ନିର୍ବାଚନ ଜିତିଲେ ବଲିଉଡ୍‌ ଛାଡ଼ିବେ କଙ୍ଗନା

ମଣ୍ଡି: ହିମାଚଳ ପ୍ରଦେଶର ମଣ୍ଡି ଲୋକସଭା ଆସନରୁ ବିଜେପି ପ୍ରାର୍ଥୀ ଭାବେ ନିର୍ବାଚନ ମୈଦାନରେ ଓହ୍ଲାଇଛନ୍ତି ଜଣାଶୁଣା ବଲିଉଡ୍‌ ଅଭିନେତ୍ରୀ କଙ୍ଗନା ରାଣାୱତ୍‌। ତେବେ ରାଜନୀତି ନିମନ୍ତେ ଚାକଚକ୍ୟପୂର୍ଣ୍ଣ ବଲିଉଡ୍‌ ଅଭିନୟ ଜୀବନକୁ ଜଳାଞ୍ଜଳି ଦେବେ ବୋଲି କଙ୍ଗନା ଘୋଷଣା କରିଛନ୍ତି। ଆଜି ଏକ ଜାତୀୟ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ କଙ୍ଗନା କହିଛନ୍ତି ଯେ ଚଳଚ୍ଚିତ୍ର ଦୁନିଆ ଏକ ମିଛ। ସେଠାରେ ସମସ୍ତ ଘଟଣା ଓ ପ୍ରସଙ୍ଗ ମିଛ। ସେମାନେ ଏକ ସମ୍ପୂର୍ଣ୍ଣ ଭିନ୍ନ ପରିବେଶ ସୃଷ୍ଟି କରନ୍ତି। ଏହା ପାଣିଫୋଟକା ଭଳି। ଲୋକଙ୍କୁ ଆକର୍ଷଣ କରିବାକୁ କେବଳ ବାହ୍ୟ ଚାକଚକ୍ୟ ସୃଷ୍ଟି କରାଯାଏ।

ତେବେ ଏଭଳି ବଲିଉଡ୍‌ ଦୁନିଆ ଓ ରାଜନୈତିକ ଜୀବନ ମଧ୍ୟରେ କିଭଳି ଭାରସାମ୍ୟ ରକ୍ଷା କରିବେ ସେହି ପ୍ରଶ୍ନର ଉତ୍ତର ଦେଇ କଙ୍ଗନା କହିଛନ୍ତି ଯେ ସେ ଜଣେ ଆବେଗପୂର୍ଣ୍ଣ ବ୍ୟକ୍ତିତ୍ବର ମହିଳା। ଅଭିନୟ କରିବାକୁ ବଲିଉଡ୍‌ ଯାଇନଥିଲେ। ସେ ପ୍ରଥମେ ଚଳଚ୍ଚିତ୍ରର କାହାଣୀ ଲେଖକ ଭାବେ ନିଜର ବୃତ୍ତିଗତ ଜୀବନ ଆରମ୍ଭ କରିଥିଲେ। ଅଭିନୟ କ୍ଷେତ୍ର ତାଙ୍କୁ ଅସହନୀୟ ବୋଧ ହେଉଛି। ଏହାକୁ ଛାଡ଼ି ସେ ନିର୍ଦ୍ଦେଶନା କିମ୍ବା ପ୍ରୟୋଜନା ଭଳି କାର୍ଯ୍ୟ କରିବେ। ଯଦି ନିର୍ବାଚନରେ ଜିତନ୍ତି ତେବେ ସେ ସମ୍ପୂର୍ଣ୍ଣ ଭାବେ ବଲିଉଡ୍‌ ଛାଡ଼ି ଦେବେ ବୋଲି କହିଛନ୍ତି।