କେରଳରେ ସ୍ଥିତି ସଂଗୀନ, ମୃତ୍ୟୁ ସଂଖ୍ୟା ୧୯୪ ଟପିଲା
କୋଚି: କେରଳରେ ବନ୍ୟାସ୍ଥିତି ଦିନକୁ ଦିନ ଗୁରୁତର ହେବାରେ ଲାଗିଛି । ପ୍ରବଳ ବର୍ଷା ଓ ବନ୍ୟାଫଳରେ ଗତ ଅଗଷ୍ଟ ୮ରୁ ଏପର୍ଯ୍ୟନ୍ତ ମୃତ୍ୟୁ ସଂଖ୍ୟା ୧୯୪ରେ ପହଞ୍ଚିଛି ବୋଲି ରାଜ୍ୟ ସରକାରଙ୍କ ପକ୍ଷରୁ ସୂଚନା ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆକାଶମାର୍ଗରୁ ବନ୍ୟାସ୍ଥିତି ଆକଳନ କରିବା ସହ ତୁରନ୍ତ ୫୦୦ କୋଟି ଟଙ୍କାର ସହାୟତା ଘୋଷଣା କରିଛନ୍ତି ।
Sambad is now on WhatsApp
Join and get latest news updates delivered to you via WhatsApp
ରାଜ୍ୟ ବିପର୍ଯ୍ୟୟ ପରିଚାଳନା କଣ୍ଟ୍ରୋଲ ରୁମ ପକ୍ଷରୁ କୁହାଯାଇଛି ଯେ ବନ୍ୟା ଯୋଗୁଁ ଗତ ୧୦ ଦିନ ମଧ୍ୟରେ ପ୍ରାୟ ୧୯୪ ଜଣ ଲୋକ ମୃତ୍ୟୁ ବରଣ କରିଥିବାବେଳେ ପ୍ରାୟ ୩.୧୪ ଲକ୍ଷ ଲୋକଙ୍କୁ ରିଲିଫ କ୍ୟାମ୍ପକୁ ସ୍ଥାନାନ୍ତରୀତ କରାଯାଇଛି । କେରଳରେ ଥିବା ସବୁ ନଦୀବନ୍ଧରେ ପାଣି ବିପଦ ସଂକେତ ଉପରେ ବୋହୁଥିବାରୁ ଜଳନିଷ୍କାସନ ପାଇଁ ଗେଟ ଖୋଲାଯାଇଛି । କେରଳରେ ପହଞ୍ଚିଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ମୁଖ୍ୟମନ୍ତ୍ରୀ ପି.ବିଜୟନ ଓ ରାଜ୍ୟର ବରିଷ୍ଠ ଅଧକାରୀଙ୍କ ସହ ଏକ ବୈଠକରେ ବନ୍ୟା ସ୍ଥିତିର ସମୀକ୍ଷା କରିଛନ୍ତି । ସେ କେରଳ ପାଇଁ ଅତିରିକ୍ତ ୫୦୦ କୋଟି ଟଙ୍କାର ସହାୟତା ଘୋଷଣା କରିଛନ୍ତି । ଏହା ସହିତ ମୃତବ୍ୟକ୍ତି ପିଛା ୨ ଲକ୍ଷ ଟଙ୍କା ଓ ଆହତ ବ୍ୟକ୍ତିଙ୍କୁ ୫୦ ହଜାର ଟଙ୍କାର ସହାୟତା ଘୋଷଣା କରିଛନ୍ତି । ତେବେ ଆସନ୍ତା ଏକ ସପ୍ତାହ ପର୍ଯ୍ୟନ୍ତ ଆହୁରି ବର୍ଷା ହେବାର ପାଣିପାଗ ବିଭାଗ ପୂର୍ବାନୁମାନ କରିଛି ।