ଇଣ୍ଡିଆର ବିମାନ ଚଳାଚଳ ଜାରି ରହିବ। ଏୟାର ଇଣ୍ଡିଆର ଜଣେ ଅଧିକାରୀ ଏହା ପ୍ରକାଶ କରିଛନ୍ତି।
Sambad is now on WhatsApp
Join and get latest news updates delivered to you via WhatsApp
କାବୁଲକୁ ତାଲିବାନ ଦଖଲ କରିନେବା ପରେ ସହରର ସୁରକ୍ଷା ବିପନ୍ନ ହୋଇପଡ଼ିଛି । ଯଦିଓ କାବୁଲ ଏୟାରପୋର୍ଟ ଏବେ ବି ଆମେରିକା ସେନା ଅଧିନରେ ରହିଛି, କିନ୍ତୁ ଆଫଗାନିସ୍ତାନ ଆକାଶ ଅସୁରକ୍ଷିତ ହୋଇପଡ଼ିଥିବାରୁ ବେସାମରିକ ବିମାନ ଚଳାଇବା ବିପଦପୂର୍ଣ୍ଣ ହୋଇପଡ଼ିଛି । ତେବେ ଏୟାର ଇଣ୍ଡିଆ କାବୁଲକୁ ଉଡାଣ ବନ୍ଦ କରିନାହିଁ। ସୋମବାର କାବୁଲ ଓ ଦିଲ୍ଲୀ ମଧ୍ୟରେ ବିମାନ ଚଳାଚଳ କରିବ ବୋଲି ସୂଚନା ରହିଛିି।
ସୂଚନାଯୋଗ୍ୟ, ତାଲିବାନର ଯୋଦ୍ଧାମାନେ ଏବେ ଆଫଗାନିସ୍ତାନ ରାଜଧାନୀ କାବୁଲକୁ ଚାରିପଟୁ ଘେରି ରଖିଛନ୍ତି । କ୍ଷମତା ହସ୍ତାନ୍ତର ପାଇଁ ତାଲିବାନ ଓ ଆଫଗାନ ସରକାରଙ୍କ ମଧ୍ୟରେ ଆଲୋଚନା ଜାରି ରହିଥିବାରୁ ହିଂସା ନ କରିବାକୁ ତାଲିବାନର ନେତୃତ୍ବ ନିଜ ଯୋଦ୍ଧାମାନଙ୍କୁ ନିର୍ଦ୍ଦେଶ ଦେଇଛନ୍ତି ।