ବିମାନ ଭିତରେ ସିଗାରେଟ ଟାଣି ବୃଦ୍ଧ ଗିରଫ
ମୁମ୍ବାଇ : ବିମାନ ଭିତରେ ଯାତ୍ରୀଙ୍କ ବିଶୃଙ୍ଖଳିତ ଆଚରଣ ଘଟଣା ଶେଷ ହେବାର ନାଁ ଧରୁନାହିଁ । ପ୍ରାୟ ପ୍ରତି ସପ୍ତାହରେ ଏପରି ଘଟଣା ଘଟୁଛି । ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ (ଡିଜିସିଏ)ଙ୍କ ବିଭିନ୍ନ ପଦକ୍ଷେପ ସତ୍ତ୍ବେ ଯାତ୍ରୀମାନଙ୍କ ବିଶୃଙ୍ଖଳିତ ଆଚରଣ ଜାରି ରହିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ଗତ ୨୯ ତାରିଖରେ କେରଳର କୋଚିକୁ ଯାଉଥିବା ସ୍ପାଇଶ ଜେଟର ଏକ ବିମାନ ଆକାଶରେ ଥିବାବେଳେ ବିମାନର ଶୌଚଳୟରେ ଜଣେ ୬୨ ବର୍ଷୀୟ ବ୍ୟକ୍ତି ଧୁମପାନ କରୁଥିବାବେଳେ ଧରା ପଡ଼ିଥିଲେ । ଉକ୍ତ ବ୍ୟକ୍ତି କେରଳର ତ୍ରିଶୂର ଜିଲ୍ଲାର ସୁକୁମାରନ ବୋଲି ଜଣାପଡ଼ିଛି । ତାଙ୍କୁ ଏହି ଅପରାଧରେ ଗିରଫ କରି କୋର୍ଟ ଚାଲାଣ କରାଯାଇଛି । ତେବେ ପରେ କୋର୍ଟ ତାଙ୍କୁ ଜାମିନ ପ୍ରଦାନ କରିଛନ୍ତି ।
ଅନ୍ୟପକ୍ଷରେ ଗତ ବର୍ଷ ନଭେମ୍ବର ୨୬ ରେ ଏୟାର ଇଣ୍ଡିଆର ନ୍ୟୁୟର୍କ-ନୂଆଦିଲ୍ଲୀ ବିମାନରେ ପରିସ୍ରା କରିଥିବା ଅଭିଯୋଗରେ ଗିରଫ ହୋଇଥିବା ଶଙ୍କର ମିଶ୍ରଙ୍କୁ ଦିଲ୍ଲୀର ଏକ ଅଦାଲତ ମଙ୍ଗଳବାରଦିନ ଜାମିନ ପ୍ରଦାନ କରିଛନ୍ତି । ଏହା ପୂର୍ବରୁ ଏୟାର ଇଣ୍ଡିଆ ଶଙ୍କର ମିଶ୍ରଙ୍କ ଉପରେ ଚାରି ମାସର ପ୍ରତିବନ୍ଧକ ଲଗାଇଛି। ନ୍ୟୁୟର୍କ-ଦିଲ୍ଲୀ ବିମାନରେ ଏହି ଘଟଣାରେ ସାରା ଦେଶର ଲୋକମାନେ ଅସନ୍ତୋଷ ବ୍ୟକ୍ତ କରିଥିଲେ । ଶଙ୍କର ମିଶ୍ର ବିମାନରେ ଜଣେ ୭୨ ବର୍ଷୀୟା ମହିଳାଙ୍କ ଉପରେ ପରିସ୍ରା କରିଥିବା ଅଭିଯୋଗ ହୋଇଥିଲା । ତାଙ୍କର ଏହି ଘୃଣ୍ୟ କାର୍ଯ୍ୟର ଛଅ ସପ୍ତାହ ପରେ ତାଙ୍କୁ ଗତ ସପ୍ତାହରେ ବେଙ୍ଗାଲୁରୁରୁ ଗିରଫ କରାଯାଇଥିଲା ।