ମସଜିଦ ନିର୍ମାଣ ପାଇଁ ନଷ୍ଟ କରାଯାଇଛି ୩୬ ହଜାର ମନ୍ଦିର: କର୍ଣ୍ଣାଟକର ପୂର୍ବତନ ଉପମୁଖ୍ୟମନ୍ତ୍ରୀ

ବାଙ୍ଗାଲୋର: ମନ୍ଦିର-ମସଜିଦ ବିବାଦକୁ ନେଇ କର୍ଣ୍ଣାଟକର ପୂର୍ବତନ ଉପମୁଖ୍ୟମନ୍ତ୍ରୀ କେ.ଏସ୍ ଇଶ୍ୱରପ୍ପା ଆଜି ଏକ ନୂତନ ବୟାନ ଦେଇଛନ୍ତି। ସେ କହିଛନ୍ତି ଯେ ମସଜିଦ ନିର୍ମାଣ ପାଇଁ ୩୬,୦୦୦ ମନ୍ଦିରକୁ ନଷ୍ଟ କରାଯାଇଛି | ଯେଉଁସବୁ ମନ୍ଦିରକୁ ନଷ୍ଟ କରାଯାଇଛି ସେଗୁଡିକର ଆଇନ ଅନୁଯାୟୀ ପୁନରୁଦ୍ଧାର କରାଯିବ। କର୍ଣ୍ଣାଟକର ବିଜେପି ବିଧାୟକ କହିଛନ୍ତି, “୩୬,୦୦୦ ମନ୍ଦିର ନଷ୍ଟ ହୋଇଯାଇଛି ଏବଂ ଏହା ଉପରେ ମସଜିଦ ନିର୍ମାଣ କରାଯାଇଛି। ସେମାନେ ଅନ୍ୟ ସ୍ଥାନରେ ମସଜିଦ ନିର୍ମାଣ କରନ୍ତୁ ଏବଂ ପ୍ରାର୍ଥନା କରନ୍ତୁ, କିନ୍ତୁ ଆମେ ସେମାନଙ୍କୁ ମନ୍ଦିରରେ ମସଜିଦ ନିର୍ମାଣ କରିବାକୁ ଅନୁମତି ଦେଇ ପାରିବୁ ନାହିଁ। ମୁଁ ଆପଣଙ୍କୁ କହୁଛି, ହିନ୍ଦୁମାନେ ଆଇନଗତ ଭାବରେ ଲଢେଇ କରିବେ। ସମସ୍ତ ୩୬,୦୦୦ ମନ୍ଦିରକୁ ପୁନଃଉଦ୍ଧାର କରାଯିବ । ”

ସୂଚନା ଥାଉ କି ଏପ୍ରିଲ ୨୧ରେ କର୍ଣ୍ଣାଟକରେ ମନ୍ଦିର-ମସଜିଦ ବିବାଦ ସାମ୍ନାକୁ ଆସିଥିଲା, ଯେତେବେଳେ ମାଙ୍ଗାଲୁରୁ ଉପକଣ୍ଠରେ ଥିବା ଏକ ପୁରୁଣା ମସଜିଦ ତଳେ ଏକ ହିନ୍ଦୁ ମନ୍ଦିର ପରି ସ୍ଥାପତ୍ୟ ଡିଜାଇନ୍ ମିଳିଥିଲା। କେତେକ କହିଛନ୍ତି ଯେ ମସଜିଦ ନିର୍ମାଣ ପୂର୍ବରୁ ଉକ୍ତ ସ୍ଥାନରେ ଏକ ମନ୍ଦିର ଥିଲା। ଯାଞ୍ଚ ନହେବା ଯାଏଁ ମରାମତି କାର୍ଯ୍ୟ ବନ୍ଦ କରିବାକୁ ବିଶ୍ୱ ହିନ୍ଦୁ ପରିଷଦର ନେତାମାନେ ଜିଲ୍ଲା ପ୍ରଶାସନକୁ ନିବେଦନ କରିଛନ୍ତି।

ଉଲ୍ଲେଖ ଥାଉ କି ମନ୍ଦିର-ମସଜିଦ ବିବାଦ ଏବେ ତେଲେଙ୍ଗାନାରେ ମଧ୍ୟ ପହଁଚିଯାଇଛି | ତେଲେଙ୍ଗାନାର ରାଜ୍ୟ ବିଜେପି ମୁଖ୍ୟ ବନ୍ଦୀ ସଞ୍ଜୟ ଅଭିଯୋଗ କରିଛନ୍ତି ଯେ ରାଜ୍ୟରେ ଅନେକ ମନ୍ଦିର ଭାଙ୍ଗି ସେମାନଙ୍କ ଉପରେ ମସଜିଦ ନିର୍ମାଣ କରାଯାଇଛି। ଯଦି ଏହି ମସଜିଦଗୁଡ଼ିକ ବର୍ତ୍ତମାନ ଖନନ କରାଯାଏ, ତେବେ ଶିବ ଲିଙ୍ଗ ମିଳିବାର ସମ୍ଭାବନା ଅଛି।

ସମ୍ବନ୍ଧିତ ଖବର