ଦାନ୍ତ ଡାକ୍ତର ହୋଇ କେଶ ପ୍ରତିରୋପଣ କରୁଥିଲେ ଅନୁଷ୍କା, ନେଇଗଲେ୨ନିରୀହଙ୍କ ଜୀବନ

ନୂଆଦିଲ୍ଲୀ: କାନପୁରରେ କେଶ ପ୍ରତିରୋପଣ ପରେ ଦୁଇ ଜଣଙ୍କ ମୃତ୍ୟୁ ହେବା ଖବର କିଛି ଦିନ ହେବ ଚର୍ଚ୍ଚାରେ ରହିଛି। ଦୁହିଁଙ୍କ କେଶ ପ୍ରତିରୋପଣ କରିଥିବା ଡାକ୍ତର ଅନୁଷ୍କା ତିୱାରୀ ଏବେ ଗିରଫ ଡରରେ ଫେରାର ଅଛନ୍ତି। କୁହାଯାଉଛି ଯେ, ଅନୁଷ୍କାଙ୍କର ଏମବିବିଏସ ଡିଗ୍ରୀ ନଥିବା ବେଳେ ସେ ନିଜକୁ ଜଣେ ଚର୍ମରୋଗ ବିଶେଷଜ୍ଞ ବୋଲି କହି କେଶ ପ୍ରତିରୋପଣ ଅସ୍ତ୍ରୋପଚାର କରୁଥିଲେ। ତାଙ୍କ ପାଖରେ କୌଣସି ପ୍ରଶିକ୍ଷିତ ସହାୟକ ମଧ୍ୟ ନଥିଲେ। ଏହି ଘଟଣା ଚର୍ଚ୍ଚାକୁ ଆସିବା ପରଠାରୁ ଅନୁଷ୍କା ତିୱାରୀ ଏବଂ ତାଙ୍କ ସ୍ୱାମୀ ଫେରାର୍ ଥିବା ସାମ୍ନାକୁ ଆସିଛି।

ପୁଲିସ ତଦନ୍ତରୁ ଏହା ଜଣାପଡ଼ିଛି ଯେ, ଅନୁଷ୍କା କେବଳ ବ୍ୟାଚେଲର ଅଫ୍ ଡେଣ୍ଟାଲ୍ ସର୍ଜରୀ (ବିଡିଏସ୍) ପାସ୍ କରିଛନ୍ତି। ଆଇନଗତ ଭାବରେ, ବିଡିଏସ୍ ଡାକ୍ତରମାନେ କେଶ ପ୍ରତିରୋପଣ କରିପାରିବେ ନାହିଁ କିମ୍ବା ନିଜକୁ ଚର୍ମରୋଗ ବିଶେଷଜ୍ଞ କିମ୍ବା ପ୍ଲାଷ୍ଟିକ୍ ସର୍ଜନ ବୋଲି କହିପାରିବେ ନାହିଁ। କୌଣସି ଡିଗ୍ରୀ ନଥାଇ ମଧ୍ୟ ଅନୁଷ୍କା ଜାଣି ଶୁଣି ୨ଜଣକ ଜୀବନ ନେଇଗଲେ ବୋଲି ଏବେ ମୃତକଙ୍କ ପରିବାର ଲୋକ ଦାବି କରିଛନ୍ତି।

କିଛି ମାସ ତଳେ ସହକାରୀ ଯନ୍ତ୍ରୀ ବିନୀତ ଦୁବେଙ୍କ ମୃତ୍ୟୁ ହୋଇଥିଲା। ତାଙ୍କର କେଶ ପ୍ରତିରୋପଣ କରିଥିଲେ ଅନୁଷ୍କା। ତାଙ୍କ ସ୍ତ୍ରୀ ଜୟା ଦୁବେ ଅଭିଯେଗା କରିଥିଲେ ଯେ, ହୋଲି ଛୁଟି ଯୋଗୁଁ, ମୁଁ ମୋର ଦୁଇ ପିଲାଙ୍କ ସହିତ ଗୋଣ୍ଡାରେ ଥିବା ମୋ ମା’ଙ୍କ ଘରକୁ ଯାଇଥିଲି। ଏହି ସମୟରେ, ମାର୍ଚ୍ଚ ୧୨ ତାରିଖରେ, ମୋ ସ୍ୱାମୀ କଲ୍ୟାଣପୁରର ଡାକ୍ତର ଅନୁଷ୍କା ତିୱାରୀଙ୍କଠାରୁ ନିଜର କେଶ ପ୍ରତିରୋପଣ କରିଥିଲେ। ଡାକ୍ତର ନିଜେ ମୋ ସ୍ୱାମୀଙ୍କ ସହ ଫୋନ୍ ଯୋଗେ ଯୋଗାଯୋଗ କରିଥିଲେ। କେଶ ପ୍ରତିରୋପଣ ସମୟରେ, ମୋ ସ୍ୱାମୀଙ୍କ ମୁହଁ ଫୁଲିଗଲା ଏବଂ ତାଙ୍କ ଅବସ୍ଥା ଆହୁରି ଖରାପ ହୋଇଗଲା, ଯାହା ପରେ ଡାକ୍ତର ତାଙ୍କୁ ଅନ୍ୟ ସ୍ଥାନରେ ଚିକିତ୍ସା କରାଇବାକୁ ପରାମର୍ଶ ଦେଇଥିଲେ। ଏହା ଉପରେ ମୋ ଶ୍ୱଶୁର ଘର ଲୋକେ ତାଙ୍କୁ ସର୍ବୋଦୟ ନଗରର ଏକ ବଡ଼ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ, ଯେଉଁଠାରେ ଡାକ୍ତର ତାଙ୍କର ଚିକିତ୍ସା କରିଥିଲେ। କିନ୍ତୁ ଗୁରୁତର ସଂକ୍ରମଣ ଯୋଗୁଁ, ସେ ମାର୍ଚ୍ଚ ୧୫ତାରିଖରେ ମୃତ୍ୟୁବରଣ କରିଥିଲେ। କେଶ ପ୍ରତିରୋପଣ ଠିକ୍ ଭାବରେ ନ ହେବା ଯୋଗୁଁ ତାଙ୍କର ମୃତ୍ୟୁ ହୋଇଥିଲା।