ଆସନ୍ତା ୨୧ ତାରିଖରେ ସୁରଟ ଯିବେ କେଜ୍ରିୱାଲ, କରିପାରନ୍ତି ବଡ ଘୋଷଣା
ଅହମ୍ମଦାବାଦ: ଗୁଜୁରାଟରେ ହେବାକୁ ଥିବା ବିଧାନସଭା ନିର୍ବାଚନ ପାଇଁ ଆମ୍ ଆଦମୀ ପାର୍ଟି ପ୍ରସ୍ତୁତିକୁ ଜୋରଦାର କରିଛି। ଜୁଲାଇ ୨୧ରେ ଆମ ଆଦମୀ ପାର୍ଟି ବା ଆପର ଜାତୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗୁଜରାଟର ସୁରଟ ଗସ୍ତ କରିବେ। ଏହି ସମୟରେ ଗୁଜୁରାଟର ଲୋକଙ୍କ ପାଇଁ କେଜ୍ରିୱାଲ ପ୍ରଥମ ଗ୍ୟାରେଣ୍ଟି ଘୋଷଣା କରିବେ। ବାସ୍ତବରେ ପଞ୍ଜାବରେ ସରକାର ଗଠନ କରିବା ପରେ ଆମ୍ ଆଦମୀ ପାର୍ଟି ଏବେ ଅନ୍ୟ ରାଜ୍ୟରେ ସରକାର ଗଠନ ପାଇଁ ପ୍ରୟାସକୁ ଜୋରଦାର କରିଛି | ଗୁଜୁରାଟ ଏବଂ ରାଜସ୍ଥାନରେ ଆପ ସରକାର ଗଠନ ପାଇଁ ଦଳ ସମ୍ପୂର୍ଣ୍ଣ ପ୍ରସ୍ତୁତି ଚଳାଇଛି। ଏଥିପାଇଁ ଆପ ନେତାମାନେ କ୍ରମାଗତ ଭାବରେ ‘ଦିଲ୍ଲୀ ମଡେଲ’କୁ ଜନସାଧାରଣଙ୍କ ନିକଟରେ ଉପସ୍ଥାପନ କରୁଛନ୍ତି |
Sambad is now on WhatsApp
Join and get latest news updates delivered to you via WhatsApp
ଏହି କ୍ରମରେ ଅରବିନ୍ଦ କେଜ୍ରିୱାଲ ସୁରଟ ଗସ୍ତରେ ଯାଉଛନ୍ତି। କୁହାଯାଉଛି ଯେ ଏଥର କେଜ୍ରିୱାଲ ଗୁଜୁରାଟବାସୀଙ୍କ ନିକଟରେ କିଛି ବଡ଼ ପ୍ରତିଶୃତି ଘୋଷଣା କରିପାରନ୍ତି | ସୂଚନା ଥାଉ କି ଯେ ଗତ ମାସରେ ଗୁଜୁରାଟ ବିଧାନସଭା ନିର୍ବାଚନ ପାଇଁ ଆମ୍ ଆଦମୀ ପାର୍ଟି ୬୦୯୮ ଜଣ ପଦାଧିକାରୀଙ୍କ ନାମ ଘୋଷଣା କରିଥିଲା। ପଦାଧିକାରୀଙ୍କ ତାଲିକାରେ ରାଜ୍ୟ ସ୍ତରରେ ୧୪୮ ଜଣ, ଲୋକସଭା ସ୍ତରରେ ୫୩ ଜଣ, ଜିଲ୍ଲା କମିଟିରେ ୧୫୦୯ ଜଣ ଏବଂ ବିଧାନସଭା ସ୍ତରରେ ୪୪୮୮ ଜଣ କର୍ମଚାରୀ ନିଯୁକ୍ତ ହୋଇଥିଲେ।
ଏହାପୂର୍ବରୁ ଗୁଜୁରାଟ ଗସ୍ତରେ ଆସିଥିବା କେଜ୍ରିୱାଲ ଦିଲ୍ଲୀ ଏବଂ ପଞ୍ଜାବର ମଡେଲକୁ ଦେଖି ଆପକୁ ଭୋଟ୍ ଦେବାକୁ ଜନସାଧାରଣଙ୍କୁ ନିବେଦନ କରିଥିଲେ। ଗୁଜୁରାଟର ଲୋକଙ୍କୁ ମାଗଣାରେ ବିଦ୍ୟୁତ୍, ମାଗଣା ଶିକ୍ଷା ଏବଂ ଉତ୍ତମ ସ୍ୱାସ୍ଥ୍ୟ ସେବା ପାଇଁ କେଜ୍ରିୱାଲ ପ୍ରତିଶୃତି ଦେଇଥିଲେ। ଏହା ସହିତ ସେ ବିଜେପି ଏବଂ କଂଗ୍ରେସ ଉପରେ କ୍ଷୁଵଧ ଲୋକଙ୍କୁ ମଧ୍ୟ ଆପରେ ଯୋଗଦେବାକୁ ନିବେଦନ କରିଥିଲେ।