କେଜ୍ରିୱାଲଙ୍କ ନୂଆ ରାଜନୈତିକ ଗୋଟି ଚାଳନା: ଜନତା ଅଦାଲତରେ ସମସ୍ତଙ୍କୁ ପ୍ରଶ୍ନ ପଚାରିବେ

ନୂଆଦିଲ୍ଲୀ: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ତଥା ଆମ୍ ଆଦମୀ ପାର୍ଟିର ଜାତୀୟ ସଂଯୋଜକ ଅରବିନ୍ଦ କେଜ୍ରିୱାଲ ଅକ୍ଟୋବର ୬ ରେ ଛତ୍ରସାଲ ଷ୍ଟାଡିୟମରେ 'ଜନତା କି ଅଦାଲତ' ଆୟୋଜନ କରିବେ। ଏହାପୂର୍ବରୁ ସେପ୍ଟେମ୍ବର ୨୨ରେ ସେ ଜନ୍ତର ମନ୍ତରଠାରେ ମଧ୍ୟ ଏହାର ଆୟୋଜନ କରିଥିଲେ। ଏହି ସୂଚନା ଆମ୍ ଆଦମୀ ପାର୍ଟି ଦ୍ୱାରା ପ୍ରଦାନ କରାଯାଇଛି। ଗତ 'ଜନତା କି ଅଦାଲତ'ରେ କେଜ୍ରିୱାଲ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ କେନ୍ଦ୍ର ସରକାରଙ୍କ ଉପରେ ପ୍ରଶ୍ନ ଉଠାଇଥିଲେ। ଏଭଳି କରି କେଜ୍ରିୱାଲ ନୂଆ ରାଜନୈତିକ ଗୋଟି ଚାଳନା ଆରମ୍ଭ କରିଛନ୍ତି।

ସେ ରାଷ୍ଟ୍ରୀୟ ସ୍ବୟଂସେବକ ସଂଘ (ଆରଏସଏସ) ମୁଖ୍ୟ ମୋହନ ଭାଗବତଙ୍କୁ କିଛି ପ୍ରଶ୍ନ ପଚାରିଥିଲେ। ସେ ପ୍ରଶ୍ନ କରିଥିଲେ ଯେ ବିରୋଧୀ ଦଳ ଭାଙ୍ଗିବା, ସରକାରଗୁଡିକୁ ହଟାଇବା ଏବଂ ଦୁର୍ନୀତିଗ୍ରସ୍ତ ନେତାଙ୍କୁ ସମର୍ଥନ କରିବା ପାଇଁ କେନ୍ଦ୍ରୀୟ ଏଜେନ୍ସି ବ୍ୟବହାର କରି ବିଜେପି ରାଜନୀତି ନେଇ ସଂଘ ସହମତ କି?

ଅନ୍ୟ ଏକ ପ୍ରଶ୍ନରେ କେଜ୍ରିୱାଲ ଭାଗବତଙ୍କୁ ପଚାରିଥିଲେ ଯେ ବିଜେପିରେ ୭୫ବର୍ଷ ବୟସ ପରେ ନେତାଙ୍କ ପାଇଁ ଅବସର ନିୟମ ପ୍ରଯୁଜ୍ୟ। ତେବେ ଏହି ନିୟମ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପାଇଁ ମଧ୍ୟ ପ୍ରଯୁଜ୍ୟ ହେବ କି?

ଏହା ବ୍ୟତୀତ ସେ ବିଜେପି ମୁଖ୍ୟ ଜେପି ନଡ୍ଡାଙ୍କ ବିବୃତ୍ତି ଉପରେ ମଧ୍ୟ ପ୍ରଶ୍ନ କରିଥିଲେ ଯେ ବିଜେପିକୁ ଆଉ ଆରଏସଏସର ଆବଶ୍ୟକତା ନାହିଁ। କେଜ୍ରିୱାଲ ପ୍ରତ୍ୟେକ ଭାରତୀୟଙ୍କ ମନରେ ସୃଷ୍ଟି ହେଉଥିବା ଏହି ପ୍ରଶ୍ନଗୁଡ଼ିକୁ ପଚାରିଥିଲେ ଏବଂ ଭାଗବତ ଏହାର ବିଚାର କରିବେ ବୋଲି ଆଶା ପ୍ରକଟ କରିଥିଲେ।

ସୂଚନାଯୋଗ୍ୟ, ସେପ୍ଟେମ୍ବର ୧୩ରେ ତିହାର ଜେଲରୁ ଜାମିନରେ ମୁକ୍ତ ହେବା ପରେ କେଜ୍ରିୱାଲ ପ୍ରଥମ 'ଜନତା ଅଦାଲତ'ରେ କହିଥିଲେ ଯେ ସେ ଦେଶର ସେବା କରିବାକୁ ରାଜନୀତିରେ ପ୍ରବେଶ କରିଥିଲେ। କୌଣସି ପଦ କିମ୍ବା କ୍ଷମତାର ଲୋଭ ପାଇଁ ନୁହେଁ। ତାଙ୍କ ବିରୋଧରେ ଆସିଥିବା ଦୁର୍ନୀତି ଅଭିଯୋଗକୁ ନେଇ ସେ ଦୁଃଖରେ ଇସ୍ତଫା ଦେଇଛନ୍ତି ଏବଂ ଗତ ୧୦ ବର୍ଷ ମଧ୍ୟରେ ସେ  ଟଙ୍କା ନୁହେଁ କେବଳ ସମ୍ମାନ ଅର୍ଜନ କରିଛନ୍ତି ବୋଲି କହିଥିଲେ।