ନୂଆଦିଲ୍ଲୀ: ସାଉଦି ଆରବରେ କର୍ଣ୍ଣାଟକର ଜଣେ ବ୍ୟକ୍ତି ଫେସବୁକରେ ଆପତ୍ତିଜନକ ପୋଷ୍ଟ କରିବାରୁ ଗିରଫ ହୋଇଛନ୍ତି | ଏହି ବ୍ୟକ୍ତିଙ୍କୁ ଗିରଫ କରାଯିବା ପରେ ବିଦେଶ ମନ୍ତ୍ରାଳୟ ସାଉଦି ଆରବ ସରକାରଙ୍କୁ ସ୍ପଷ୍ଟୀକରଣ ମାଗିଛି | ଗିରଫ ହୋଇଥିବା ଏହି ଭାରତୀୟ ଯୁବକଙ୍କ ନାମ ହେଉଛି ହରିଶ ବାଙ୍ଗରା | ତାଙ୍କ ଘର କର୍ଣ୍ଣାଟକର କୁନ୍ଦପୁରରେ ହୋଇଥିବାବେଳେ ସେ ସାଉଦି ଆରବରେ ଦମମ କମ୍ପାନୀରେ କାର୍ଯ୍ୟ କରୁଥିଲେ | ମିଳିଥିବା ସୂଚନା ମୁତାବକ ହରିଶ କିଛି ଦିନ ତଳେ ଫେସବୁକରେ ରାମ ମନ୍ଦିରକୁ ନେଇ ଏକ ପୋଷ୍ଟ କରିଥିଲେ | ସେ ଲେଖିଥିଲେ ଯେ ମକ୍କାରେ ମଧ୍ୟ ରାମ ମନ୍ଦିର ନିର୍ମାଣ ହେବ |
Sambad is now on WhatsApp
Join and get latest news updates delivered to you via WhatsApp
ମକ୍କା ବିଶ୍ୱର ମୁସଲମାନଙ୍କର ଏକ ପବିତ୍ର ସ୍ଥାନ ହୋଇଥିବାରୁ ବିବାଦୀୟ ପୋଷ୍ଟ ପାଇଁ ତାଙ୍କୁ ରବିବାର ଦିନ ଗିରଫ କରାଯାଇଥିବାର କୁହାଯାଇଥିଲା | ହରିଶଙ୍କ ପରିବାର ପକ୍ଷରୁ କୁହାଯାଇଛି ଯେ ହରିଶଙ୍କ ନାମରେ ଦୁଇଟି ଫେସବୁକ ଆକାଉଣ୍ଟ ଥିଲା | ଗୋଟିଏ ଆକାଉଣ୍ଟରେ ସେ ଆକ୍ଟିଭ ରହୁଥିବାବେଳେ ସେଥିରେ ହିଁ ପରିବାରର ସଦସ୍ୟ ଓ ତାଙ୍କର ଫଟୋ ହିଁ ପୋଷ୍ଟ କରନ୍ତି | ଅନ୍ୟ ଆକାଉଣ୍ଟଟି ହରିଶଙ୍କ ନାମରେ ଥିଲେ ବି କେବେ ବି ସେ ବ୍ୟବହାର କରୁନଥିଲେ |
ବ୍ୟବହାର କରାଯାଉନଥିବା ଆକାଉଣ୍ଟରୁ ବିବାଦୀୟ ପୋଷ୍ଟ ହୋଇଥିବାରୁ କେହି ତାଙ୍କୁ ଫସାଇଦେଇଥିବାର ହରିଶଙ୍କ ପରିବାର ସଦସ୍ୟ ଅଭିଯୋଗ କରିଛନ୍ତି | କର୍ଣ୍ଣାଟକ ସରକାରଙ୍କ ପକ୍ଷରୁ କୁହାଯାଇଛି ଯେ କେନ୍ଦ୍ର ସରକାରଙ୍କୁ ଏବାବଦରେ ସମ୍ପୂର୍ଣ୍ଣ ତଥ୍ୟ ଜଣାଇଦିଆଯାଇଛି | କେନ୍ଦ୍ର ସରକାର ଏହା ଉପରେ ନଜର ରଖିଛନ୍ତି | କେନ୍ଦ୍ର ସରକାରଙ୍କ ପକ୍ଷରୁ ସାଉଦି ଆରବରେ ଥିବା ଦୂତାବାସକୁ ରିପୋର୍ଟ ମଧ୍ୟ ମଗାଯାଇଛି |