ଏକଜିଟ ପୋଲ୍ : କର୍ଣ୍ଣାଟକରେ କଂଗ୍ରେସ ଏକକ ସଂଖ୍ୟାଗରିଷ୍ଠ ଦଳ, ସରକାର ଗଠନରେ ନିର୍ଣ୍ଣାୟକ ଭୂମିକା ନେବ ଜେଡିଏସ୍

ବାଙ୍ଗାଲୋର : କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଭୋଟ ଗ୍ରହଣ ଶେଷ ହୋଇଛି । ଏହି ନିର୍ବାଚନ ଦେଶର ଦୁଇ ପ୍ରମୁଖ ରାଜନୈତିକ ଦଳ ବିଜେପି ଓ କଂଗ୍ରେସ ପାଇଁ ସମ୍ମାନର ପ୍ରଶ୍ନ ହୋଇଯାଇଛି । କର୍ଣ୍ଣାଟକ ପରି ଏକ ବଡ଼ ରାଜ୍ୟକୁ ନିଜ ହାତରେ ରଖିବାକୁ କଂଗ୍ରେସ ଚାହୁଁଥିବାବେଳେ ବିଜେପି ୨୦୧୯ ସାଧାରଣ ନିର୍ବାଚନ ପୂର୍ବରୁ ନିଜ ମନୋବଳକୁ ଦୃଢ କରିବାକୁ ଚାହୁଁଛି । କର୍ଣ୍ଣାଟକର ୨୨୪ଟି ଆସନ ମଧ୍ୟରୁ ଆଜି ୨୨୨ଟିରେ ଭୋଟ ଗ୍ରହଣ ହୋଇଛି । ସଂଧ୍ୟା ୬ଟା ଭୋଟ ଗ୍ରହଣ ଶେଷ ହେବା ପରେ ବିଭିନ୍ନ ଚ୍ୟାନେଲ ପକ୍ଷରୁ ଏକଜିଟ୍‌ ପୋଲ ଫଳାଫଳ ପ୍ରକାଶ ପାଇଛି । ପ୍ରାୟ ଅଧିକାଂଶ ସଂସ୍ଥା ଝୁଲା ବିଧାନସଭା ସଂପର୍କରେ ପୂର୍ବାନୁମାନ କରିଛନ୍ତି ।

ଇଣ୍ଡିଆ ଟୁଡେ-ଆକ୍ସିସ ପକ୍ଷରୁ କଂଗ୍ରେସକୁ ୧୦୬ରୁ ୧୧୮ ସିଟ, ବିଜେପିକୁ ୭୯ ରୁ ୯୨ ସିଟ୍‌ ଓ ଜେଡିଏସ ୨୨ରୁ ୩୦ଟି ସିଟ ପାଇବ ବୋଲି ପୂର୍ବାନୁମାନ କରିଛି । ଅନ୍ୟପକ୍ଷରେ ଟାଇମ୍ସ ନାଓ କଂଗ୍ରେସକୁ ୯୦ରୁ ୧୦୩ ସିଟ, ବିଜେପିକୁ ୮୦ରୁ ୯୩ ସିଟ ଓ ଜେଡିଏସକୁ ୩୫ଟି ସିଟ ମିଳିବ ବୋଲି କହିଛି । ସେହିପରି ରିପବ୍ଲିକ ଟିଭି ବିଜେପିକୁ ୯୫ରୁ ୧୧୪ ସିଟ, କଂଗ୍ରେସକୁ ୭୩ରୁ ୮୨ ସିଟ ଓ ଜେଡିଏସକୁ ୩୨ରୁ ୪୩ ସିଟ ମିଳିବ ବୋଲି ପୂର୍ବାନୁମାନ କରିଛି ।

ଏହା ସ୍ପଷ୍ଟ କରୁଛି ଯେ କର୍ଣ୍ଣାଟକ ବିଧାନସଭାରେ କଂଗ୍ରେସ ଏକକ ସଂଖ୍ୟାଗରିଷ୍ଠ ଦଳ ହେବ ଓ ଭାରତୀୟ ଜନତା ପାର୍ଟି ତା’ପଛକୁ ରହିବ। ତେବେ ୩ୟ ସ୍ଥାନରେ ରହିବ ଜେଡିଏସ୍। ମାତ୍ର ସରକାର ଗଠନରେ ନିର୍ଣ୍ଣାୟକ ଭୂମିକା ନେବ ଜେଡିଏସ୍। କଂଗ୍ରେସ ହେଉକି ବିଜେପି, ସରକାର ଗଠନରେ ସେମାନେ ଜେଡିଏସ୍ ସହ ମେଣ୍ଟ କରିବାକୁ ଏକପ୍ରକାର ବାଧ୍ୟ ହେବେ।