କଶ୍ମୀର ଭାରତର ଆଭ୍ୟନ୍ତରୀଣ ବ୍ୟାପାର, ଭାରତକୁ ଟାର୍ଗେଟ କରିବାର କୌଣସି ଯୋଜନା ନାହିଁ : ତାଲିବାନ
କାବୁଲ : କଶ୍ମୀର ପ୍ରସଙ୍ଗ ଭାରତର ଆଭ୍ୟନ୍ତରୀଣ ବ୍ୟାପାର । ଅନ୍ୟ ଦେଶର ଆଭ୍ୟନ୍ତରୀଣ ବ୍ୟାପାରରେ ତାଲିବାନ ହସ୍ତକ୍ଷେପ କରିବ ନାହିଁ କିମ୍ବା କଶ୍ମୀରରେ ଚାଲିଥିବା ଆତଙ୍କବାଦରେ ସାମିଲ ହେବ ନାହିଁ ବୋଲି ତାଲିବାନ ସ୍ପଷ୍ଟ କରିଦେଇଛି ।
Sambad is now on WhatsApp
Join and get latest news updates delivered to you via WhatsApp
ଦୁଇଦିନ ତଳେ ସୋସିଆଲ ମିଡିଆରେ ତାଲିବାନ ମୁଖପାତ୍ର ଜବୁହୁଲ୍ଲା ମୁଜାହିଦଙ୍କ ନାଁରେ ଏକ ପୋଷ୍ଟ ପ୍ରକାଶିତ ହୋଇଥିଲା ଯେ କଶ୍ମୀର ସଂମସ୍ୟାର ସମାଧାନ ନହେବା ପର୍ଯ୍ୟନ୍ତ ଭାରତ ସହ ତାଲିବାନର ମିତ୍ରତା ସମ୍ଭବ ନୁହେଁ । ଏହି ପୋଷ୍ଟରେ ଆହୁରି ମଧ୍ୟ କୁହାଯାଇଥିଲା ଯେ କାବୁଲ ଅଧିକାର ପରେ ତାଲିବାନ କଶ୍ମୀର ଅଧିକାର କରିବ ।
କିନ୍ତୁ ଏହି ଲେଖା ଉପରେ ଆଜି ତାଲିବାନର ସ୍ପଷ୍ଟୀକରଣ ଆସିଛି । ତାଲିବାନର ମୁଖପାତ୍ର ସୁହେଲ ସାହିନ କହିଛନ୍ତି ଯେ ଗଣମାଧ୍ୟମରେ ପ୍ରକାଶିତ ଏହି ରିପୋର୍ଟରେ ସତ୍ୟତା ନାହିଁ । କଶ୍ମୀର ପ୍ରସଙ୍ଗ ଭାରତର ଆଭ୍ୟନ୍ତରୀଣ ବ୍ୟାପାର । ଅନ୍ୟ ଦେଶର ଆଭ୍ୟନ୍ତରୀଣ ବ୍ୟାପାରରେ ଇସ୍ଲାମିକ ଏମିରେଟ୍ସ (ତାଲିବାନ ) ହସ୍ତକ୍ଷେପ କରିବ ନାହିଁ କିମ୍ବା କଶ୍ମୀରରେ ଚାଲିଥିବା ଆତଙ୍କବାଦରେ ସାମିଲ ହେବ ନାହିଁ ।
ଏହି ସୋସିଆଲ ମିଡିଆ ପୋଷ୍ଟ ଆସିବା ପରେ ଭାରତ କୂଟନୈତିକ ସ୍ତରରେ ତାଲିବାନ ସହ ଯୋଗାଯୋଗ କରିବା ପରେ ଉକ୍ତ ଖବରକୁ ତାଲିବାନ ଅସ୍ୱୀକାର କରିଥିଲା । ତାହା ତାଲିବାନର ଔପଚାରିକ ଆଭିମୁଖ୍ୟକୁ ପ୍ରକାଶ କରେ ନାହିଁ ବୋଲି ତାଲିବାନ ପକ୍ଷରୁ ଭାରତକୁ କୁହାଯାଇଛି ।