ଚାକିରି ଛାଡିଲେ ପୁଲିସ କମିଶନର, ବିଜେପି ଟିକେଟରେ ଲଢ଼ିବେ ନିର୍ବାଚନ
କନୌଜ: ବିଧାନସଭା ନିର୍ବାଚନ ବିଜ୍ଞପ୍ତି ପ୍ରକାଶ ପୂର୍ବରୁ କାନପୁରର ପୁଲିସ କମିଶନର ଅସୀମ ଅରୁଣ ଚାକିରି ଛାଡିଛନ୍ତି । ସେ ସ୍ବେଚ୍ଛାକୃତ ଅବସର (VRS) ନେଇଛନ୍ତି | ସେ ବିଜେପି ଟିକେଟରେ କନୌଜରୁ ବିଧାନସଭା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ। ଅସୀମ ଅରୁଣ କନୌଜର ହୋଇଥିବାବେଳେ ତାଙ୍କ ପିତା ଶ୍ରୀରାମ ଅରୁଣ ଉତ୍ତରପ୍ରଦେଶ ପୁଲିସର ମହାନିର୍ଦ୍ଦେଶକ ଭାବରେ କାର୍ଯ୍ୟ କରିଥିଲେ । ଉତ୍ତରପ୍ରଦେଶର ଆଇପିଏସ୍ ଅଧିକାରୀଙ୍କ ମଧ୍ୟରେ ଅସୀମ ଅରୁଣଙ୍କ ବେଶ ନାଁ ରହିଛି | ସେ ଏଟିଏସ(ଆଣ୍ଟି ଟେରୋରିଷ୍ଟ ସ୍କ୍ୱାର୍ଡ) ର ଆଇଜି ଥିବାବେଳେ ଆତଙ୍କବାଦୀ ସାଇଫୁଲ୍ଲାକୁ ଏନକାଉଣ୍ଟର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଅନେକ ଆତଙ୍କବାଦୀ ଷଡଯନ୍ତ୍ରକୁ ପଣ୍ଡ କରିଥିବା ଅସୀମ ଏଡିଜି ପଦବୀରେ ପଦୋନ୍ନତି ପାଇବା ପରେ କାନପୁରର ପ୍ରଥମ ପୁଲିସ କମିଶନର ହୋଇଥିଲେ। ସରକାରୀ ସୂତ୍ର ଅନୁଯାୟୀ, ତିନି ଦିନ ପୂର୍ବେ ସେ ସରକାରଙ୍କୁ ଭିଆରଏସ ପାଇଁ ଆବେଦନ କରିଥିଲେ। ଶନିବାର ଦିନ ଆବେଦନ ଗ୍ରହଣ କରାଯିବା ପରେ ସେ ମୁଖ୍ୟମନ୍ତ୍ରୀଙ୍କୁ ଭେଟିଥିଲେ। ଏହା ପରେ ଫେସବୁକରେ ଏକ ଭାବପ୍ରବଣ ବାର୍ତ୍ତା ପୋଷ୍ଟ କରି ସେ ଲେଖିଛନ୍ତି ଯେ, ‘ମୁଁ ଆପଣଙ୍କୁ ଜଣାଇବାକୁ ଚାହୁଁଛି ଯେ ମୁଁ ସ୍ବେଚ୍ଛାକୃତ ଅବସର ପାଇଁ ଆବେଦନ କରିଛି |
କାରଣ ବର୍ତ୍ତମାନ ମୁଁ ଏକ ନୂତନ ଢଙ୍ଗରେ ଦେଶ ତଥା ସମାଜର ସେବା କରିବାକୁ ଚାହୁଁଛି | ମୁଁ ଅତ୍ୟନ୍ତ ଗର୍ବିତ ଅନୁଭବ କରୁଛି ଯେ ଯୋଗୀ ଆଦିତ୍ୟନାଥ ଜୀ ମୋତେ ଭାରତୀୟ ଜନତା ପାର୍ଟିର ସଦସ୍ୟତା ଦେବାକୁ ଯୋଗ୍ୟ ବିବେଚନା କରିଛନ୍ତି। ଚାକିରି ଛାଡିବା ପରେ ଅସୀମ ଅରୁଣ କହିଛନ୍ତି ଯେ କେବଳ ଗୋଟିଏ ଦୁଃଖ ହେଉଛି। ମୋ ଆଲମାରୀର ସବୁଠାରୁ ସୁନ୍ଦର ପୋଷାକ ମୋ ୟୁନିଫର୍ମ ମୁଁ ଆଉ ପିନ୍ଧି ପାରିବି ନାହିଁ’ |