ମହିଳା କର୍ମଚାରୀଙ୍କୁ ଧକ୍କା ମାରି କୋଠରିରୁ ବାହାର କରିଲେ ମଧ୍ୟପ୍ରଦେଶର କ୍ୟାବିନେଟ ମନ୍ତ୍ରୀ
ଭୋପାଳ: ମଧ୍ୟପ୍ରଦେଶର କଂଗ୍ରେସ ସରକାରରେ ଥିବା ଜଣେ କ୍ୟାବିନେଟ ମନ୍ତ୍ରୀ ତାଙ୍କ ପାଖକୁ ଅଭିଯୋଗ କରିବାକୁ ଆସିଥିବା ଜଣେ ମହିଳା କର୍ମଚାରୀଙ୍କୁ ଧକ୍କାମାରି ବାହାର କରି ଦେଇଥିବା ଘଟଣା ଏବେ ରାଜ୍ୟରେ ଚର୍ଚ୍ଚାର ବିଷୟ ହୋଇଛି।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ, ମଧ୍ୟପ୍ରଦେଶର ପଞ୍ଚାୟତରାଜ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ କମଳେଶ୍ୱର ପଟେଲ ରିୱାସ୍ଥିତ ଏକ ହୋଟେଲରେ ସାମ୍ବାଦିକ ସମ୍ମିଳନୀ କରୁଥିବା ବେଳେ ଅଭିଯୋଗ କରିବାକୁ ଆସିଥିବା ଜଣେ ମହିଳାଙ୍କୁ ଧକ୍କା ମାରି ବାହାର କରି ଦେଇଛନ୍ତି । ମନ୍ତ୍ରୀଙ୍କ ସାମ୍ବାଦିକ ସମ୍ମିଳନୀକୁ ନଗର ନିଗମର ସଫେଇ କର୍ମୀ ମୁନ୍ନୀ ପଟେଲ ଅଭିଯୋଗ ଦେବା ପାଇଁ ଯାଇଥିଲେ । ମୁନ୍ନୀଙ୍କୁ ପୂର୍ବରୁ ପାର୍କରେ ଅବସ୍ଥାପିତ କରାଯାଇଥିବା ବେଳେ ଏବେ ତାଙ୍କୁ ସେଠାରୁ ବଦଳି କରି ଦିଆଯାଇଛି । ଏହି ସମସ୍ୟାର ସମାଧାନ ପାଇଁ ମୁନ୍ନୀ ମନ୍ତ୍ରୀଙ୍କୁ ଗୁହାରି କରିବାକୁ ଯାଇଥିଲେ । ଏହାପରେ ଏହି ଘଟଣାର ଭିଡିଓ ସୋସିଆଲ ମିଡିଆରେ ଭାଇରାଲ ହବାରେ ଲାଗିଛି ।
ଏହାକୁ ନେଇ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ କରିଛନ୍ତି । ସେ କମଲନାଥ ସରକାରଙ୍କ ମନ୍ତ୍ରୀଙ୍କ କାର୍ଯ୍ୟଶୈଳୀ ଉପରେ ପ୍ରଶ୍ନ ଉଠାଇଛନ୍ତି । ସେ ଘଟଣାର ଭିଡିଓ ସେଆର୍ କରିବା ସହିତ ଟୁଇଟ କରିଛନ୍ତି,‘ କଂଗ୍ରେସର ବରିଷ୍ଠ ନେତା କ୍ଷମତା ପାଇଁ ପାଗଳ ହୋଇଯାଇଛନ୍ତି । ନାଗରିକମାନଙ୍କ ସମସ୍ୟା ପାଇଁ ତାଙ୍କୁ ନିର୍ବାଚିତ କରାଯାଇଥିବା ବେଳେ, ଏବେ ସେ ଲୋକଙ୍କର ଆଖିରୁ ବାହାରୁ ଥିବା ଲୁହକୁ ଦେଖିପାରୁ ନାହାନ୍ତି ।’
ଏନେଇ ମୁଖ୍ୟମନ୍ତ୍ରୀ କମଲନାଥ ବା ପଞ୍ଚାୟତରାଜ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ କମଳେଶ୍ୱର ପଟେଲ କୌଣସି ଟିପ୍ପଣୀ କରିନଥିବା କୁହାଯାଉଛି।