ଅଦାଲତର ଚେତାବନୀ ପରେ ହାଜର ହେଲେ କଙ୍ଗନା, ମାନହାନି ମାମଲା ସ୍ଥାନାନ୍ତର ପାଇଁ କଲେ ଆବେଦନ

ମୁମ୍ବାଇ: କବି ତଥା ଗୀତିକାର ଜାଭେଦ ଅଖତରଙ୍କ ଦ୍ୱାରା ଅଭିନେତ୍ରୀ କଙ୍ଗନା ରାନାଓ୍ଵତଙ୍କ ବିରୋଧରେ ଆଗତ ହୋଇଥିବା ମାନହାନି ମାମଲାର ଶୁଣାଣି ଆଜି ମେଟ୍ରୋପଲିଟାନ୍‌ ମାଜିଷ୍ଟ୍ରେଟଙ୍କ କୋର୍ଟରେ କରାଯାଇଥିଲା। ଆଜି କରାଯାଇଥିବା ଶୁଣାଣିରେ ବଲିଉଡ ଅଭିନେତ୍ରୀ କଙ୍ଗନା ରାନାଓ୍ଵତ କୋର୍ଟରେ ହାଜର ହେବା ସହ ସେ ମାନହାନି ମାମଲାର ଶୁଣାଣି ଅନ୍ୟ ଏକ କୋର୍ଟରେ କରିବା ପାଇଁ ଆବେଦନ କରିଥିବା କହିଛନ୍ତି।

ମାନହାନି ମାମଲାର ଶୁଣାଣିକୁ ଅନ୍ୟ ଏକ କୋର୍ଟରେ କରାଯିବାକୁ ସେ ମହାନଗର ନିଗମ ମାଜିଷ୍ଟ୍ରେଟଙ୍କ କୋର୍ଟରେ ସ୍ଥାନାନ୍ତର ଆବେଦନ କରିଛନ୍ତି ବୋଲି ରାନାଓ୍ଵତଙ୍କ ଓକିଲ ରିଜୱାନ ସିଦ୍ଦିକି କୋର୍ଟଙ୍କୁ ସୂଚନା ଦେଇଥିଲେ। ସିଦ୍ଦିକି କହିଥିଲେ ଯେ, ସେ ଏହି ମାମଲାର ଶୁଣାଣି କରୁଥିବା କୋର୍ଟ ଉପରୁ ବିଶ୍ୱାସ ହରାଇବା ପରେ ଏଭଳି ସ୍ଥାନାନ୍ତର ଆବେଦନ କରିଛନ୍ତି।

ସିଦ୍ଦିକି ଏହା ମଧ୍ୟ କହିଥିଲେ ଯେ, ଚୋରା ଚାଲାଣ ଏବଂ ଅପରାଧିକ ଧମକ ଅଭିଯୋଗରେ ଅଖତରଙ୍କ ବିରୋଧରେ କଙ୍ଗନା ଏକ ପାଲଟା ଅଭିଯୋଗ ମଧ୍ୟ ଦାଖଲ କରିଛନ୍ତି। ସେ ଅଖତରଙ୍କ ଦ୍ବାରା ଦାଖଲ ହୋଇଥିବା ମୂଳ ଅଭିଯୋଗ ଏବଂ ତାଙ୍କ ଦ୍ବାରା ଦିଆଯାଇଥିବା ପାଲଟା ଅଭିଯୋଗକୁ ସ୍ଥାନାନ୍ତର କରିବାକୁ ଚାହୁଁଛନ୍ତି।

ତେବେ ସ୍ଥାନାନ୍ତର ଆବେଦନ ଉପରେ ଶୁଣାଣି ଅକ୍ଟୋବର ୧ରେ ମୁଖ୍ୟ ମହାନଗର ନିଗମ ମାଜିଷ୍ଟ୍ରେଟଙ୍କ କୋର୍ଟରେ ହେବ। ସ୍ଥାନାନ୍ତର ଆବେଦନ ଉପରେ ନିଷ୍ପତ୍ତି ନିଆଯିବା ପରେ ହିଁ ମୂଳ ଆବେଦନ ଉପରେ ଶୁଣାଣି ହେବ ବୋଲି ଅନ୍ଧେରୀ ମେଟ୍ରୋପଲିଟାନ୍‌ ମାଜିଷ୍ଟ୍ରେଟଙ୍କ କୋର୍ଟ କହିଛନ୍ତି। ନଭେମ୍ବର ୧୫ରେ ଆଗାମୀ ଶୁଣାଣି ହେବ ବୋଲି ଜଣାପଡ଼ିଛି।