ଡରାଉଛି ସାର୍ସ କୋଭ-୨ର ନୂଆ ଷ୍ଟ୍ରେନ୍, କର୍ଣ୍ଣାଟକରେ ରାତି ୧୦ରୁ ସକାଳ ୬ପର୍ଯ୍ୟନ୍ତ ଲାଗୁ ହେବ ନାଇଟ କର୍ଫ୍ୟୁ
ନୂଆଦିଲ୍ଲୀ: ଡରାଉଛି କରୋନା ଭୂତାଣୁ ବା ସାର୍ସ କୋଭ-୨ର ନୂଆ ଷ୍ଟ୍ରେନ୍ (ବି.୧.୧.୭)। ବ୍ରିଟେନରୁ ଆରମ୍ଭ ହୋଇଥିବା ଏହି ନୂଆ ସଂକ୍ରମଣ ଏବେ ଧୀରେ ଧୀରେ ଅନ୍ୟ ଦେଶକୁ ବ୍ୟାପିବାରେ ଲାଗିଛି। ଭାରତରେ ନୂଆ ଷ୍ଟ୍ରେନ୍ ଦ୍ବାରା ଆକ୍ରାନ୍ତ ହୋଇଥିବା କରୋନା ରୋଗୀଙ୍କୁ ଚିହ୍ନଟ କରାଯିବା ପରେ ଏବେ ସରକାର ସତର୍କ ହେବା ଆରମ୍ଭ କରିଛନ୍ତି। ପୂର୍ବରୁ ମହାରାଷ୍ଟ୍ରରେ ରାତି ୧୧ଟାରୁ ସକାଳ ୬ଟା ପର୍ଯ୍ୟନ୍ତ ନାଇଟ କର୍ଫ୍ୟୁ କରାଯାଇଥିବା ବେଳେ ଏବେ କର୍ଣ୍ଣାଟକ ସରକାର ରାତି ୧୦ଟାରୁ ସକାଳ ୬ଟା ପର୍ଯ୍ୟନ୍ତ ନାଇଟ କର୍ଫ୍ୟୁ ଜାରି କରିଛନ୍ତି। ରାତି ୧୦ଟା ପରେ କୌଣସି ପ୍ରକାରର କାର୍ଯ୍ୟକ୍ରମକୁ ଅନୁମତି ଦିଆଯିବ ନାହିଁ।
Sambad is now on WhatsApp
Join and get latest news updates delivered to you via WhatsApp
ଏହି ନିୟମ ଜାନୁଆରି ୨ତାରିଖ ପର୍ଯ୍ୟନ୍ତ ଲାଗୁ ହେବ। ଏହା ସହ ରାଜ୍ୟକୁ ଆସୁଥିବା ସମସ୍ତ ଅନ୍ତର୍ଜାତୀୟ ଯାତ୍ରୀଙ୍କୁ ଏକ କୋଭିଡ୍-୧୯ର ନେଗେଟିଭ ରିପୋର୍ଟ ନେଇ ଆସିବାକୁ ପଡିବ | ବ୍ରିଟେନରୁ ଆସୁଥିବା ସମସ୍ତ ଯାତ୍ରୀଙ୍କୁ ୭୨ଘଣ୍ଟା ମଧ୍ୟରେ କୋଭିଡ-୧୯ଆରଟି-ପିସିଆର ପରୀକ୍ଷା କରିବାକୁ ପଡିବ ବୋଲି ରାଜ୍ୟ ସରକାର କହିଛନ୍ତି। ଅନ୍ତଃରାଜ୍ୟ ଗାଡ଼ି ଚଳାଚଳ ଉପରେ କୌଣସି ପ୍ରତିବନ୍ଧକ ଲଗାନଯିବା ସହ ଜାନୁୟାରୀ ୧ରୁ ଦଶମ ଶ୍ରେଣୀ ଏବଂ ଦ୍ୱାଦଶ ଶ୍ରେଣୀର ଛାତ୍ରମାନଙ୍କ ପାଇଁ ବିଦ୍ୟାଳୟ ଖୋଲିବ ବୋଲି କର୍ଣ୍ଣାଟକର ସ୍ବାସ୍ଥ୍ୟମନ୍ତ୍ରୀ କହିଛନ୍ତି |
ଭାରତରେ ନୂଆ ଷ୍ଟ୍ରେନ୍ ଦ୍ବାରା ଆକ୍ରାନ୍ତ କରୋନା ରୋଗୀ ଚିହ୍ନଟ ହେବା ପରେ ବିଭିନ୍ନ ରାଜ୍ୟର ସରକାର ଏ ନେଇ ସତର୍କ ହୋଇଛନ୍ତି। ଏହି ୭୦ପ୍ରତିଶତ ଅଧିକ ସଂକ୍ରାମକ ହୋଇଥିବାରୁ ବ୍ରିଟେନ୍ରୁ ଓଡ଼ିଶା ଫେରିଥିବା ଯାତ୍ରୀଙ୍କ ଲାଗି ୧୪ଦିନ ସଙ୍ଗରୋଧରେ ରହିବାକୁ ବାଧ୍ୟତାମୂଳକ କରାଯାଇଛି। କରୋନା ଭୂତାଣୁର ଏହି ନୂଆ ଷ୍ଟ୍ରେନ୍ ପୂର୍ବ ତୁଳନାରେ ଦ୍ରୁତ ଗତିରେ ବ୍ୟାପୁଥିବାରୁ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଏଥିପାଇଁ ଜାରି ନିର୍ଦେଶାବଳୀକୁ କଡ଼ାକଡ଼ି ପାଳନ କରିବା ଲାଗି କୁହାଯାଇଛି। ଏନେଇ ସ୍ବାସ୍ଥ୍ୟ ବିଭାଗ ପକ୍ଷରୁ ଆଜି ବିଏମ୍ସି, କ୍ୟାପିଟାଲ ହସ୍ପିଟାଲ, ଭୁବନେଶ୍ବର, ଝାରସୁଗୁଡ଼ା ବିମାନବନ୍ଦର କର୍ତୃପକ୍ଷ, ଝାରସୁଗୁଡ଼ା ଜିଲ୍ଲାପାଳ ଓ ସିଡିଏମ୍ଓଙ୍କୁ ନିର୍ଦେଶ ଦିଆଯାଇଛି।
ରାଜ୍ୟରେ ଏବେ କରୋନା ସଂକ୍ରମଣ ହ୍ରାସ ପାଇଛି। ଏଭଳି ପରିସ୍ଥିତିରେ ବ୍ରିଟେନ୍ରୁ ଫେରୁଥିବା ଯାତ୍ରୀଙ୍କ ଜରିଆରେ କରୋନା ଭୂତାଣରୁ ନୂଆ ଷ୍ଟ୍ରେନ୍ ଯଦି ଓଡ଼ିଶାକୁ ଆସେ, ତାହାଲେ ରାଜ୍ୟ ପାଇଁ ବିପଦ ସୃଷ୍ଟି କରିପାରେ। ତେଣୁ ଗତ ୧୪ଦିନ ଭିତରେ ଓଡ଼ିଶା ଫେରିଥିଲେ ସ୍ବଘୋଷଣା ଫର୍ମ ବା ସେଲ୍ଫ ଡିକ୍ଲାରେସନ୍ ଦେବାକୁ ହେବ। ୧୪ ଦିନ ପାଇଁ ସଙ୍ଗରୋଧରେ ରହିବା ସହିତ ରାପିଡ୍ ରେସପନ୍ସ ଟିମ୍ ସେମାନଙ୍କର ସ୍ବାସ୍ଥ୍ୟବସ୍ଥା ଉପରେ ନଜର ରଖିବେ। ସଙ୍ଗରୋଧ ରହିବା ସମୟରେ କୌଣସି ବ୍ୟକ୍ତିଙ୍କ ଶରୀରରେ କୌଣସି ଲକ୍ଷଣ ପ୍ରକାଶ ପାଏ, ତାହାଲେ ତାଙ୍କର ଆରଟି-ପିସିଆର ପରୀକ୍ଷା କରାଯିବ। ଯଦି ସଂପୃକ୍ତ ବ୍ୟକ୍ତି ପଜିଟିଭ୍ ଚିହ୍ନଟ ହୁଅନ୍ତି, ତାହାଲେ ସରକାରୀ ସଙ୍ଗରୋଧ ବ୍ୟବସ୍ଥାରେ ରଖାଯିବା ସହ ପ୍ରୋଟୋକଲ ଅନୁସାରେ ଚିକିତ୍ସା କରାଯିବ। ସଂପୃକ୍ତ ବ୍ୟକ୍ତିଙ୍କ ଜିନ୍ ଅନୁଶୀଳନ କରାଯିବ। ଅପରପକ୍ଷରେ ନେଗେଟିଭ୍ ଚିହ୍ନଟ ହେଉଥିବା ବ୍ୟକ୍ତିଙ୍କୁ ୧୪ଦିନ ଲାଗି ଗୃହ ସଙ୍ଗରୋଧରେ ରହିବାକୁ ପଡ଼ିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ କୁହାଯାଇଛି।